- మార్గదర్శకాలు సిద్ధం చేయాలని కేబినెట్ భేటీలో నిర్ణయం
- రేషన్ కార్డులు, రైతు భరోసా, విద్యుత్ కమిషన్ రిపోర్ట్పైనా చర్చ
- అప్పులపై ప్రతిపక్షం చేసే తప్పుడు ప్రచారాన్ని తిప్పికొట్టేందుకు రెడీ
హైదరాబాద్, వెలుగు: అసెంబ్లీ కమిటీ హాల్లో సోమవారం సాయంత్రం సీఎం రేవంత్ రెడ్డి అధ్యక్షతన కేబినెట్ సమావేశమైంది. భూమిలేని నిరుపేద కూలీలకు రూ.6 వేలు మొదటి విడత కింద ఇచ్చే సాయంపై ఇందులో చర్చించారు. ఈ సాయంపై లబ్ధిదారుల ఎంపికకు మార్గదర్శకాలు సిద్ధం చేయాలని కేబినెట్లో నిర్ణయించినట్లు తెలిసింది. భూమి లేని నిరుపేద కూలీలకు ఏడాదికి రూ.12 వేలు ఇవ్వాలని ప్రభుత్వం భావిస్తున్నది. తొలివిడతగా రూ. 6 వేలు ఈ నెల 28న పంపిణీ చేయనుంది. దీనిపై కేబినెట్లో చర్చించారు. కొత్త రేషన్ కార్డుల అంశంపైనా చర్చించినట్లు సమాచారం. అసెంబ్లీలో ప్రధాన ప్రతిపక్షం అనుసరిస్తున్న తీరుపైనా కేబినెట్లో చర్చించారు.
సభకు విఘాతం కల్పించేలా వ్యవహరిస్తే.. అధికార పక్షం తరఫున గట్టిగా బదులివ్వాలని నిర్ణయించారు. అప్పులపైన బీఆర్ఎస్ సభ్యులు తప్పుడు ప్రచారం చేయడమే కాకుండా.. డిప్యూటీ సీఎం భట్టికి ప్రివిలేజ్ మోషన్ ఇవ్వడంపై కేబినెట్లో చర్చించినట్లు తెలిసింది. అప్పులపైనా, గత ప్రభుత్వ విధ్వంసంపైనా మరోసారి అసెంబ్లీ వేదికగా వెల్లడించాలనే అభిప్రాయానికి కేబినెట్ వచ్చింది. రైతు భరోసాపై కేబినెట్ సబ్ కమిటీ ఇచ్చిన రిపోర్ట్పైనా మంత్రివర్గ సమావేశంలో చర్చించినట్లు సమా చారం. ఇక దాదాపు 4 గంటలు సాగిన కేబినెట్ భేటీలో ఫార్ములా ఈ రేస్ అంశమే కాకుండా విద్యుత్ కమిషన్ రిపోర్ట్పైనా కొంత చర్చించినట్లు తెలిసింది.
