నాలుగు చినుకులు గట్టిగ పడితే చాలు, రోడ్లు చెరువులు అయిపోతున్నాయి. ఈ టైంలో రోడ్ల మీద డ్రైవింగ్ ఎంతవరకు సేఫ్ అనేది చెప్పలేం. అలాగని పనులు చేసుకోకుండా ఇంట్లో కూర్చోలేం. అందుకే వాన పడేటప్పుడు, ముఖ్యంగా టూ వీలర్స్ నడిపేవాళ్లు కాస్త ఎక్కువ జాగ్రత్తగా ఉండాలి. బైక్ స్టార్ట్ చేసే ముందే టైర్లు, బ్రేకులు మంచి కండిషన్లో ఉన్నాయో లేవో చూసుకోవాలి. వర్షం పడుతున్నప్పుడు మసకగా ఉంటుంది. అప్పుడు బండి స్లోగా నడపాలి. రోడ్డు బాగుంటేనే వేగం పెంచాలి. వాన పడినా, పడకపోయినా రెయిన్కోట్ వెంట ఉండటం బెటర్. లైట్లు, ఇండికేటర్, గేర్స్ సరిగ్గా పనిచేస్తున్నాయో లేదో చెక్ చేయాలి. లైట్, ఇండికేటర్ దగ్గరి వైర్లు బయటకు వస్తే, అవి కరెంట్ తీగలకు తగిలి షార్ట్ సర్క్యూట్ అయ్యే అవకాశం ఉంది. ప్రతిసారి బండి చెయిన్ లూబ్ (ఆయిల్) చేయడం మర్చిపోవద్దు. వర్షంలో ఇంటికి వచ్చిన తర్వాత చెయిన్ శుభ్రం చేసి, లూబ్ చేయాలి.
వాన నీళ్లు ఉన్న రోడ్డులో వెళ్లాలా? వద్దా ?అనే సందేహం వస్తుంది. వాటర్ లెవల్ బైక్ బాష్గార్డ్ కంటే తక్కువ ఎత్తులో ఉంటేనే ఆ రోడ్డులో వెళ్లాలి. సేఫ్టీ కాదు అనిపిస్తే దూరమైనా సరే వేరే రోడ్డులో వెళ్లాలి. అలాగే, రోజూ వెళ్లి వచ్చే దారిలో ఎక్కడ గుంతలు, మ్యాన్హోల్స్ ఉన్నాయో తెలుస్తుంది. కాబట్టి వాటిని చూసుకుని జాగ్రత్తగా బండి నడపాలి. తడి రోడ్డు మీద బ్రేకులు తొందరగా పడవు. అందుకే, ముందు వెళ్లే వెహికల్స్కి కొంచెం ఎక్కువ గ్యాప్ మెయింటెయిన్ చేయాలి. ఇంజన్ స్టార్ట్ కాకపోయినా, నీటిలో బైక్ సగం వరకు మునిగిపోయినా టెన్షన్ పడొద్దు. ఒకవేళ వరద ఎక్కువ ఉన్న ప్రాంతంలో బైక్ పార్క్ చేస్తే, తెలిసిన లేదా దగ్గర్లో ఉన్న బైక్ సర్వీస్ సెంటర్కి ఫోన్ చేయొచ్చు.
