- సాయుధ మూకల దాడిలో ఒకరి మృతి
న్యూఢిల్లీ : నైజీరియాలోని ఓ స్కూల్పై సాయుధ మూకలు దాడి చేసి 287 మంది విద్యార్థులను కిడ్నాప్ చేశాయి. ఈ దాడిలో ఒకరు ప్రాణాలు కోల్పోయారు. కడునా రాష్ట్రం కురిగా స్కూల్లో ఈ ఘటన జరిగింది. నైజీరియాలో ఇలాంటివి సాధారణమే అయినా, ఇంత భారీ సంఖ్యలో విద్యార్థులను కిడ్నాప్ చేయడం కలకలం రేపుతున్నది. సాయుధ మూకలు శుక్రవారం స్కూల్ను చుట్టుముట్టి గాల్లోకి కాల్పులు ప్రారంభించగానే విద్యార్థులు, సిబ్బంది తప్పించుకునేందుకు ప్రయత్నించారని స్కూల్ టీచర్ సానీ అబ్దుల్లాహి తెలిపారు.
అనంతరం వారు పిల్లలను కిడ్నాప్చేసినట్టు చెప్పారు. ఎంతమంది వారి చెరలో ఉన్నది లెక్కతేలలేదని అన్నారు. కాగా, విద్యార్థులంతా 8–15 ఏండ్ల వయస్సులోపువారని, వారిని రక్షించేందుకు సాయుధ బలగాలు ప్రత్యేక ఆపరేషన్ చేపట్టినట్టు కడునా గవర్నర్ ఉబా సానీ తెలిపారు. ఏ ఒక్క చిన్నారికి కూడా హానీ కలగకుండా చూసే బాధ్యత తమదేనని తల్లిదండ్రులకు భరోసా ఇచ్చారు.
