బెల్లంపల్లి రూరల్, వెలుగు: కాంగ్రెస్ ప్రభుత్వం ఇచ్చిన హామీ ప్రకారం తుమ్మిడిహెట్టి ప్రాజెక్టుకు నిధులు కేటాయించి యుద్ధప్రాతిపదికన పనులను చేపట్టాలని సీపీఐ(ఎంఎల్) రాష్ట్ర కార్యదర్శి శ్రీనివాస్, జలసాధన సమితి రాష్ట్ర కన్వీనర్ గోవర్దన్ డిమాండ్ చేశారు. బుధశారం నెన్నెల మండల కేంద్రంలో ఏర్పాటు చేసిన విలేకరుల సమావేశంలో వారు మాట్లాడుతూ.. 5 నియోజకవర్గాలకు సాగు నీరు అందించాలనే సంకల్పంతో చేపట్టిన తుమ్మిడిహెట్టి ప్రాజెక్టు పనులు త్వరగా పూర్తిచేయాలన్నారు.
కాళే శ్వరం ప్రాజెక్టు కట్టిన నాలుగేండ్లకే కూలిందని, అక్కడి నుంచి నీరు శాశ్వతంగా వచ్చే అవకాశం లేదని.. ఉమ్మడి ఆదిలాబాద్జిల్లాకు తుమ్మడిహెట్టి ప్రాజెక్టు తప్పా మరే గత్యంతరం లేదన్నారు. ప్రభుత్వం ఇప్పటికైనా స్పందించి ప్రాణహిత–చేవెళ్ల ప్రాజెక్టును తుమ్మిడిహెట్టి వద్ద నిర్మించాలని డిమాండ్ చేశారు. సీపీఐ ఎంఎల్ జిల్లా కార్యదర్శి లాల్ కుమార్, పీఓడబ్ల్యూ రాష్ట్ర కార్యదర్శి మంగ, ఐఎఫ్టీయూ జిల్లా అధ్యక్షులు శ్రీనివాస్, ఏఐకేఎంఎస్ జిల్లా ప్రధాన కార్యదర్శి రత్నం తిరుపతి, పీడీఎస్యూ జిల్లా అధ్యక్షుడు రెడ్డి చరణ్, సీపీఎం జిల్లా కార్యదర్శి సంకె రవి, టీడీపీ నాయకులు పాల్గొన్నారు.
