యాదాద్రి జిల్లాలో ప్రైవేట్ ​ఆస్పత్రులకి కాన్పుకొస్తే.. కోసుడే

• ప్రైవేట్​ ఆస్పత్రుల కాసుల కక్కుర్తి 
• నార్మల్​ డెలివరీలకు బదులు సీజేరియన్లు 
• ప్రభుత్వాస్పత్రుల్లోనూ పెరిగిన ఆపరేషన్ల సంఖ్య

యాదాద్రి, వెలుగు : ప్రైవేట్ ​ఆస్పత్రుల వైద్యులు కాసుల కోసం కక్కుర్తి పడి నార్మల్​ డెలివరీలకు బదులు సిజేరియన్లు చేస్తున్నారు. నెలలు నిండిన గర్భిణి ఆస్పత్రికి వస్తే చాలు ఆపరేషన్ చేయాల్సిందేనని.. లేకుంటే తల్లి, బిడ్డకు ప్రాణాపాయం అంటూ గర్భిణుల కడుపును నిలువున కోసి బిడ్డను బయటకు తీస్తున్నారు. ప్రభుత్వాస్పత్రిలోనూ కొందరు డాక్టర్లకు ఇదే జాడ్యం అంటుకుంది. నార్మల్​కోసం వెయింట్​ చేయడమెందుకని ఆపరేషన్లు చేస్తున్నారు. 

ఐదేండ్లలో 30,488..

ట్రీట్​మెంట్ కోసం గర్భిణులు గవర్నమెంట్ ఆస్పత్రుల్లో పేర్లు నమోదు చేయించుకున్నా.. డెలివరీ టైమ్​కు ప్రైవేట్ కు వెళ్తున్నారు. జిల్లాలోని అన్ని ప్రభుత్వ, ప్రైవేట్ ఆస్పత్రుల్లో 2020 ఏప్రిల్ నుంచి ఇప్పటివరకు 42,005 డెలివరీలు అయ్యారు. వీరిలో 30,488 మందికి ఆపరేషన్లు చేసి బిడ్డలను బయటకు తీశారు. ఏవరేజ్​గా ప్రతి 100 మందిలో 72 మందికి ఆపరేషన్లు చేయగా, 28 మంది నార్మల్​డెలివరీ అవుతున్నారు. నార్మల్​డెలివరీ అయితేనే తల్లీబిడ్డ ఆరోగ్యంగా ఉంటారని, అందుకు నార్మల్ డెలివరీలను పెంచాలని హెల్త్​ డిపార్ట్​మెంట్ ప్రచారం చేస్తోంది. కానీ ఆ దిశగా పనిచేయకపోవడంతో ఫలితం కన్పించడం లేదు. 

ఏటీఎంలుగా గర్భిణులు..

ట్రీట్​మెంట్​ కోసం వచ్చిన గర్భిణులను కొందరు ప్రైవేట్​డాక్టర్లు ఏటీఎంగా భావిస్తున్నట్టుగా కన్పిస్తోంది. రకరకాల టెస్ట్​లు చేస్తూ డబ్బులు దండుకుంటున్నారు. డెలివరీ సమయం దగ్గర పడుతుండడంతో భయాందోళనకు గురిచేస్తున్నారు. దీంతో పేరెంట్స్​ఆపరేషన్​కు ఓకే చెప్పడం, గర్భిణులు కూడా అందుకు సిద్ధపడుతున్నారు. ఒక్కో ఆపరేషన్​కు ఆస్పత్రి స్థాయిని బట్టి రూ.30 వేల నుంచి రూ.80 వేల వరకు తీసుకుంటున్నారు. ఆపరేషన్​ చేయించుకున్న మహిళలు అనారోగ్య సమస్యలు ఎదుర్కోవాల్సి వస్తోంది. ఐదేండ్లలో ప్రైవేట్ ఆస్పత్రుల్లో 22,029 మంది డెలివరీ కాగా, వీరిలో 2,644  మంది నార్మల్ డెలివరీలు, 19,385 మందికి ఆపరేషన్లు అయ్యాయి. ఈ లెక్కన ప్రైవేట్ ఆస్పత్రుల్లో ప్రతి 100 మందిలో 88 మందికి ఆపరేషన్లు చేస్తున్నారు. 

ALSO READ : ఆర్‌‌ఎఫ్‌‌సీఎల్‌‌ యూరియా అమ్ముడుపోతలే..కేంద్ర సబ్సిడీ వస్తలే !

ప్రభుత్వాస్పత్రులోనూ..

ప్రభుత్వాస్పత్రుల్లోనూ గతంతో పోలిస్తే ఆపరేషన్ల సంఖ్య పెరిగింది. 100 మందిలో 56 మందికి ఆపరేషన్లు చేస్తున్నారు. నార్మల్​డెలివరీ చేయాలంటే.. ఎక్కువ సమయం కేటాయించాల్సి ఉంటున్నందున ఆపరేషన్​ చేస్తున్న సంఘటనలూ ఉన్నాయి. కొందరు గర్భిణులు కూడా నొప్పులు తట్టుకోలేక ఆపరేషన్ చేయాలని డాక్టర్లపై ఒత్తిడి తెస్తున్నారు. ఐదేండ్లలో 19,976 మంది డెలివరీ కాగా, 8,873 మంది నార్మల్, 11,103  మందికి ఆపరేషన్లు చేశారు. 

ప్రభుత్వ ఆస్పత్రులో..

సంవత్సరం    డెలివరీ    నార్మల్​    సిజేరియన్    2020-21    5501    2241    3260
2021-22    5642    2197    3445    
2022-23    3551    1536    2015    
2023-24    3366    1828    1538    
2024-25    1916    1071    845    

ప్రైవేట్​ఆస్పత్రుల్లో..

2020-21    5093    546    4547
2021-22    5557    550    5007
2022-23    4672    533    4139
2023-24    3804    643    3161
2024-25    2903    372    2531