ఆ 2 వేల మందికీ నోటీసు​లిస్తరా? కంచ గచ్చిబౌలి మార్ఫింగ్​ ఫొటో వివాదంలో స్మితా సబర్వాల్​ మరో ట్వీట్

• అలా చేయకపోతే కొందరినే టార్గెట్ చేసినట్టు భావించాల్సి వస్తది
• కంచ గచ్చిబౌలి మార్ఫింగ్​ ఫొటో వివాదంలో స్మితా సబర్వాల్​ మరో ట్వీట్ 
• పోలీసులు ఇచ్చిన నోటీసులకు వివరణ

హైదరాబాద్, వెలుగు: కంచ గచ్చిబౌలి భూముల వివాదంలో సీనియర్ ఐఏఎస్, టూరిజం ప్రిన్సిపల్​ సెక్రటరీ స్మితా సబర్వాల్​ వెనక్కి తగ్గడం లేదు. ఈ భూములకు సంబంధించి మార్ఫింగ్​ ఫొటోను ‘ఎక్స్‌‌’ (ట్విట్టర్)లో షేర్ చేయడంపై పోలీసులు నోటీసులు ఇవ్వగా, వాటికి ఆమె శనివారం వివరణ ఇచ్చారు. అయితే ఆ వెంటనే ‘ఎక్స్‌‌’లో మరో పోస్టు పెట్టారు. ‘‘చట్టాన్ని గౌరవించే వ్యక్తిగా గచ్చిబౌలి పోలీసులకు పూర్తిగా సహకరించాను. కానీ ఆ ఫొటోను నాతో పాటు 2 వేల మంది రీపోస్ట్ చేశారు. మరి వారందరిపైనా ఇలాంటి చర్యలే తీసుకుంటున్నారా? ఒకవేళ అలా చేయకపోతే ఈ వ్యవహారంలో కొందరిని మాత్రమే టార్గెట్ చేసినట్టు భావించాల్సి వస్తుంది. ఇది సహజ న్యాయసూత్రాలకు విరుద్ధం. చట్టం ముందు సమానత్వాన్ని ఉల్లంఘించినట్లే” అని అందులో పేర్కొన్నారు. అలాగే ఆ ట్వీట్‌‌‌‌‌‌‌‌కు #RuleOfLaw, #FreedomOfSpeech, #NaturalJustice, #JustSaying హ్యాష్‌‌‌‌‌‌‌‌ట్యాగ్‌‌‌‌‌‌‌‌లను జోడించారు. 

ఇది ఐదో ట్వీట్.. 

మార్చి 31న ‘హాయ్‌‌‌‌‌‌‌‌ హైదరాబాద్‌‌‌‌‌‌‌‌’ అనే ‘ఎక్స్’ హ్యాండిల్‌‌‌‌‌‌‌‌లో పోస్టు చేసిన గిబ్లీ ఫొటోను స్మితా సబర్వాల్ రీట్వీట్​చేశారు. అది కంచ గచ్చిబౌలి భూముల్లో బుల్డోజర్ల ముందు నెమళ్లు, జింకలు ఉన్నట్లుగా సృష్టించిన మార్ఫింగ్ ఫొటో. ఈ ఇష్యూలో పోలీసులు కేసులు నమోదు చేయడం ప్రారంభించగానే కేంద్రమంత్రి కిషన్​రెడ్డి, బీఆర్ఎస్ నేత జగదీశ్​రెడ్డి సహా పలువురు తమ సోషల్​మీడియా అకౌంట్ల నుంచి ఆ మార్ఫింగ్​ ఫొటోను తొలగించారు. కానీ స్మితా సబర్వాల్ మాత్రం తొలగించలేదు. 

దీంతో ఈ నెల12న గచ్చిబౌలి పోలీసులు ఆమెకు నోటీసులు ఇచ్చారు. నిజానికి నోటీసులు జారీ అయ్యాక స్మితా సబర్వాల్ ఈ వివాదానికి ఫుల్‌‌‌‌‌‌‌‌స్టాప్​ పెడ్తారని అంతా భావించారు. కానీ ప్రభుత్వాన్ని ఇరుకునపెట్టేలా ఈ నెల 17న ఆమె మరో మూడు రీట్వీట్లు చేశారు. ‘తెలంగాణ పోలీసులు సొంత ఐఏఎస్​అధికారికే నోటీసులిస్తారా? ఇది దేనికి సంకేతం?’ అంటూ ఓ ఇద్దరు మహిళలు పెట్టిన పోస్టులతో పాటు ‘కంచగచ్చిబౌలి భూముల్లో ప్రభుత్వం తొలగించిన 100 ఎకరాలను పునరుద్ధరించాలి’ అని సుప్రీంకోర్టు ఇచ్చిన ఆదేశాలతో ఉన్న ‘లైవ్​లా’ పోస్టును షేర్ చేశారు. ఇప్పుడు తాజాగా తనలాగా మార్ఫింగ్ ఫొటోను షేర్ చేసిన 2 వేల మందిపైనా చర్యలు తీసుకుంటారా? అని ప్రభుత్వాన్ని ప్రశ్నిస్తూ మరో ట్వీట్ చేశారు. దీంతో స్మితా సబర్వాల్ వ్యవహరిస్తున్న తీరు చర్చనీయాంశంగా మారింది.