- అలకనంద హాస్పిటల్లో కిడ్నీ రాకెట్తో మరోసారి తెరపైకి..
- గత ఆగస్టులో మంచిర్యాలలో ఆర్గాన్ డొనేషన్పై వివాదం
- అంబులెన్సు డ్రైవర్లు, డాక్టర్లు, హాస్పిటల్స్ పాత్రపై ఆరోపణలు
- ఈ వ్యవహారంలో రూ.లక్షలు చేతులు మారాయని ఆరోపణలు
- సీఐడీ ఎంక్వైరీకి ఆదేశించిన హెల్త్ మినిస్టర్ దామోదర రాజనర్సింహ
మంచిర్యాల, వెలుగు: హైదరాబాద్లోని అలకనంద హాస్పిటల్లో బయటపడ్డ కిడ్నీ రాకెట్తో పాటు గతంలో బ్రెయిన్ డెత్ కేసుల పేరిట వివిధ హాస్పిటళ్లలో జరిగిన ఆర్గాన్ డొనేషన్ దందాపై ప్రభుత్వం సీఐడీ విచారణకు ఆదేశించింది. దీంతో గత ఆగస్టులో మంచిర్యాలలో సంచలనం సృష్టించిన ఆర్గాన్ డొనేషన్ వ్యవహారం మరోసారి తెరపైకి వచ్చింది.
జైపూర్ మండలం శెట్పల్లి గ్రామానికి చెందిన రేవెల్లి శ్రీకాంత్ కేసులో పోలీసులు తూతూమంత్రంగా విచారణ జరిపి చేతులు దులిపేసుకున్నారని, ఈ వ్యవహారంలో పెద్ద మొత్తంలో పైసలు చేతులు మారాయని ఆరోపణలు ఉన్నాయి. ఈ అంశాన్ని రాష్ర్ట వైద్య ఆరోగ్యశాఖ మంత్రి దామోదర రాజనర్సింహ ప్రత్యేకంగా ప్రస్తావిస్తూ ఎంక్వైరీకి ఆదేశాలివ్వడం చర్చనీయాంశంగా మారింది.
తప్పుదారి పట్టించిన అంబులెన్స్ డ్రైవర్లు...
శెట్పల్లికి చెందిన రేవెల్లి శ్రీకాంత్ (35) నిరుడు ఆగస్టు 6న గ్రామ పంచాయతీ ట్రాక్టర్ ఢీకొనడంతో తల పగిలింది. కుటుంబసభ్యులు మంచిర్యాలలోని మయూరి హాస్పిటల్కు తీసుకెళ్లగా కండిషన్ సీరియస్గా ఉండని డాక్టర్లు కరీంనగర్లోని భద్రకాళి హాస్పిటల్కు రెఫర్ చేశారు. అతడిని అంబులెన్స్లో తీసుకెళ్తుండగా కొంతమంది అంబులెన్స్ డ్రైవర్లు మధ్యలో కలుగజేసుకొని వారితో పాటు వెళ్లారు. శ్రీకాంత్ భార్య స్వప్న, కుటుంబీకులను తప్పుదారి పట్టించి భద్రకాళికి కాకుండా కెల్విన్ హాస్పిటల్కు తీసుకెళ్లారు.
అక్కడి డాక్టర్ల సూచన మేరకు హైదరాబాద్లోని యశోద హాస్పిటల్కు వెళ్తుండగా మళ్లీ అంబులెన్స్ డ్రైవర్లు కలుగజేసుకుని కామినేని హాస్పిటల్కు తీసుకెళ్లారు. మార్గ మధ్యలో ఉండగానే యాదగిరి అనే వ్యక్తి స్వప్నకు ఫోన్ చేసి కామినేని హాస్పిటల్లో డిస్కౌంట్ ఉంటుందని మాయమాటలు చెప్పాడు. 8న శ్రీకాంత్ బ్రెయిన్ డెత్ అయినట్టు డాక్టర్లు నిర్ధారించి జీవన్దాన్ ట్రస్టు ద్వారా ఆర్గాన్ డొనేషన్ చేయాలని పేషెంట్ కుటుంబీలను ఒప్పించి ఏడు అవయవాలు తీసుకున్నారు. ఇందుకుగాను వారికి రూ.3 లక్షలు ఇచ్చారు.
తూతూమంత్రంగా విచారణ....
శ్రీకాంత్ భార్య స్వప్న ఫిర్యాదుతో కేసు నమోదు చేసిన మంచిర్యాల టౌన్ పోలీసులు ఆర్గాన్ డొనేషన్ వ్యవహారంపై విచారణ చేపట్టారు. అప్పటి సీఐ బన్సీలాల్ కరీంనగర్లోని కెల్విన్ హాస్పిటల్కు, హైదరాబాద్లోని కామినేని హాస్పిటల్కు వెళ్లి ఎంక్వైరీ చేశారు. చివరకు అంబులెన్స్ డ్రైవర్లు కమీషన్ల కోసం శ్రీకాంత్ కుటుంబీలకును తప్పుదారి పట్టించారని, ఆర్గాన్ డొనేషన్కు డబ్బులు తీసుకున్నారని తప్పుడు ప్రచారం చేశారని తేల్చి ఐదుగురిని అరెస్టు చేశారు.
ఈ కేసులో సాంకేతిక ఆధారాలు, హైదరాబాద్లో వీరికి సహకరించిన వ్యక్తుల గురించి ఎంక్వైరీ చేయాల్సి ఉంటుందని డీసీపీ భాస్కర్ పేర్కొని నెలలు గడుస్తున్నా ఇంతవరకు ఈ కేసు ఊసే లేకపోవడం గమనార్హం. కెల్విన్ హాస్పిటల్ నిర్వాహకులు పలుమార్లు మంచిర్యాలకు వచ్చి పోలీసులను కలవడం, ఆపై కేసు ముందుకు సాగకపోవడంపై ఆప్పట్లోనే పలువురు అనుమానాలు వ్యక్తం చేశారు. ఆర్గాన్ డొనేషన్ తర్వాత హాస్పిటల్ వాళ్లు తమకు రూ.3లక్షలు ఇచ్చారని, ఈ వ్యవహారంలో లక్షలు చేతులు మారాయని శ్రీకాంత్ భార్య స్వప్న, అతడి బావమరిది బహిరంగంగా వెల్లడించినా ఆ దిశగా కేసు దర్యాప్తు జరగలేదు. ఈ నేపథ్యంలో సీబీఐ ఎంక్వైరీపై సర్వత్రా ఆసక్తి నెలకొంది.
