- బకాయిలు కట్టేంత వరకు ఆస్తులు అమ్మవద్దని మిల్లర్లకు హైకోర్టు ఆదేశం
- లీజ్దారు, ఓనర్ ఇద్దరు బాధ్యులేనని స్పష్టీకరణ
- చర్యలపై స్టేట్ రికవరీ కమిటీదే తుది నిర్ణయం
నాగర్ కర్నూల్, వెలుగు: వరిధాన్యాన్ని మిల్లింగ్ చేసి సీఎంఆర్ అందించాల్సిన రైస్ మిల్లర్ల బకాయిలు పెరగడంతో ప్రభుత్వం నోటీసులు ఇచ్చి క్రిమినల్ కేసులు పెడుతోంది. బకాయిలు రూ. కోట్లల్లో పైగా పేరుకుపోవడంతో మిల్లర్లపై సివిల్ సప్లై అధికారులు ఆర్ఆర్ యాక్ట్ కింద కేసులు నమోదు చేస్తున్నారు. సీఎంఆర్ బకాయిపడిన మిల్లర్లపై ప్రభుత్వం కఠిన చర్యలకు దిగుతోంది. దీంతో రైస్ మిల్లర్లు హైకోర్టును ఆశ్రయిస్తున్నారు. తమపై చర్యలు తీసుకోకుండా ప్రభుత్వానికి ఆదేశాలివ్వాలంటూ న్యాయస్థానాన్ని వేడుకుంటున్నారు. మిల్లర్ల పిటిషన్పై విచారణ జరిపిన న్యాయస్థానం ప్రభుత్వ చర్యలను తాత్కాలికంగా నిలిపివేస్తూనే మిల్లర్లు తమ ఆస్తులు అమ్ముకోరాదని ఆదేశాలిచ్చింది. సీఎంఆర్ బకాయిల రికవరీ కోసం ప్రభుత్వం ఏర్పాటు చేసిన స్టేట్ లెవల్ కమిటీదే తుది నిర్ణయమని పేర్కొంది.
- నాగర్ కర్నూల్ జిల్లాలో ఇంకా రూ.40 కోట్ల విలువ చేసే1700 మెట్రిక్ టన్నుల సీఎంఆర్ మిల్లర్ల నుంచి రావాల్సి ఉంది. ఇందులో చిన్న మిల్లర్ల కంటే పారా బాయిల్డ్ రైస్ మిల్లులే ఎక్కువగా ఉన్నాయి. గత ప్రభుత్వ హయాంలో మిల్లర్లు, రెవెన్యూ, సివిల్ సప్లై, విజిలెన్స్ ఎన్ఫోర్స్మెంట్ వింగ్ అధికారులు ఒక్కటై ఇష్టారాజ్యంగా వ్యవహరించారు. గత డిసెంబర్లో జిల్లాలో ఐదు మిల్లులపై ఆర్ఆర్యాక్ట్ కింద కేసులు నమోదయ్యాయి. ఏప్రిల్10 లోపు మరో 10 మిల్లులపై ఆర్ఆర్ యాక్ట్ కింద కేసులు నమోదు చేయడానికి సివిల్సప్లై అధికారులు నోట్ ఫైల్ రెడీ చేశారు. కాగా కేసుల నుంచి తప్పించుకునేందుకు మిల్లర్లు పొలిటికల్సపోర్ట్ కోసం ప్రయత్నిస్తున్నారు. ప్రభుత్వ ఆదేశాలతో ఎఫ్సీఐ, సివిల్ సప్లై శాఖల టీంలు మిల్లులను ఆకస్మికంగా తనిఖీ చేస్తే ప్రభుత్వం ఇచ్చిన వరి ధాన్యం నిల్వల్లో భారీ తేడాలు బయటపడ్డాయి.
- 2023–-24లో మిల్లర్లకు ఇచ్చిన వరి ధాన్యానికి సంబంధించిన సీఎంఆర్ పెట్టాల్సి ఉండగా వాయిదావేస్తూ పోయారు. డిపాల్ట్ మిల్లర్లకు వరి ధాన్యం ఇవ్వకూడదన్న స్టాడింగ్ రూల్స్ను బైపాస్ చేసిన పాత అధికారులు మిల్లర్ల భాగస్వాముల అవతారమెత్తారు. గోడలు కూడా పూర్తికాని మిల్లులకు ధాన్యం కేటాయించారు.
- డీఎస్ఓ, సివిల్సప్లై డీఎం మారిన తర్వాత కొత్తగా చార్జ్ తీసుకున్న ఇద్దరు అధికారులు సంవత్సరాల వారీగా మిల్లులకు ఇచ్చిన వరి ధాన్యం, వారు ఎఫ్సీఐకి పెట్టిన సీఎంఆర్ వివరాలు, బకాయిలపై రిపోర్ట్ ఇచ్చారు. మిల్లర్లపై ఒత్తిడి పెరగడంతో 9 నెలల వ్యవధిలో దాదాపు రూ.14 కోట్ల విలువైన బియ్యాన్ని రాబట్టారు.ఇంకా రూ.40 కోట్ల విలువైన సీఎంఆర్ బియ్యం పెట్టాల్సి ఉంది. బకాయిలు పడిన మిల్లుల్లో వరి ధాన్యం, మిల్లింగ్ చేసిన బియ్యం రెండు లేకపోవడంతో అధికారులకు దిక్కుతోచడం లేదు.
తాజా లిస్ట్లో కల్వకుర్తి టాప్...
సివిల్ సప్లై అధికారులు తయారు చేసిన సీఎంఆర్ బకాయిలిస్ట్లో కల్వకుర్తి టాప్లో ఉంది. కల్వకుర్తిలో మూడు మిల్లులు, నాగర్ కర్నూల్లో రెండు మిల్లులు, అచ్చంపేట, కొల్లాపూర్లో ఒక్కో మిల్లు ఉంది. ఈ పారాబాయిల్డ్ మిల్లులకు ఏప్రిల్ మొదటి వారంలో 6జి కింద నోటీసులు, ఆ వెంటనే ఆర్ఆర్ యాక్ట్ కింద కేసుల నమోదుకు రంగం సిద్దం చేస్తున్నారు. రైస్ మిల్ లీజుకు తీసుకుని సీఎంఆర్ బకాయిపడిన వారిని వదిలిపెట్టమని అధికారులు స్పష్టం చేస్తున్నారు. లీజుదారుతో పాటు మిల్లు ఓనర్ను బాధ్యుడిని చేస్తూ ఇద్దరి ఆస్తులను అటాచ్ చేసే క్లాజ్ అగ్రిమెంట్లోనే ఉందని అంటున్నారు. గ్యారెంటీ ఇచ్చిన వారిపై కూడా కేసులు నమోదు చేసే అవకాశం ఉన్నట్లు తెలుస్తోంది.
