ఫార్ములా ఈ - రేసులో కేటీఆర్​పై ఎంక్వైరీ

గవర్నర్ ఇచ్చినప్రాసిక్యూషన్​ అనుమతి
లేఖపై కేబినెట్​లో చర్చ
లెటర్​ను ఏసీబీకి పంపిన సీఎస్ ఒకట్రెండు రోజుల్లోనే విచారణ
స్పెషల్​ సీఎస్​ అర్వింద్​ కుమార్, మరో ఇద్దరు ఆఫీసర్లపై కూడా..

హైదరాబాద్​, వెలుగు: ఫార్ములా ఈ –కార్ల రేస్​ కేసులో బీఆర్​ఎస్​ వర్కింగ్​ ప్రెసిడెంట్, మాజీ మంత్రి కేటీఆర్​ను విచారించేందుకు సర్వం సిద్ధమైంది. ఆయనను ప్రాసిక్యూషన్​చేసేందుకు ఏసీబీకి అనుమతిస్తూ గవర్నర్ ఇచ్చిన లేఖపై సోమవారం కేబినెట్​ భేటీలో సుదీర్ఘంగా చర్చ జరిగింది. సీఎం రేవంత్​ అధ్యక్షతన జరిగిన ఈ సమావేశంలో ఎంక్వైరీపై నిర్ణయం తీసుకున్నారు. ఆ వెంటనే సీఎస్​ శాంతికుమారి.. గవర్నర్​ నుంచి వచ్చిన పర్మిషన్​ లెటర్​ను ఏసీబీకి అందజేశారు. దీంతో ఒకటి, రెండు రోజుల్లోనే కేటీఆర్​ను ఏసీబీ విచారణకు పిలిచే అవకాశం కనిపిస్తున్నది. ఫార్ములా ఈ – రేస్ ​కేసులో ఏజెన్సీకి డబ్బులు చెల్లించిన టైంలో మున్సిపల్​ అడ్మినిస్ర్టేషన్ అండ్​ అర్బన్​ డెవలప్​మెంట్​ స్పెషల్​ సీఎస్​గా ఉన్న అర్వింద్​ కుమార్​ను కూడా ఎంక్వైరీ చేసేందుకు ప్రభుత్వం గ్రీన్​ సిగ్నల్​ ఇచ్చింది. ఫార్ములా ఈ రేస్​ నిర్వహించిన ఏజెన్సీకి సైతం నోటీసులు ఇచ్చి.. కేసులో భాగం చేయనున్నట్లు తెలిసింది. 

పక్కా ఆధారాలు సేకరించిన ఏసీబీ

ఈ కేసులో కేటీఆర్ పాత్రపై పక్కా ఆధారాలను సేకరించిన ఏసీబీ.. ఆయనను ఎంక్వైరీకి పిలవాలని ఇప్పటికే  భావించింది. కానీ, కేటీఆర్​ ఎమ్మెల్యే కావడంతో విచారణకు అనుమతించాలని ప్రభుత్వానికి లేఖ రాసింది. దీనిపై  రాష్ట్ర ప్రభుత్వం గవర్నర్​ అనుమతి కోరింది. న్యాయ సలహా తీసుకున్న గవర్నర్ జిష్ణుదేవ్​ వర్మ..  కేటీఆర్​ ప్రాసిక్యూషన్​కు ఇటీవలే అనుమతి ఇచ్చారు. తాజాగా అనుమతి లేఖ కూడా అందడంతో కేటీఆర్​ను ఎంక్వైరీకి పిలిచేందుకు ఏసీబీ ఏర్పాట్లు చేసుకుంటున్నది. ఇప్పటికే ఆయన పాత్రకు సంబంధించిన ఆధారాలను 
సేకరించిన ఏసీబీ అధికారులు.. విచారణ సందర్భంగానే అదుపులోకి తీసుకునే అవకాశం ఉన్నట్లు విశ్వసనీయ వర్గాల ద్వారా తెలిసింది.  

ఫార్ములా ఈ–రేస్​లో ఏం జరిగింది ? 

గత బీఆర్​ఎస్​ ప్రభుత్వ హయాంలో  నిర్వహించిన సీజన్​ 9 ఫార్ములా ఈ కార్ల రేస్​తో పాటు  నిర్వహించాలని భావించిన  సీజన్​ 10 ఫార్ములా ఈ–రేస్​కు నాటి రాష్ట్ర కేబినెట్​తో పాటు నాటి సీఎం ఆమోదం లేదు. సీజన్ 9 నిర్వహణకు రోడ్లు, ఇతర మౌలిక సదుపాయాల కోసం హెచ్ఎండీఏ  రూ.20 కోట్లు ఖర్చు చేసింది. స్టాల్స్, ప్రచారం, సీటింగ్, వీధిదీపాల లాంటి వాటికోసం ‘నెక్ట్స్​జెన్​ గ్రీన్ కో’ అనే ప్రైవేటు సంస్థ  రూ.150 కోట్లు ఖర్చు చేసింది.  ఇంకో రూ.30 కోట్లను ‘హైదరాబాద్ రేసింగ్ లిమిటెడ్’ ఖర్చు పెట్టింది.  సీజన్​ 9లో  నాటి రాష్ట్ర ప్రభుత్వం, గ్రీన్​కో (నెక్ట్స్ జెన్), ఫార్ములా– ఈ (ఎఫ్ఈఓ) ఉన్నాయి. ఈ సీజన్​లో నాటి రాష్ట్ర ప్రభుత్వం/ హెచ్ఎండీఏ  కేవలం ఫెసిలిటేటర్​గానే ఉంది. 

 ఫెసిలిటేటర్ గా ఉన్న ప్రభుత్వ పాత్ర.. కేవలం ఏర్పాట్లకు సహకరించడం మాత్రమే!  లాభనష్టాలతో సర్కారుకు ఎలాంటి సంబంధం లేదు.  ఫార్ములా ఈ–రేస్​ను ప్రమోట్ చేసిన గ్రీన్​కోకు సీజన్ 9లో చాలా నష్టం వచ్చింది. దీంతో ప్రైవేట్ ప్రమోటర్ గా ఉన్న గ్రీన్​కోను  సీజన్​ 10 నుంచి తప్పించి ఫార్ములా ఈ(ఎఫ్ఈఓ)తో ఒప్పందం చేసుకున్నారు. ఇక సీజన్ 10కు సంబంధించి ఫార్ములా -ఈ రేస్ అగ్రిమెంట్​కు ముందే అదీ ఎన్నికల కోడ్​అమలులో ఉన్న సమయంలో అక్టోబర్ 2023న రూ.55 కోట్లు హెచ్ఎండీఏ చెల్లించింది. అది కూడా విదేశాల్లో ఉన్న కంపెనీకి ఆర్బీఐతో పాటు ఇతరత్రా ఎలాంటి పర్మిషన్లు లేకుండానే చెల్లింపులు చేశారు. ఏదైనా ప్రైవేట్​ ఏజెన్సీ లేదా కంపెనీలతో ఇలాంటి ఈవెంట్లు నిర్వహించేముందు రాష్ట్ర ప్రభుత్వంతో ఒప్పందం చేసుకోవాలి. 

ALSO READ : ఏ బాంబు పేలుతుందో కేటీఆర్కు త్వరలో తెలుస్తుంది: మంత్రి పొంగులేటి

కానీ, సీజన్​ 10 విషయంలో ఒప్పందం కంటే ముందే ఫండ్స్​చెల్లించేశారు. నిధులు పంపిన 18 రోజులకు అదీ ఎన్నికల కోడ్​ టైంలో ఒప్పందం చేసుకున్నారు. దీనికి సంబంధించి ఈసీ నుంచి ఎలాంటి పర్మిషన్లు తీసుకోలేదు. ఈ ఒప్పందం వల్ల హెచ్ఎండీఏ(రాష్ట్ర ప్రభుత్వం) పై రూ.200 కోట్ల భారం పడింది. న్యాయ వివాదాలు వస్తే లండన్ కోర్టులో తేల్చుకోవాలనే నిబంధన ఉంది. ఎఫ్ఈఓ (ఫార్ములా-ఈ) వ్యక్తులెవరూ సెక్రెటేరియెట్​కు రాలేదు. ముఖాముఖి చర్చలు కూడా జరగలేదు. 

చర్చలన్నీ ఈ–మెయిల్ ద్వారానే జరిగాయి. దీంతో విదేశీ కంపెనీకి వెళ్లిన ప్రభుత్వ సొమ్ము రూ.55 కోట్లను అప్పటి స్పెషల్​ సీఎస్​ అర్వింద్​ కుమార్​ చెల్లించాలంటూ ప్రస్తుత ప్రభుత్వం ఆయనకు నోటీసులు పంపింది. కాగా, ఈ విషయంలో తన పాత్ర ఏమీ లేదని.. అప్పటి మంత్రి కేటీఆర్ చెప్తేనే చేశానని అర్వింద్​కుమార్​ సమాధానం ఇచ్చారు. దీంతో  ఈ వ్యవహారంలో అవినీతి, అక్రమాలు జరిగినట్లు గుర్తించిన రాష్ట్ర ప్రభుత్వం ఎంక్వైరీ కోసం ఏసీబీకి ఆదేశించింది.