- బలమైన లీడర్లు ను రంగంలో దింపాలని హైకమాండ్ ప్లాన్
నల్గొండ, వెలుగు : ఉమ్మడి జిల్లా బీఆర్ఎస్ లో ఎంపీ సీట్ల లొల్లి షురూ అయింది. అసెంబ్లీ సీట్లు సిట్టింగ్లకే ఇవ్వడంతో ఇప్పుడు ఆశావహుల దృష్టంతా ఎంపీ సీట్ల పైన పడింది. సీఎం కేసీఆర్ సిట్టింగ్ ఎమ్మెల్యేలకే టికెట్టు ఇచ్చినట్టు ఎంపీలకు కూడా అలాగే అవకాశం ఇవ్వాలని కోరుతున్నారు. ఈ మేరకు పలువురు ఆశావహులు సీఎం మెప్పుపొందేందుకు ఇప్పటి నుంచే ప్రయత్నాలు ముమ్మరం చేశారు. ఎమ్మెల్యే టికెట్ పైన పెట్టుకున్న ఆశలు నెరవేరని ఇంకొంత మంది లీడర్లు ఎంపీ సీటు కోసం ప్రయత్నిస్తున్నారు. ఈ జాబితాలో భువనగిరి ఎంపీ సెగ్మెంట్ నేతలు ముందున్నారు.
కాంగ్రెస్ మాజీ అధ్యక్షుడు కుంభం అనిల్ కుమార్ రెడ్డి బీఆర్ఎస్లో చేరడంతో ఆయనకు భువనగిరి ఎంపీ సీటు ఆఫర్ చేశారు. తనకు ఎంపీ టికెట్ ఇస్తున్నట్టు సీఎం చెప్పిన విషయాన్ని కూడా అనిల్ ఇటీవల ప్రకటించారు. కానీ బీఆర్ఎస్లో భువనగిరి పార్లమెంట్ స్థానాన్ని బీసీలకు మాత్రమే కేటాయిస్తూ వస్తున్నారు. 2009 నుంచి 2019 ఎన్నికల వ రకు భువనగిరి సీటు పైన బీసీ క్యాండేంట్ను నిలబెట్టారు. ఇప్పుడు మళ్లీ అదే స్థానానికి బీసీ, ఓసీ లీడర్లు పోటీ పడుతున్నారు.
నల్గొండ ఎంపీ స్థానంతో పోలిస్తే భువనగిరి సెగ్మెంట్ పరిధిలో గౌడ, యాదవ సామాజిక వర్గం ఓటర్లు ఎక్కువ ఉండటంతో ఈ స్థానాన్ని అదే వర్గానికి చెందిన లీడర్లకు కేటాయించారు. కానీ బీఆర్ఎస్ జాతీయ పార్టీగా మారిన నేపథ్యంలో జాతీయ స్థాయి అవసరాల దృష్ట్యా ఆర్థికంగా, సామాజికంగా బలమైన అభ్యర్థులను నిలబెట్టాలని హైకమాండ్ చూస్తోంది. కుంభం అనిల్ రెడ్డి రాకతో భువనగిరి లో ఆ లోటు తీరిందని భావిస్తున్న తరుణంలో కొత్తగా బీసీ లీడర్లు పోటీ పడటం బీఆర్ఎస్లో కొత్త కుంపటి రాజేసింది.
బీసీలు వర్సెస్ ఓసీలు..
సీఎం కేసీఆర్ హామీతో మునుగోడు ఉప ఎన్నికల టైంలో బీజేపీ నుంచి బీఆర్ఎస్లో చేరిన ఆలేరు మాజీ ఎమ్మెల్యే బూడిద భిక్షమయ్యగౌడ్ పరిస్థితి అటుఇటుగా మారింది. ఎమ్మెల్యే, ఎమ్మెల్సీ, లేక పోతే ఏదైనా కార్పొరేషన్ చైర్మన్ పదవి ఇస్తారని ప్రచారం జరిగింది. కానీ ఇవేమీ నెరవేరకపోవడంతో చివరగా భువనగిరి ఎంపీ సీటు లభిస్తుందని ఆశిస్తున్నారు. గౌడ సామాజిక వర్గానికి జిల్లాలో సరియైన ప్రాధాన్యం కల్పించలేదని బీఆర్ఎస్ విమర్శలు ఎదుర్కొంటోంది. దీన్ని నుంచి బయట పడాలంటే ఆపార్టీకి భిక్షమయ్యగౌడ్ తప్పా వేరొకరు లేరని నేతలు చెబుతున్నారు.
కానీ అదే కోవలో నకిరేకల్ నియోజకవర్గానికి చెందిన రాష్ట్ర షీప్స్అండ్ గోట్స్ డెవలప్మెంట్ కార్పొరేషన్ చైర్మన్ డాక్టర్ దూదిమెట్ల బాలరాజు యాదవ్ కూడా ఎంపీ టికెట్ కోసం ప్రయత్ని స్తున్నారు. ఇటీవల సీఎం కేసీఆర్ను కలిసిన ఆయన భువనగిరి సెగ్మెంట్ పరిధిలో బీసీ ఓటర్ల లెక్కలను, తన బయోడేటాను సీఎంకు అందజేశారు.
భువనగిరి ఎంపీ సెగ్మెంట్ పరిధిలోని ఏడు అసెంబ్లీ స్థానాలు ఐదు రెడ్లకు ఇవ్వగా, మరో రెండు ఎస్సీలకు రిజర్వు అయ్యాయి. కాబట్టి ఎంపీ టికెట్ ఎట్టి పరిస్థితుల్లో బీసీలకే ఇవ్వాలని పట్టుబడుతున్నారు. పైగా రాష్ట్రంలో 1 7 ఎంపీ సీట్లలో ఈక్వేషన్స్ ప్రకారం చూస్తే బీసీలకు ఇచ్చేందుకు జహీరా బాద్, భువనగిరిలో మాత్రమే అవకాశం ఉందని ఆ పార్టీ లీడర్లు చెబుతు న్నారు.
నల్గొండ సీటు రెడ్లకేనా..!
కాంగ్రెస్ పార్టీ కంచుకోటగా ఉన్న నల్గొండ ఎంపీ స్థానాన్ని ఇప్పటి వరకు బీఆర్ఎస్ గెలిచిన దాఖాల్లేవు. 2009 నుంచి 2019 వరకు బీఆర్ఎస్ చే సిన ప్రయత్నాలు ఫలించలేదు. చివరకు 2014లో కాంగ్రెస్ నుంచి గెలిచి న గుత్తా సుఖేందర్ రెడ్డి బీఆర్ఎస్లో చేరినప్పటికీ 2019 ఎన్నికల్లో ఆపార్టీకి గెలుపు దక్కలేదు. దీంతో ఈసారి నల్గొండ సీటును ఎట్టి పరిస్థితుల్లో కైవసం చేసుకోవాలని చూస్తోంది. గత ఎన్నికల్లో బలమైన అభ్యర్థులతో ప్రయోగం చేసినప్పటికీ సక్సెస్ కాలేదు.
బీఆర్ఎస్ జాతీయ అవసరాలను దృష్టిలో పెట్టకుని అవసరమైతే నల్గొండ, భువనగి రి రెండు సీట్లను రెడ్లకే ఇవ్వాలనే ఆలోచన చేస్తున్నట్లు తెలిసింది. ప్రస్తుతానికి నల్గొండ స్థానానికి మండలి చైర్మన్ గుత్తా కొడుకు అమిత్ రెడ్డితో పాటు, మంత్రి జగదీష్ రెడ్డి ప్రధాన అనుచరుడు రియల్ ఎస్టేట్ దిగ్గజం సూర్యాపేటకు చెందిన మందడి నరేందర్ రెడ్డి పేరు వినిపిస్తోంది. ఇటీవల మంత్రి జగదీశ్ రెడ్డితో కలిసి నరేందర్ రెడ్డి సీఎంను కలవడం ఈ చర్చకు దారితీసింది.
