- వాటిని తొలగించడం ఆపాలి
- జన చైతన్య వేదిక సమావేశంలో వక్తలు
- వాటి వల్ల ప్రమాదమని శాస్త్రీయ ఆధారాలు లేవని వెల్లడి
హైదరాబాద్సిటీ, వెలుగు: కోనోకార్పస్ చెట్ల వల్ల ఎలాంటి ప్రమాదం లేదని, ఈ చెట్ల వల్ల పర్యావరణానికి ఎంతో మేలని సెంటర్ ఫర్ సెల్యులార్ అండ్ మాలిక్యులర్ బయాలజీ (సీసీఎంబీ) మాజీ డైరెక్టర్ మోహన రావు, యోగి వేమన యూనివర్సిటీ మాజీ వీసీ ఏఆర్ రెడ్డి అన్నారు. వాతావరణంలో ఎక్కువ కార్బన్డై అక్సైడ్ను తీసుకొనే మొక్కల్లో ఇవి ముందుంటాయని తెలిపారు. ఏ పరిస్థితుల్లో అయినా నిరంతరం పెరుగుతూ.. వాతావరణంలోని కార్బన్ డై అక్సైడ్ను తగ్గిస్తాయన్నారు. వీటి వల్ల ప్రమాదమని, శ్వాసకోశ వ్యాధులు వస్తాయనేది అపోహ మాత్రమేనని పేర్కొన్నారు.
ఏడాది పాటు ఈ చెట్లపై తాము పరిశోధన చేసి, వీటి రక్షణ కోసం పాటు పాడుతున్నామని తెలిపారు. మంగళవారం సోమాజిగూడ ప్రెస్ క్లబ్లో జన చైతన్య వేదిక ఆధ్వర్యంలో ‘కోనోకార్పస్ చెట్లను రక్షించుకుందాం’ అనే అంశంపై సమావేశం నిర్వహించారు. ఈ సమావేశానికి మోహన రావు, ఏఆర్ రెడ్డి హాజరై కోనోకార్పస్ చెట్ల పర్యావరణ ప్రయోజనాలను వివరించారు. ఈ చెట్ల ఆకులతో ఆరోగ్య ప్రయోజనాలున్నాయని శాస్త్రీయంగా పరిశోధించినట్లు మోహన రావు తెలిపారు. వాటి ఆకుల రసం డయాబెటిస్‌ను కొంత వరకు తగ్గించడంతో పాటు రోగనిరోధక శక్తిని పెంచుతుందని, గొంతు సమస్యలు, ఊపిరితిత్తుల వ్యాధులకు కూడా ఇది ఉపయోగపడుతుందని వివరించారు.
అలాగే, ఈ చెట్లు ఆక్సిజన్‌ను ఎక్కువ మోతాదులో విడుదల చేస్తాయని, పర్యావరణానికి ఎంతో మేలు చేస్తాయని పేర్కొన్నారు. ఏఆర్ రెడ్డి మాట్లాడుతూ.. కోనోకార్పస్ చెట్లు వాతావరణంలోని కార్బన్ డై ఆక్సైడ్ ను 20% నుంచి -30% అధికంగా తీసుకొనే సామర్థ్యం కలిగి ఉంటాయన్నారు. ఒక్క చెట్టు 6 వేల కిలోల కార్బన్ డై యాక్సైడ్ను తీసుకొని.. నీరు, ఆక్సిజన్ ను విడుదల చేస్తాయన్నారు. ప్రపంచవ్యాప్తంగా 3.04 ట్రిలియన్ చెట్లు ఉండగా, ఒక్కో వ్యక్తికి సగటున 422 చెట్లు ఉన్నాయన్నారు. కానీ, మన దేశంలో ఈ సంఖ్య కేవలం 28 మాత్రమేనని అన్నారు.
ఒక మనిషి జీవనానికి సంవత్సరానికి 740 కిలోల ఆక్సిజన్ అవసరమని, దీనికి ఏడు చెట్లు అవసరమవుతాయన్నారు. కాబట్టి, కోనోకార్పస్చెట్లు లేకుంటే సీఓ2 పెరిగే ప్రమాదం ఉందని అన్నారు. ఈ చెట్లను మేకలకు తినిపించినప్పుడు.. వాటి ఆరోగ్యం, పాల ఉత్పత్తి, జీవక్రియలో మెరుగుదల కనిపించిందని తెలిపారు. ఈ చెట్లను హైవేల వెంబడి నాటితే పర్యావరణానికి ఎటువంటి హాని జరగదని, గాలి కాలుష్యాన్ని తగ్గిస్తాయని వివరించారు.
శాస్త్రీయ పరిశీలన చేయాలి: జన చైతన్య వేదిక అధ్యక్షుడు లక్ష్మణ రెడ్డి
కోనోకార్పస్ చెట్లపై విపరీతమైన చెడు ప్రచారం జరిగిందని, ఈ అపోహలను నమ్మిన కొందరు రాజకీయ నాయకులు శాస్త్రీయ పరిశీలన లేకుండా వేల సంఖ్యలో చెట్లను నరికేశారని జన చైతన్య వేదిక అధ్యక్షుడు లక్ష్మణ్ ఆవేదన వ్యక్తం చేశారు. తెలంగాణ, ఆంధ్రప్రదేశ్ ప్రభుత్వాలు ఈ విషయంపై నిపుణుల కమిటీని ఏర్పాటు చేసి, శాస్త్రీయంగా నిర్ధారించాలన్నారు. వోల్టా చట్టాన్ని కచ్చితంగా అమలు చేయాలని ఆయన డిమాండ్ చేశారు. కార్యక్రమంలో పర్యావరణవేత్త బయ్యపురెడ్డి, వృక్షశాస్త్ర ప్రొఫెసర్‌ బీఎన్‌ రెడ్డి, జీవశాస్త్ర నిపుణులు గోపాలకృష్ణ పాల్గొన్నారు.
