కాళేశ్వరం ప్రాజెక్టు మొదలు.. మిషన్ కాకతీయ, మిషన్ భగీరథ, అంబేద్కర్ విగ్రహం, కలెక్టరేట్లు, సెక్రటేరియెట్ నిర్మాణం దాకా అన్నిట్లో గత బీఆర్ఎస్ సర్కార్ మొదట తక్కువ ధరకు కాంట్రాక్టర్లకు పనులు అప్పగించి ఆ తర్వాత అమాంతం అంచనా వ్యయాన్ని పెంచేసినట్లు ప్రస్తుత ప్రభుత్వం గుర్తించింది.
మొదట్లో టెండర్ దాఖలు చేసే టైమ్లో అంచనాలు తక్కువకు చూపడం.. ఆ తర్వాత మధ్యలో వాటిని సవరించడం.. పూర్తయ్యే సరికి ఖర్చు రెండు మూడింతలు కావడం వంటివి ప్రభుత్వం దృష్టికి వచ్చాయి. కమీషన్ల కోసమే కొన్ని పనుల అంచనా వ్యయాన్ని డబుల్, ట్రిపుల్ చేసినట్లు తేలింది. అయినవాళ్లకు కాంట్రాక్టులు కట్టబెట్టేందుకు రూల్స్ను కూడా గత పాలకులు బ్రేక్ చేసినట్లు ప్రస్తుత సర్కార్ గుర్తించింది. ఇటీవల ఐటీ, ఇండస్ట్రీస్ డిపార్ట్మెంట్పై రివ్యూలోనూ కొన్ని కంపెనీలకు గత సర్కార్ ప్రత్యేకంగా ఇచ్చిన ఇన్సెంటివ్లు, భూముల కేటాయింపుల్లోనూ అక్రమాలు జరిగినట్లు సీఎం రేవంత్ గుర్తించారు
రాయదుర్గం(మైండ్ స్పేస్) నుంచి శంషాబాద్ ఎయిర్పోర్టు వరకు 31 కిలోమీటర్ల మెట్రో కొత్త రూట్కు గత ప్రభుత్వం శంకుస్థాపన చేసింది. ఆ ప్రాజెక్ట్ డీపీఆర్లో రూ.4,650 కోట్లు అవుతుందని అంచనా వేశారు. అయితే ఈ రూట్ శంకుస్థాపనకు వచ్చేసరికి ఏకంగా రూ. 1,600 కోట్లు అంచనా వ్యయం పెరిగింది. దీని మొత్తం అంచనా వ్యయం రూ.6,250 కోట్లుగా చూపారు. అసలు సంబంధం లేని రూట్ను ఎంచుకోవడం ఏమిటి? ఆ ప్రపోజల్స్ అంతకు పెంచడం ఏమిటి? ఎవరికి కమీషన్లు పెంచేందుకు ఇట్ల చేశారు అన్న విమర్శలు మొదటి నుంచి ఉన్నాయి. ఈ పనులను సబ్ కాంట్రాక్టుల కోసం తనకు నచ్చినోళ్ల పేర్లను ఎల్ అండ్ టీకి గత ప్రభుత్వంలోని మున్సిపల్ శాఖ మంత్రి సూచించినట్లు ప్రస్తుత ప్రభుత్వం గుర్తించింది. కాంగ్రెస్ అధికారంలోకి రాగానే సీఎం రేవంత్ రెడ్డి ఈ ఎయిర్పోర్టు మెట్రో రూట్ను మార్చారు.
Also Read:-కేసీఆర్ హయాంలో సెక్రటేరియెట్ అట్లా..కలెక్టరేట్లు ఇట్లా
ఇక జీహెచ్ఎంసీతో పాటు మున్సిపాలిటీలు, ఆయా కార్పొరేషన్లలో చేపట్టిన ఫ్లైఓవర్లు, అండర్ గ్రౌండ్ డ్రైనేజీ, రోడ్ల నిర్మాణం, ఇతర స్ట్రీట్ లైట్స్ వంటి కాంట్రాక్టులన్నీ నాటి మున్సిపల్ శాఖ మంత్రి చెప్పినోళ్లకే దక్కేలా గత సర్కార్ నిర్ణయం తీసుకున్నట్లు ప్రభుత్వం దృష్టికి వచ్చింది. హైదరాబాద్లో ఫ్లైఓవర్ల నిర్మాణానికి టెండర్ల నిబంధనలు మార్చినట్లు తేలింది. పైగా టెండర్ను ఓ కంపెనీ దక్కించుకుంటే అందులోని పనులను పూర్తిగా సబ్ కాంట్రాక్టర్లు చేపట్టినట్లు వెల్లడైంది. గత ప్రభుత్వంలోని ఓ మంత్రి బావమ్మర్ది బినామీలు, ఆ మంత్రి పీఏ బినామీలు ఈ సబ్ కాంట్రాక్ట్ పనులు చేపట్టినట్లు ప్రస్తుత ప్రభుత్వం గుర్తించింది.
