లెక్కలు తేలుతున్నాయి.. రైతు భరోసా సర్వేలో సాగు చేయని భూముల లెక్కలు రికార్డు

• రెండు రోజుల్లో 6 వేల ఎకరాలు గుర్తింపు
•  రైతుభరోసా నుంచి గుట్టలు, వెంచర్లు, ఫాంహౌస్​ల డాటా తొలగింపు

యాదాద్రి, వెలుగు :పంటలు పండించకున్నా.. పెట్టుబడి సాయం పొందిన భూముల లెక్క తేలుతోంది. సర్వే ప్రారంభించిన రెండ్రోజుల్లోనే వేలాది ఎకరాలు పెట్టుబడి సాయం పొందినట్టు తేలింది. వీటికి సంబంధించి వివరాలను రికార్డుల్లో నమోదు చేసుకుంటూ రైతు భరోసా డాటా నుంచి ఆ భూముల సర్వే నంబర్లను తొలగిస్తున్నారు. యాదాద్రి జిల్లాలో భూవిస్తీర్ణం దాదాపు 8 లక్షల ఎకరాలకు పైబడి ఉండగా, సాగుకు పనికొచ్చే భూమి 6 లక్షల ఎకరాల వరకు ఉంది. ఈ భూమిలో సుమారుగా 4.50 లక్షల ఎకరాల్లో తోటలు సహా వివిధ రకాల పంటలు సాగు చేస్తున్నారు. 

2023 యాసంగిలో జిల్లాలోని 2,48,536 మంది రైతులకు 5,87,360 ఎకరాలకు రూ.5 వేల చొప్పున రూ.293.68 కోట్లు రైతుబంధు అందించారు. అయితే ఈ సీజన్​నుంచి పంటలు సాగు చేస్తున్న రైతులకే రైతుభరోసా అందించాలని, 2023 యాసంగి సీజన్​లబ్ధిదారుల జాబితాను ప్రామాణికంగా తీసుకొని సర్వే చేయాలని ప్రభుత్వం ఆదేశించిన సంగతి తెలిసిందే. ఈ ఆదేశాల మేరకు రెవెన్యూ, సర్వేయర్లు, అగ్రికల్చర్​డిపార్ట్​మెంట్​స్టాఫ్​సర్వే చేస్తున్నారు. 

గుట్టలు, వెంచర్లు, ఫాంహౌస్​లకు రైతుబంధు..

అగ్రికల్చర్​ డిపార్ట్​మెంట్​లెక్కల ప్రకారం 4.50 లక్షల ఎకరాల్లో సాగు చేస్తున్నారని ఉన్నప్పటికీ.. ప్రతి సీజన్​లో దాదాపు 6 లక్షల ఎకరాలకు రైతుబంధు పొందుతూ వచ్చారు. రైతుభరోసా నిమిత్తం చేస్తున్న సర్వేలో జిల్లాలోని పలు మండలాల్లో గుట్టలు, వెంచర్లు చేసినప్పటికీ.. రైతుబంధు పొందుతున్నారని తేలుతోంది. జిల్లాలో కొన్ని ప్రాంతాల్లో ఆర్థికంగా ఉన్నవారు ఫాంహౌస్​లు ఏర్పాటు చేసుకున్నారు. వీటికి కూడా రైతుబంధు తీసుకుంటున్నారు. తాజా సర్వేలో ఫాంహౌస్​లను పరిశీలించిన స్టాఫ్​.. ఈ పరిధిలో ఎంత సాగు చేస్తున్నారో తెలుసుకొని మిగిలిన భూమిని రైతుభరోసా డేటా నుంచి తొలగిస్తున్నారు. 

ఫాంలాండ్స్​..

గతంలో జిల్లా వ్యాప్తంగా ఫాంలాండ్స్​ పేరుతో పెద్ద ఎత్తున రియల్​ఎస్టేట్​బిజినెస్ సాగింది. గుంటల చొప్పున భూమి కొనుగోలు చేస్తే రైతుబంధు వస్తుందని అప్పట్లో బ్యానర్లు కూడా ఏర్పాటు చేశారు. ఈ విధమైన ఐదు గుంటలు, పది గుంటల చొప్పున అమ్మేశారు. ఇప్పుడీ సర్వేలో వాటిని కూడా గుర్తిస్తూ వాటి సర్వే నంబర్లను డాటా నుంచి తొలగిస్తున్నారు.
 

6 వేల ఎకరాలు తొలగింపు..

జిల్లాలో రెండు రోజులుగా సర్వే నిర్వహిస్తున్నారు. ఈ రెండు రోజుల్లో 150 గ్రామాలకు పైగా నిర్వహించిన సర్వేలో ఎలాంటి పంటలు పండించని గుట్టలు, వెంచర్లకు సంబంధించిన దాదాపు 6 వేల ఎకరాల భూమికి రైతుబంధు పొందారని తేలింది. ఒక్క భూదాన్​ పోచంపల్లి మండలంలోనే పది గ్రామాల్లో నిర్వహించిన సర్వేతో రాళ్ల గుట్టలు, వెంచర్లు కలిగిన300 ఎకరాలకు రైతుబంధు పొందుతున్నారని తెలిసింది. దీంతో ఆ భూముల సర్వే నంబర్లను రైతు భరోసా డాటా నుంచి తొలగించారు. అయితే పంటలు పండించకుండా ఎన్ని ఎకరాలకు రైతుబంధు పొందారో ఈనెల 24 నాటికి పూర్తిగా తేలిపోతుందని జిల్లాఫీసర్లు చెబుతున్నారు.