- ఆ తర్వాత నాలుగైదు రోజుల్లోనే తెలంగాణలోకి..
- నిరుడు జూన్ మూడో వారంలో ఎంట్రీ
హైదరాబాద్, వెలుగు : ఈసారి రాష్ట్రంలోకి నైరుతి రుతుపవనాలు ముందుగానే వచ్చేందుకు వాతావరణ పరిస్థితులు అనుకూలంగా ఉన్నాయని వాతా వరణ శాఖ తెలిపింది. ఈ నెలాఖరు నాటికి రుతుపవనాలు కేరళ తీరాన్ని తాకుతాయని, ఆ తర్వాత నాలుగైదు రోజుల్లోలోనే తెలంగాణలోకి ప్రవేశించే అవకాశం ఉందని గురువారం పేర్కొంది. పోయినేడాది ఎల్నినో ప్రభావానికి తోడు బిఫర్జాయ్తుఫాను కారణంగా రుతుపవనాలు రాష్ట్రంలోకి చాలా ఆలస్యంగా ప్రవేశించాయి. అప్పుడు జూన్ మూడో వారంలో వచ్చాయి.
అయితే ఈసారి అలాంటి పరిస్థితి ఉండదని వాతావరణ శాఖ అధికారులు చెప్తున్నారు. ప్రస్తుతం పసిఫిక్ మహాసముద్రంలో ఉపరితల ఉష్ణోగ్రతలు తగ్గుతుండడం, లానినా పరిస్థితులు బలపడుతుండడంతో రుతుపవనాలు కూడా త్వరగానే బలపడుతున్నాయని అంటున్నారు. ఈ లెక్కన మన రాష్ట్రంలోకి జూన్ తొలి వారంలోనే నైరుతి రుతుపవనాలు ప్రవేశిస్తాయన్న అంచనాలు ఉన్నాయి. వాతావరణ పరిస్థితులు ఇలాగే అనుకూలిస్తే ఈసారి వానాకాలం మంచిగవుతుందని, వర్షపాతం మెరుగ్గా ఉంటుందని అధికారులు చెబుతున్నారు.
