- ముగ్గురు యువకుల అరెస్ట్, రూ.7 లక్షలకుపైగా సరుకు సీజ్
- పరారీలో ఇద్దరు ప్రధాన నిందితులు
బడంగ్ పేట, వెలుగు: డార్క్వెబ్ ద్వారా సిటీకి డ్రగ్స్ తెప్పించి, సోషల్మీడియా సహాయంతో అమ్ముతున్న డ్రగ్ పెడ్లర్ రాకెట్ గుట్టురట్టైంది. మహేశ్వరం డీసీపీ సునీతారెడ్డి తెలిపిన వివరాల ప్రకారం.. టోలీచౌకీలోని సాలార్ జంగ్ కాలనీకి చెందిన మహమ్మద్ ఇద్రిస్ సలీం తన బామ్మర్ది మహమ్మద్ అబ్బాస్తో కలసి కొన్ని నెలలుగా డ్రగ్స్ను డార్క్ వెబ్ ద్వారా సిటీకి తెప్పిస్తున్నాడు. అనంతరం ధనవంతుల పిల్లలను టార్గెట్ చేసి, ఇన్స్టాగ్రామ్, స్నాప్ చాట్ తదితర సోషల్ మీడియా ప్లాట్ఫామ్స్ ద్వారా అమ్ముతున్నారు.
యూపీఐ ద్వారా కస్టమర్ల నుంచి డబ్బులు తీసుకొని, డ్రగ్స్ వారికి చేరిన వెంటనే సోషల్ మీడియాలో వివరాలను డిలీట్ చేస్తున్నారు. పక్కా సమాచారంతో ఆదివారం సాయంత్రం బాలాపూర్లో డ్రగ్స్ సరఫరా చేస్తున్న రాజేంద్రనగర్ హ్యాపీ హోమ్కు చెందిన బండారి సునీల్ అలియాస్ సులేమాన్ (30), దారుసలాంకు చెందిన అస్లాం (32), నాంపల్లికి చెందిన మహమ్మద్ అక్రమ్( 30)ను అదుపులోకి తీసుకున్నారు. నిందితుల నుంచి 170 గ్రాముల 34 ఓజీ గంజాయి ప్యాకెట్లు, 9 కిలోల ఎండు గంజాయి, 4 సెల్ ఫోన్లు, ఓ కారుతోపాటు రెండు బైక్లు స్వాధీనం చేసుకున్నారు.
వీటి విలురూ.7 లక్షలకు పైగా ఉంటుందని పోలీసులు తెలిపారు. వీరిపై ఇప్పటికే గోల్కొండ, కార్ఖానా పోలీస్ స్టేషన్లలో కేసులు ఉన్నాయి. ఈ కేసులో ప్రధాన నిందితులైన ఇద్రిస్, అబ్బాస్ పరారీలో ఉన్నారని, త్వరలోనే వారిని పట్టుకుంటామని డీసీపీ సునీతారెడ్డి వెల్లడించారు. పట్టుబడిన ముగ్గురితోపాటు పరారీలో ఉన్న ప్రధాన నిందితులపై కేసు నమోదు చేసి, దర్యాప్తు చేస్తున్నారు. సమావేశంలో మహేశ్వరం ఏసీపీ లక్ష్మీకాంత్రెడ్డి, బాలాపూర్ సీఐ సుధాకర్ ఉన్నారు.
