ఎత్తొండ సొసైటీలో గోల్మాల్ డీపీవో రిపోర్ట్లో నిగ్గుతేలిన నిజాలు

రూ.8.70 కోట్ల విలువైన సీఎంఆర్ వడ్లు మాయం
ఫర్టిలైజర్ అమ్మకాల్లో రూ.44.58 లక్షల తేడా
రూ.2.12 కోట్ల బిజినెస్ రికవరీలో అశ్రద్ధ

కోటగిరి/నిజామాబాద్, వెలుగు: రాష్ట్ర స్థాయి గుర్తింపు పొందిన నిజామాబాద్ జిల్లాలోని ఎత్తొండ పీఏసీఎస్ అవినీతి, అక్రమాల్లో మునిగిపోయింది. ఆరు నెలలుగా నిర్వహించిన విచారణలో తేలిన అక్రమాల వివరాలను డీసీవో శ్రీనివాస్ పాలకవర్గానికి పంపారు. మాజీ ప్రెసిడెంట్ అశోక్పటేల్, సెక్రటరీ సంతోష్ పై క్రిమినల్ కేసు నమోదు చేయించాలని రిపోర్టులో సూచించారు. ఈ క్రమంలో శుక్రవారం సొసైటీ ఇన్చార్జిప్రెసిడెంట్ రామదాసు అధ్యక్షతన సంఘ సభ్యులు ప్రత్యేక సమావేశం నిర్వహించి ఈ వ్యవహారంపై చర్చించారు.

డీసీవో రిపోర్టు ప్రకారం..

సీఎంఆర్ కింద గవర్నమెంట్ నుంచి తీసుకున్న రూ.8.70 కోట్ల విలువైన వడ్లు సొసైటీ నుంచి మాయమయ్యాయి. మాజీ ప్రెసిడెంట్ ఆర్.అశోక్పటేల్, సెక్రటరీ సీహెచ్.సంతోష్తో పాటు మేనేజింగ్ కమిటీ సభ్యులంతా దీనికి బాధ్యులు. 11 శాతం వడ్డీతో రూ.8.70 కోట్ల సొమ్ము వసూలు చేయాలి.

సొసైటీ జనరల్ బాడీ అప్రూవల్ లేకుండా రూ.3.82 కోట్లను వివిధ అవసరాల కోసం డైవర్ట్ చేయడం నిబంధనల ఉల్లంఘన కిందకే వస్తుంది. పాలక సభ్యుల పర్యవేక్షణ లోపం కారణం.

2019లో 6 వేల మెట్రిక్ టన్నుల గోదాం నిర్మాణం, పారా బాయిల్డ్ రైస్ మిల్లు కోసం రూ.1.33 కోట్లకు ఆమోదం పొంది, రూ.17.28 లక్షలు అదనంగా ఖర్చు చేయడం చెల్లదు.

సొసైటీలో 13 మంది రెగ్యులర్ ఎంప్లాయీస్, 8 మంది టెంపరరీ ఉద్యోగుల నియామకంతో ఖర్చు పెరిగింది. వీరి సంఖ్యను తగ్గించి ఖర్చును కంట్రోల్ చేయాలి.

సొసైటీకి బయటి వ్యక్తులు చెల్లించాల్సిన రూ.2.12 కోట్ల వసూలులో ఉద్దేశపూర్వకంగా నిర్లక్ష్యం చేశారని, వారందరికీ వెంటనే నోటీసులు పంపాలని సూచించారు.

ఫర్టిలైజర్ వ్యాపారంలో రూ.44.58 లక్షల విలువైన స్టాక్ తేడా ఉంది. దీనికి గల కారణాలు తెలియజేయాలి.
2019 నుంచి 2024 వరకు పొంతన లేని లెక్కలు చూపి వాడుకున్న రూ.6.32 లక్షలను మాజీ ప్రెసిడెంట్ అశోక్పటేల్, సెక్రటరీ సంతోష్ నుంచి 11 శాతం వడ్డీతో వసూలు చేయాలి. సరైన కారణాలు లేకుండా ప్రెసిడెంట్ హోదాలో అశోక్పటేల్ డ్రా చేసిన రూ.1.20 లక్షలు, సేల్స్మెన్ దేవరాజ్ డ్రా చేసిన రూ.40,605ను 11శాతం వడ్డీతో కలిపి వసూలు చేయాలి.

కిరాణ, జనరల్ స్టోర్ నడిపి రూ.2.65 లక్షల నష్టపోవడానికి కారణమైన మాజీ ప్రెసిడెంట్, సెక్రటరీ, సేల్స్మెన్లు శ్రీధర్, హన్మంతరావు, మమత, ఫణికుమార్ నుంచి 11 శాతం ఇంట్రెస్ట్తో డబ్బు వసూలు చేయాలి.

నివేదికను ట్రాన్స్లేట్ చేయించాకే..

సొంతంగా రైస్, ఇతర బిజినెస్లతో ఎత్తొండ సొసైటీ భారీగా ఇన్కం పొంది స్టేట్లో గుర్తింపు పొందింది. దీనికి నాలుగేండ్ల కింద ప్రెసిడెంట్గా ఎన్నికైన అశోక్పటేల్పై తీవ్రమైన అవినీతి ఆరోపణలు రావడంతో ఆరు నెలల కింద పదవికి రిజైన్ చేశారు. అప్పటి నుంచి సొసైటీ వైస్ ప్రెసిడెంట్ ఇన్చార్జిగావ్యవహరిస్తున్నారు.

సొసైటీ అక్రమాలపై ఫిర్యాదులు రావడంతో డీసీవో శ్రీనివాస్ విచారణ నిర్వహించి నివేదికను పాలక సభ్యులకు పంపారు. శుక్రవారం నిర్వహించిన మీటింగ్కు 12 మంది పాలక సభ్యులు, రైతులు అటెండ్ కాగా గందరగోళం జరిగింది. పలువురు కోపంతో సెక్రటరీ సంతోష్ను కొట్టడానికి వెళ్లగా, తనకేమీ తెలియదని ఆయన చెప్పాడు. ఇంగ్లీష్లో ఉన్న రిపోర్టును పూర్తిగా స్టడీ చేసి చర్చలు ప్రారంభించాలని నిర్ణయించారు.