రాష్ట్ర రాజధాని హైదరాబాద్లో పేలుడు కలకలం రేపింది. 2024, నవంబర్ 10 ఆదివారం ఉదయం జూబ్లీహిల్స్ చెక్ పోస్ట్లోని తెలంగాణ స్పైసీ హోటల్లో పేలుడు సంభవించింది. హోటల్లో వస్తువుల నిల్వ కోసం ఉంచిన రిఫ్రిజిరేటర్లోని కంప్రెసర్ బ్లాస్ట్ కావడంతో మంటలు చెలరేగాయి. పేలుడు ధాటికి రాళ్ళు ఎగిరి హోటల్ కింది భాగంలో ఉన్న దుర్గా భవానీ నగర్ బస్తీలోని ఇండ్లపై పడడంతో నాలుగు ఇండ్లు ధ్వంసం కాగా.. మహిళ, ఓ బాలికకు గాయాలు అయ్యాయి.
భారీ శబ్ధంతో పేలుడు సంభవించడంతో ఏం జరిగిందో అర్థంకాక స్థానిక బస్తీ వాసులు ఇండ్ల నుండి బయటకు పరుగులు తీశారు. స్థానికుల ద్వారా సమాచారం అందుకున్న పోలీసులు, ఫైర్ సిబ్బంది హూటాహుటిన ఘటన స్థలానికి చేరుకున్నారు. ఘటన స్థలంలో సహయక చర్యలు చేపట్టారు. పేలుడుకి గల కారణాలపై ఆరా తీస్తున్నారు. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
