చత్తీస్గఢ్ కరెంట్ ఒప్పందానికి .. ఈఆర్సీ ఆమోదం అబద్ధం

కేవలం ప్రపోజల్కే ఒప్పుకుంది: విద్యుత్ జేఏసీ అధ్యక్షుడు రఘు
కాంపిటేటివ్ బిడ్డింగ్కు వెళ్లకపోవడంతో రాష్ట్రానికి వేల కోట్ల నష్టం
ఒప్పందం మేరకు చత్తీస్గఢ్
కరెంట్ కూడా సప్లై చేయలేదని వెల్లడి
గత బీఆర్ఎస్ ప్రభుత్వ చర్యలతో
ట్రాన్స్‌‌కో, జెన్‌‌కోకు రూ.81 వేల కోట్ల
అప్పులు: టీజేఎస్ చీఫ్ కోదండరాం
పవర్ కమిషన్ ముందు ఇరువురి వాదనలు

హైదరాబాద్, వెలుగు: గత బీఆర్ఎస్ ప్రభుత్వ హయాంలో చత్తీస్గఢ్ తో చేసుకున్న కరెంట్ కొనుగోలు ఒప్పందానికి ఎలక్ట్రిసిటీ రెగ్యులేటరీ కమిషన్ (ఈఆర్సీ) నుంచి ఆమోదం లభించదలేని విద్యుత్ జేఏసీ అధ్యక్షుడు రఘు తెలిపారు. దీనికి సంబంధించి నాటి ప్రభుత్వం పెట్టిన ప్రపోజల్స్కు మాత్రమే ఈఆర్సీ ఆమోదం లభించిందని, అగ్రిమెంట్కు ఇంకా ఆమోదం లభించలేదని చెప్పారు. చత్తీస్గఢ్తో కరెంటు కొనుగోలు ఒప్పందాలు, యాదాద్రి, భద్రాద్రి ప్లాంట్ల నిర్మాణాల్లో అక్రమాలు జరిగాయనే ఆరోపణలపై విచారణ చేపట్టేందుకు ప్రభుత్వం జస్టిస్ నర్సింహారెడ్డితో జ్యుడీషియల్ కమిషన్ ఏర్పాటు చేసింది. అయితే ఇటీవల కమిషన్కు లేఖ రాసిన కేసీఆర్.. చత్తీస్గఢ్తో చేసుకున్న విద్యుత్ కొనుగోలు ఒప్పందాన్ని ఈఆర్సీ ఆమోదించిందని, ఇక న్యాయ విచారణ అవసరమే లేదని, ఈ విషయంలో కమిషన్ చైర్మన్కు విచారణార్హత లేనందున ఆయన తప్పుకోవాలని అందులో పేర్కొన్నారు.

ఈ నేపథ్యంలో కేసీఆర్ లెటర్పై కమిషన్ సమీక్ష జరుపుతున్నది. కేసీఆర్ ప్రస్తావించిన అంశాలను వాస్తవాలతో సరిపోల్చే క్రమంలో కమిషన్ చైర్మన్జస్టిస్ నర్సింహారెడ్డి పవర్ పర్చేజ్ అగ్రిమెంట్లు, డాక్యుమెంట్లను క్షుణ్ణంగా అధ్యయనం చేయడంతో పాటు సంబంధిత వ్యక్తులతోనూ మాట్లాడుతున్నారు. ఈ క్రమంలో విద్యుత్ జేఏసీ అధ్యక్షుడు రఘు, టీజేఎస్ చీఫ్ ప్రొఫెసర్ కోదండరాం మంగళవారం కమిషన్ ముందు తమ వాదనలు వినిపించారు. పవర్ పర్చేజ్అగ్రిమెంట్లు, పవర్ ప్లాంట్ల నిర్మాణం జరిగిన తీరుతెన్నులపై రఘు పవర్ పాయింట్ప్రజంటేషన్ఇచ్చారు. చత్తీస్గఢ్తో చేసుకున్న కరెంట్ ఒప్పందానికి ఈఆర్సీ ఆమోదం లభించలేదని ఆయన ఆధారాలతో సహా బయటపెట్టారు.

చత్తీస్గఢ్తో ఒప్పందం వల్ల వేల కోట్ల నష్టం: రఘు

చత్తీస్గఢ్తో విద్యుత్ ఒప్పందం వల్ల రాష్ట్రానికి రూ.వేల కోట్ల నష్టం జరిగిందని విద్యుత్ జేఏసీ అధ్యక్షుడు రఘు తెలిపారు. జస్టిస్ నర్సింహారెడ్డి కమిషన్ ముందు తన వాదనలు వినిపించిన ఆయన.. అనంతరం బీఆర్కే భవన్ వద్ద మీడియాతో మాట్లాడారు. చత్తీస్గఢ్తో జరిగిన ఒప్పందానికి ఈఆర్సీ ఆమోదం లభించలేదని రఘు తెలిపారు. ఇరు రాష్ట్రాల డిస్కంలు మాత్రమే ఎంవోయూ చేసుకున్నాయని చెప్పారు. నాటి ప్రభుత్వం కాంపిటేటివ్ బిడ్డింగ్కు వెళ్లకపోవడంతో భారీగా నష్టం జరిగిందన్నారు. ‘‘చత్తీస్గఢ్తో వెయ్యి మెగావాట్ల సరఫరాకు ఒప్పందం జరిగితే, ఆ రాష్ట్రం ఏనాడూ ఒప్పందం ప్రకారం పూర్తి స్థాయిలో కరెంట్ సప్లై చెయ్యలేదు. దీంతో ప్రత్యామ్నాయంగా విద్యుత్ కొనుగోళ్లు చేపట్టాల్సి వచ్చింది. ఫలితంగా రూ.2,600 కోట్ల నష్టం వాటి ల్లింది” అని వివరించారు. భద్రాద్రి, యాదాద్రి విద్యుత్ కేంద్రాలపై తన వద్ద ఉన్న సమచారాన్ని కమిషన్కు అందజేశానని తెలిపారు. ‘‘మూడేండ్లలో పూర్తి కావాల్సిన యాదాద్రి పవర్ ప్లాంట్ తొమ్మిదేండ్లయినా పూర్తి కాలేదు. భద్రాద్రి థర్మల్ పవర్ ప్లాంట్లో సబ్ క్రిటికల్ టెక్నాలజీ అనేది రాష్ట్ర ప్రభుత్వ చాయిస్ కాదు. రాష్ట్ర ప్రభుత్వంపై సబ్ క్రిటికల్ టెక్నాలజీని బీహెచ్ ఈఎల్ రుద్దింది.

2010లో తయారు చేసిన సబ్ క్రిటికల్ టెక్నాలజీ టర్బైన్లు, బాయిలర్లను ఆరేండ్ల తర్వాత ప్రభుత్వంపై బలవంతంగా బీహెచ్ఈఎల్ రుద్దింది. మరోవైపు పర్యావరణ అంశాలను లెక్క చెయ్యకుండా భద్రాద్రి ప్లాంట్ మొదలుపెట్టారు. గోదావరిలో వరద ఎక్కువైతే పవర్ ప్లాంట్పై ప్రభావం పడుతుంది. ఇందులో సాంకేతిక పరమైన అంశాలనూ పరిగణనలోకి తీసుకోలేదు. ఇక యాదాద్రి పవర్ ప్లాంట్ బొగ్గు ఉత్పత్తి ప్రాంతానికి దూరంగా ఉండడంతో రవాణా చార్జీల భారం పడుతుంది” అని తెలిపారు. ‘‘2016లోనే సమస్యలను ప్రభుత్వం దృష్టికి తీసుకెళ్లాం. మా అభ్యంతరాలను రెగ్యులేటరీ కమిషన్ దృష్టికి కూడా తీసుకెళ్లాం. అప్పుడే కమిషన్ పీపీఏ చేయమంటే ఏడేండ్లుగా చెయ్యలేదు. చత్తీస్గఢ్ ఒప్పందం వల్ల మూడు రకాల నష్టాలు జరిగాయి. పీజీసీఎల్తో కారిడార్ ఒప్పందం చేసుకుని కరెంటు తీసుకోకపోవడం వల్ల రూ.635 కోట్ల నష్టం వచ్చింది. భద్రాద్రి ప్లాంట్తో 25 ఏండ్లలో రూ.9వేల కోట్లు, యాదాద్రి ప్లాంట్తో ఒక్క బొగ్గు రవాణా ద్వారానే రూ.1,600 కోట్లకు పైగా నష్టం జరుగుతుంది” అని వివరించారు.

కేంద్రం చెప్పినా కేసీఆర్ వినలేదు: కోదండరాం

బీఆర్ఎస్ ప్రభుత్వ హయాంలో తీసుకున్న తప్పుడు నిర్ణయాలన్నింటినీ కేసీఆర్ సమర్థించుకునే ప్రయ త్నం చేస్తున్నారని టీజేఎస్ చీఫ్ కోదండరాం అన్నారు. జస్టిస్ నర్సింహారెడ్డి కమిషన్ ముందు తన వాదనలు వినిపించిన ఆయన.. అనంతరం బీఆర్కే భవన్ వద్ద మీడియాతో మాట్లాడారు. గత బీఆర్ఎస్ సర్కార్ అభివృద్ధి పేరుతో నిబంధనలను ఉల్లంఘించిందని కోదండరాం అన్నారు. ‘‘కేంద్ర ప్రభుత్వం చెప్తున్నా వినకుండా కేసీఆర్ తొందరపాటు నిర్ణయం తీసుకుని, చత్తీస్గఢ్తో విద్యుత్ ఒప్పందం చేసుకున్నారు. ప్రజాసంక్షేమం కోసమే ప్రభుత్వం తన అధికారాలను ఉపయోగించాలి. అభివృద్ధి అంటే ఒకరిద్దరికి లాభం చేయడం కాదు. గత ప్రభుత్వ తొందరపాటు చర్యల వల్ల ట్రాన్స్‌‌కో, జెన్‌‌కోలకు రూ.81 వేల కోట్ల అప్పులు అయ్యాయి. పోయినేడాది వరదలు వస్తే భద్రాద్రి ప్లాంటులో విద్యుత్ ఉత్పత్తిని నిలిపివేయాల్సి వచ్చింది. పోలవరం పూర్తయినా, భవిష్యత్తులో గోదావరి వద్ద నీటి మట్టం పెరిగినా భద్రాద్రి ప్లాంటును కాపాడుకోగలమా? కనీస జాగ్రత్తలు తీసుకోకుండా భద్రాద్రి ప్లాంట్ నిర్మించారు” అని అన్నారు. గత ప్రభుత్వ నిర్ణయాల వల్ల జనం ఇబ్బందులు పడే పరిస్థితి వచ్చిందని, దీనికి బాధ్యులైన వారిపై క్రిమినల్ చర్యలకు వెనుకాడవద్దని సూచించారు. ‘‘ఆనాడు కేసీఆర్ ఖర్చులు తగ్గించే ప్రయత్నం చేయలేదు. కొద్దిమందికే లాభం చేకూరే విధంగా నిర్ణయాలు తీసుకున్నారు. ఇప్పుడేమో తప్పించుకునే ప్రయత్నం చేస్తున్నారు” అని కోదండరాం అన్నారు.