మహబూబ్నగర్ లో రౌండ్.. రౌండ్కు ఉత్కంఠ

4,500 మెజార్టీతో గెలుపొందిన బీజేపీ క్యాండిడేట్ డీకే అరుణ
చివరి మూడు రౌండ్లలో లీడ్ వచ్చినా వంశీకి తప్పని నిరాశ

మహబూబ్నగర్, వెలుగు: మహబూబ్నగర్ లోక్సభ స్థానానికి జరిగిన ఓట్ల లెక్కింపు ఉత్కంఠగా సాగింది. బీజేపీ క్యాండిడేట్ డీకే అరుణ, కాంగ్రెస్ క్యాండిడేట్ చల్లా వంశీచంద్ రెడ్డి మధ్య రౌండ్ రౌండ్కు లీడ్ తగ్గుతూ, పెరుగుతూ రావడంతో ఫలితంపై ఉత్కంఠ నెలకొంది. అన్ని రౌండ్లు పూర్తయ్యేసరికి బీజేపీకి 5,06,747 ఓట్లు రాగా, కాంగ్రెస్కు 5,03,111 ఓట్లు వచ్చాయి. దీంతో డీకే అరుణ 3,636 ఓట్ల ఆధిక్యాన్ని సాధించారు. సాయంత్రం పోస్టల్ బ్యాలెట్ ఓట్లను లెక్కించగా, డీకే అరుణకు నాలుగు వేలు, వంశీకి 3,136 ఓట్లు వచ్చాయి. ఓవరాల్గా ఈవీఎం, పోస్టల్ బ్యాలెట్ ఓట్లు కలుపుకొని డీకే అరుణకు 5,10,747 ఓట్లు, వంశీకి 5,06,247 ఓట్లు వచ్చాయి. దీంతో అరుణ 4,500 స్వల్ప మెజార్టీతో గెలుపొందారు.

11 రౌండ్లు బీజేపీకి.. పది రౌండ్లు కాంగ్రెస్కు లీడ్

మహబూబ్నగర్ జిల్లా కేంద్రంలోని పాలమూరు యూనివర్సిటీలో ఉదయం 8 గంటల నుంచి సాయంత్రం నాలుగు గంటల వరకు ఓట్లను లెక్కించారు. పార్లమెంట్లోని 7 నియోజకవర్గాలుండగా, ఒక్కో నియోజకవర్గానికి 14 టేబుళ్ల చొప్పున మొత్తం 98 టేబుళ్లను ఏర్పాటు చేశారు. 21 రౌండ్లలో ఓట్లు లెక్కించగా, మొదటి రౌండ్ నుంచే బీజేపీ, కాంగ్రెస్ పార్టీల మధ్య టఫ్ ఫైట్ నడిచింది. 11 రౌండ్లలో బీజేపీకి లీడ్ రాగా, పది రౌండ్లలో కాంగ్రెస్ పైచేయి సాధించింది. మొదటి నాలుగు రౌండ్లలో బీజేపీ ఆధిక్యం సాధించి 11,272 ఓట్ల లీడ్ సాధించగా, ఐదో రౌండ్లో కాంగ్రెస్ 375 ఓట్ల స్వల్ప లీడ్ను సాధించింది. ఆరు, ఏడు, ఎనిమిదో రౌండ్లలో బీజేపీ ఆధిక్యం సాధించి 18,388 ఓట్ల లీడ్కు చేరింది.

తొమ్మిదో రౌండ్లో కాంగ్రెస్ పుంజుకొని ఆ రౌండ్లో 5,453 ఓట్ల లీడ్ను సాధించింది. పదో రౌండ్లో బీజేపీ 2,636 ఓట్లను సాధించి 15,571 ఓట్ల లీడ్కు చేరుకుంది. 11 రౌండ్లో కాంగ్రెస్కు 504 ఓట్ల స్వల్ప ఆధిక్యం రాగా.. 12వ రౌండ్లో వంశీకి 6,966 లీడ్ వచ్చింది. 13వ రౌండ్లో తిరిగి బీజేపీ 5,673, 14వ రౌండ్లో 1,488 ఓట్లు రావడంతో అప్పటి వరకు డీకే అరుణ 22,732 ఓట్ల లీడ్కు చేరుకుంది.

15, 16, 17వ రౌండ్లలో కాంగ్రెస్ 1,573, 4,896, 385 ఓట్ల ఆధిక్యం రాగా, 18వ రౌండ్లో బీజేపీకి 572 ఓట్ల స్వల్ప ఆధిక్యత వచ్చింది. 19, 20, 21వ రౌండ్లలో కాంగ్రెస్కు 688, 3,351, 1,305 ఓట్ల ఆధిక్యం వచ్చింది. అప్పటికే డీకే అరుణ 3,636 ఓట్ల స్వల్ప ఆధిక్యంతో ఉన్నారు. ఇదిలాఉంటే 8,708 పోస్టల్ బ్యాలెట్ ఓట్లు ఉన్నాయి. ఇందులో 847 ఓట్లు ఇన్వాలీడ్ కాగా, 106 ఓట్లను రిజెక్ట్ చేశారు. నోటాకు 44 ఓట్లు వచ్చాయి. బీజేపీకి 4 వేలు, కాంగ్రెస్కు 3,136, బీఆర్ఎస్కు 496 ఓట్లు వచ్చాయి.