- రూ. 55కోట్లతో బీఆర్ఎస్ సర్కార్ నిర్మించిన కలెక్టరేట్
- గోడలకు చెమ్మ, రాలుతున్న పెయింటింగ్
భద్రాద్రికొత్తగూడెం, వెలుగు : గత బీఆర్ఎస్ సర్కార్ నిర్మించిన ఇంటిగ్రేటెడ్ కలెక్టరేట్ (ఐడీఓసీ) బిల్డింగ్ రెండున్నరేండ్లకే పగుళ్లు తేలింది. పలు చోట్ల గోడలకు చెమ్మ వస్తోంది. పెయింటింగ్ రాలిపోతొంది. దాదాపు రూ. 55 కోట్లతో నిర్మించిన కలెక్టరేట్ బిల్డింగ్ నిర్మాణంలో లోపాలు ఒక్కొక్కటికి వెలుగులోకి వస్తున్నాయి. పగుళ్లు, నిమ్ము, రాలుతున్న పెయింటింగ్ జిల్లాలోని లక్ష్మీదేవిపల్లి – పాల్వంచ మండలాల మధ్య గత బీఆర్ఎస్ గవర్నమెంట్ దాదాపు రూ. 55కోట్లతో ఇంటిగ్రేటెడ్ కలెక్టరేట్ కాంప్లెక్స్తోపాటు కలెక్టర్, అడిషనల్ కలెక్టర్ల క్వార్టర్లను ఆర్అండ్బీ శాఖ ఆధ్వర్యంలో నిర్మించారు.
2022 జనవరి లో అప్పటి సీఎం కేసీఆర్ ఇంటిగ్రేటెడ్ కలెక్టరేట్ను ఆర్భాటంగా ప్రారంభించారు. నిర్మాణం జరుగుతున్న టైంలో బిల్డింగ్ను పరిశీలించిన అప్పటి కలెక్టర్ అనుదీప్ నాసిరకం పనులపై ఆగ్రహం వ్యక్తం చేశారు. క్వాలిటీకి ప్రాధాన్యం ఇవ్వాలని ఆదేశించినా ఇష్టారాజ్యంగా పనులు చేపట్టడం వల్లే పగుళ్లు వస్తున్నాయి.
ఇదిలా ఉండగా ఇటీవలి కాలంలో కురుస్తున్న వానలతో బిల్డింగ్ నిర్మాణం డొల్ల తనం బయట పడుతోంది. గ్రౌండ్ ఫ్లోర్లోని పైకప్పుకు భారీగా పగుళ్లు కనిపిస్తున్నాయి. కలెక్టర్ ఆఫీస్ సమీపంలోని కాంపౌండ్ వాల్కు పగుళ్లు ఏర్పడ్డాయి. పలు చోట్ల గోడలకు చెమ్మ వస్తోంది. పెయింటింగ్ కూడా రాలిపోతుంది. స్లాబ్ల మధ్య సరైన జాయింట్ చేయకపోవడంతో వానపడితే పై కప్పు నుంచి కురుస్తుంది. పై నుంచి వాననీరు పడుతుండటంతో ఆఫీసర్లతో పాటు కలెక్టరేట్కు వచ్చే ప్రజలు ఇబ్బందులు పడ్తున్నారు.
పరిశీలించి చర్యలు చేపడతాం..
కలెక్టరేట్కు వచ్చిన పగుళ్లను పరిశీలిస్తాం. కొన్ని చోట్ల సరైన సెటింగ్ కాకపోతే ప్లాస్టర్ ఆఫ్ ప్యారీస్ పెచ్చులు ఊడే అవకాశాలున్నాయి. పగుళ్ల తీరును పరిశీలిస్తాం. గోడలకు చెమ్మ రావడం, స్లాబ్ ల మధ్య జాయింట్ నుంచి వాన నీరు లీకేజీలను పరిశీలించి అవసరమైన చర్యలు తీసుకుంటాం.
నాగేశ్వరరావు, ఆర్అండ్బీ డీఈ, భద్రాద్రికొత్తగూడెం
