- మంత్రి పొన్నం ప్రభాకర్
పటాన్ చెరు, వెలుగు: విద్యార్థులకు నాణ్యమైన విద్యను అందించాలని బీసీ సంక్షేమ శాఖ మంత్రి పొన్నం ప్రభాకర్ అన్నారు. బుధవారం పటాన్ చెరు పాటి చౌరస్తాలోని ఓ ఫంక్షన్ హాల్ లో ఏర్పాటు చేసిన తెలంగాణ రికగ్నైజ్డ్ స్కూల్స్ మేనేజ్మెంట్ అసోసియేషన్(ట్రస్మా) రాష్ట్ర జనరల్ బాడీ మీటింగ్ లో మంత్రి మాట్లాడారు. రాష్ట్రంలో 60 శాతం స్టూడెంట్స్ ప్రైవేట్లోనే చదువుతున్నారన్నారు. ప్రైవేట్ స్కూళ్లల్లో సేవలు మరింత మెరుగుపడేలా చూడాలన్నారు.
పేరెంట్స్ పెట్టుకున్న నమ్మకాన్ని వమ్ము చేయకుండా పిల్లలకు విద్యాబుద్ధులు నేర్పించడం గర్వకారణమన్నారు. ప్రైవేట్ యాజమాన్యాలు వ్యాపార దృష్టితో కాకుండా విద్యాబుద్దులు నేర్పిస్తున్నామనే భావనతో ఉండాలన్నారు. డిమాండ్లు, సలహాలను ప్రభుత్వం పరిశీలిస్తుందని తెలిపారు.
పటాన్ చెరు ఎమ్మెల్యే గూడెం మహిపాల్ రెడ్డి మాట్లాడుతూ ప్రైవేట్ స్కూల్స్ యాజమాన్యాలు ఎదుర్కొంటున్న సమస్యలను సీఎం దృష్టికి తీసుకెళ్తానని హామీ ఇచ్చారు.ట్రస్మా రాష్ట్ర అధ్యక్షుడు ఎస్. మధుసూధన్, రాష్ట్ర కార్యదర్శి ఎన్. రమేశ్ రావు, ట్రెజరర్ పి రాఘవేందర్రెడ్డి, విలియం జెమ్స్, ప్రభాకర్రెడ్డి, సాయితేజ, ఉమా మహేశ్వర్రావు
పాల్గొన్నారు.
