- చిన్న చేపలకు పెరిగిన డిమాండ్
- రవ్వ, బొచ్చ రకాలకు కేజీ రూ.200
- కోల్కత్తా మార్కెట్ కు ఎగుమతులు బంద్
- హైదరాబాద్, ఏపీ నుంచి చేపలు దిగుమతి
నల్గొండ, వెలుగు : నాన్వెజ్ ప్రియులు బాగా ఇష్టపడే కొర్రమీను చేపలకు మార్కెట్లో డిమాండ్ పెరిగింది. చెరువులు ఎండిపోవడంతో మార్కెట్లో చేపలకు కరువొచ్చింది. దీంతో హైదరాబాద్, ఏపీ నుంచి చేపలు దిగుమతి చేసుకోవాల్సి వస్తోంది. నల్గొండలో నిత్యం రద్దీగా కనిపించే పానగల్లు, ప్రకాశం బజార్మార్కెట్లు వెలవెలబోతున్నాయి.
నల్గొండ జిల్లాలోని చుట్టుపక్కల చెరువులన్నీ ఎండిపోవడంతో ఇతర ప్రాంతాల నుంచి చేపలను తీసుకొచ్చి అమ్ముతున్నారు. దీంతో రేట్లు భారీగా పెరిగాయి. కొర్రమీను కేజీ రూ.600 కాగా, రవ్వ, బొచ్చ చేపలు కేజీ రూ.200 దాటింది. మార్కెట్లో రూ.100కే దొరికే జల్లలు, రామ చందమామలు, పరకలు ధరలు ఏకంగా రూ.200కు పెంచారు. రవ్వ, బొచ్చ దొరక్క పోవడంతో జల్లలు, పరకలకు డిమాండ్ పెరిగింది.
బిజినెస్ పడిపోయింది..
గత నెల రోజుల నుంచి చేపల మార్కెట్లో బిజినెస్ భారీగా పడిపోయిందని వ్యాపారులు చెబుతున్నారు. ఆదివారం వస్తే రూ.లక్ష జరిగే వ్యాపారం ఇప్పుడు రూ.30, 40 వేలకు మించడం లేదు. రూ.30, 40 వేలు అమ్మే చిన్న, చితకా వ్యాపారులు మరింత గడ్డు పరిస్థితి ఎదుర్కొంటున్నారు. సండే రోజు రూ.5, 6 వేలకు మించి వ్యాపారం జరగడం లేదు. రవ్వలు, బొచ్చలు మార్కెట్లోకి రాక రెండు వారాలు దాటింది. హైదరాబాద్, ఆంధ్రా నుంచి చేపలు దిగుమతి చేసుకోవాల్సి రావడంతో రేటు గిట్టుబాటు కావట్లేదు. దీంతో గత్యంతరం లేక రేట్లు పెంచాల్సి వస్తోందని పానగల్లు చేపల వ్యాపారి శంకర్ 'వెలుగు'తో చెప్పారు.
కోల్ కత్తా బిజినెస్ బంద్..
లోకల్అవసరాలకు సైతం చేపలు దొరక్క పోవడంతో కోల్కత్తాకు ఎగుమతులు కూడా బంద్ చేశారు. ప్రతి వారం జిల్లా కేంద్రం నుంచి నాలుగైదు టన్నుల చేపలు కోల్కత్తాకు ఎగుమతి చేస్తుంటారు. ఎగుమతులతో ప్రతి వారం నల్గొండలోనే రూ.10 లక్షల బిజినెస్ నడుస్తుంది. రెస్టారెంట్లు, బార్అండ్ రెస్టారెంట్లలో లభించే అపోల్ ఫిష్ కూడా దొరకడం లేదు. టైగర్ రొయ్యలు మాత్రం వస్తున్నాయి.
ఎండిపోయిన చెరువులు..
నల్గొండ జిల్లాలోని జీయెడవల్లి, కనగల్, మిర్యాలగూడ చెరువుల నుంచి భారీగా చేపలు వచ్చేవి. నాగార్జున సాగర్రిజర్వాయర్లో నీటిమట్టం అడుగంటిపోవడంతో దాని దిగువన ఉండే ఏఎమ్మార్పీ పరిధిలోని చెరువులు నీళ్లు లేక నెర్రలు బారాయి. నాగార్జునసాగర్ఆయకట్టు ప్రాంతంలోని కోదాడ, హుజూర్నగర్లో అక్కడకక్కడ మాత్రమే చెరువుల్లో నీళ్లు కనిస్తున్నాయి. హైదరాబాద్, ఆంధ్రా, కోదాడ, హుజూర్నగర్నుంచే నల్గొండకు చేపలు తెచ్చుకోవాల్సి వస్తోంది.
