- పూర్తయినా ప్రారంభం కాని మార్కెట్కాంప్లెక్స్
- స్థల వివాదంతో పెండింగ్ పడిన ఓపెనింగ్
- మరో నాలుగు చోట్ల అదే పరిస్థితి
- బిల్లులు రాక పనులు ఆపేసిన కాంట్రాక్టర్లు
నిజామాబాద్, వెలుగు: నిజామాబాద్ జిల్లాలో ఐదు చోట్ల ఇంటిగ్రేటెడ్ మార్కెట్ల నిర్మాణం చేపట్టినా ఒక్కటి కూడా పూర్తికాలేదు. నిజామాబాద్ నగరంలో రెండు చోట్ల కూడా పనులు చివరి దశకు వచ్చి ఆగిపోయాయి. భీంగల్ లో కొంత వరకు పనులు జరగగా బోధన్, ఆర్మూర్లలో మార్కెట్ల నిర్మాణం పిల్లర్ల దశలోనే నిలిచిపోయింది.
ఎక్కడ పడితే అక్కడ కూరగాయలు, నాన్ వెజ్ అమ్మకాలు జరుగుతుండడంతో చాలా చోట్ల ట్రాఫిక్ సమస్యలు తలెత్తాయి. ఇష్టమొచ్చిన చోట కూరగాయలు, మటన్, చికెన్, చేపల అమ్మడంవల్ల శుభ్రత లోపిస్తోంది. ఈ సమస్యలకు చెక్ పట్టేందుకు గతంలో వెజ్, నాన్ వెజ్ ఒకే చోట అమ్ముకునేందుకు వీలుగా ఇంటిగ్రేటెడ్ మార్కెట్లను నిర్మించాలని ప్రభుత్వం భావించింది.
నిజామాబాద్ సిటీలో ఏటా కొత్త కాలనీలు ఏర్పడుతుండడంతో నగర జనాభా ఇప్పటికే 3.50 లక్షలకు చేరింది. వీక్లీమార్కెట్(జుమెరాత్ బజార్), గంజ్లో వెజిటెబుల్అమ్మకాలు జరుగుతాయి. పండ్లు, మటన్, చికెన్, చేపల మార్కెట్వేర్వేరు చోట్ల ఉన్నాయి. ఈ సమస్యకు పరిష్కారంగా నిజామాబాద్ నగరంలో బోధన్రోడ్లోని పాత బస్టాండ్ దగ్గర, ఖలీల్వాడిలోని పాత సర్వే లాండ్ రికార్డ్స్ ఆఫీసుదగ్గర రెండు మార్కెట్ల నిర్మాణాన్ని ప్రారంభించారు.
అలాట్మెంట్కు బ్రేక్
బోధన్ రోడ్బస్టాండ్ దగ్గర నాలుగేండ్ల కింద టీయూఎఫ్ఐడీసీ నిధుల నుంచి రూ.9 కోట్లతో మార్కెట్ నిర్మాణాన్ని ప్రారంభించారు. ఏడాది కిందటే 98 మడిగలతో మార్కెట్ కాంప్లెక్స్ నిర్మాణం దాదాపు పూర్తయిన తర్వాత స్థల వివాదం తెరపైకి వచ్చింది. గతంలో అక్కడ మేకల వ్యాపారం చేసిన వారు అది తమ ల్యాండ్అని, అక్కడ కాంప్లెక్స్ఎలా కట్టారని అభ్యంతరం వ్యక్తం చేయడంతో మున్సిపల్ అధికారులు షాపుల కేటాయింపు ప్రక్రియ నిలిపివేశారు.
దీంతో ఏడాదిగా కాంప్లెక్స్ యాంటీ సోషల్ యాక్టివిటీస్కు అడ్డాగా మారింది. స్థలవివాదాన్ని పరిష్కరించి మార్కెట్ను ప్రారంభించేందుకు అర్బన్ ఎమ్మెల్యే ధన్పాల్ సూర్యనారాయణ ఆఫీసర్లతో ఇప్పటికే రెండుసార్లు మీటింగ్ పెట్టినా ఫలితం కనిపించలేదు.
90 శాతం పూర్తి
ఖలీల్వాడీలోని పాత సర్వే ల్యాండ్ రికార్డ్స్ ఆఫీస్ గ్రౌండ్లో రూ.7.20 కోట్లతో మరో ఇంటిగ్రేటెడ్ మార్కెట్నిర్మాణం ప్రారంభించారు. పనులు దాదాపు 90 శాతం వరకు పూర్తయ్యాయి. కరెంట్, ప్లంబింగ్ వర్క్ మాత్రమే మిగిలింది. కాంట్రాక్టర్కు పాత బిల్లులు ఇవ్వకపోవడంవల్ల పనులు నిలిపివేసినట్టు తెలుస్తోంది.
భీంగల్ లో రూ.3.90 కోట్లతో చేపట్టిన మార్కెట్ కూడా 80 శాతం వరకు పూర్తయింది. ఇక్కడా కాంట్రాక్టర్వల్లే పనులు ఆగాయి. బోధన్, ఆర్మూర్లలో కూడా రూ.7.20 కోట్ల చొప్పున నిధులు మంజూరు చేయగా పనులు మొదలు పెట్టినా అవి పిల్లర్ల దగ్గరే ఆగిపోయాయి.
