- గతంలో ఇతర శాఖలకు పంపిన సిబ్బంది తిరిగి హౌసింగ్ శాఖకు
- ఇప్పటికే జిల్లాల్లో విధుల్లో చేరుతున్న అధికారులు
- కామారెడ్డి జిల్లాలో నలుగురి రాక
- యాప్ ద్వారా లబ్ధిదారుల సర్వే
కామారెడ్డి, వెలుగు: గతంలో మాదిరి ఇందిరమ్మ ఇండ్ల నిర్మాణం హౌసింగ్ శాఖ ఆధ్వర్యంలోనే జరగనుంది. దీంతో హౌసింగ్శాఖ నుంచి ఇతర శాఖలకు వెళ్లిన సిబ్బందిని తిరిగి సొంత శాఖకు రప్పిస్తున్నారు. ఇప్పటికే పలువురు మాతృశాఖలో రిపోర్ట్ చేయడంతో వీరిని ఆయా జిల్లాలకు ప్రభుత్వం కేటాయిస్తోంది. గతంలో ప్రభుత్వం చేపట్టే ఇండ్ల నిర్మాణం హౌసింగ్ శాఖ పర్యవేక్షించేది. జిల్లాల్లో ఈఈ, డీఈలు, ఏఈలు, వర్క్ ఇన్స్పెక్టర్లు , ఇతర సిబ్బంది ఉండేవారు.
ప్రభుత్వ ఇండ్ల నిర్మాణ పక్రియ వీరి ఆధ్వర్యంలోనే జరిగేది. లబ్ధిదారులకు సిమెంట్, ఇతర సామగ్రితో పాటు చెల్లింపులు వీరే చూసేవాళ్లు. గత పదేళ్లుగా హౌసింగ్ శాఖను పట్టించుకోలేదు. బీఆర్ఎస్ ప్రభుత్వం హౌసింగ్ శాఖలో పనిచేసే అధికారులు, సిబ్బందిని ఇతర శాఖలకు కేటాయించింది.
ఇతర శాఖలకు కేటాయింపు
మున్సిపల్, జీహెచ్ఎంసీ, హెచ్ఎండీఏ, పంచాయతీరాజ్, బేవరేజెస్ తదితర శాఖలకు హౌసింగ్ సిబ్బందిని బీఆర్ఎస్ ప్రభుత్వం కేటాయించింది. సిబ్బంది కేటాయింపులతో జిల్లాకు ఒకరు లేదా ఇద్దరు మాత్రమే మిగిలారు. ప్రతీ జిల్లాలో డీఈ స్థాయి అధికారి మాత్రమే ఉండగా, కొన్ని చోట్ల ఒకరిద్దరు సిబ్బందిని ఉన్నారు. గత ప్రభుత్వం చేపట్టిన డబుల్ బెడ్ రూం ఇండ్ల నిర్మాణ బాధ్యతల్ని ఇతర ఇంజనీరింగ్ శాఖలకు అప్పగించింది. ఒక్కో జిల్లాలో ఒక్కో శాఖకు ఇచ్చారు.
పంచాయతీరాజ్, ఆర్అండ్బీ, సోషల్ వెల్ఫేర్ వంటి ఇంజనీరింగ్ విభాగాలు డబుల్ బెడ్ రూం ఇండ్ల నిర్మాణాలను పర్యవేక్షించేవి. నోడల్ ఆఫీసుగా హౌసింగ్ శాఖను ఉంచి నిర్మాణ పక్రియ పూర్తిగా ఆయా ఇంజనీరింగ్ విభాగాలు చేపట్టాయి. మిగిలిన ఒకరిద్దరు అధికారులు, సిబ్బంది నోడల్ ఏజేన్సీ ఆఫీసులో ఉంటూ నిర్మాణ పక్రియను మానిటరింగ్ చేసే వారు.
తాజాగా హౌసింగ్ శాఖకు..
ప్రస్తుతం ప్రభుత్వం హౌసింగ్ శాఖ నుంచి ఇతర శాఖలకు వెళ్లిన సిబ్బంది తిరిగి తమ సొంత శాఖకు పంపిస్తోంది. రాష్ర్ట ప్రభుత్వం ఇండ్ల నిర్మాణ బాధ్యతల్ని ఈ శాఖకు అప్పగిస్తోంది. ఇప్పటికే పలు జిల్లాల్లో డీఈలు, ఏఈలు విధుల్లో చేరారు. కామారెడ్డి జిల్లాకు నలుగురు ఆఫీసర్లు వచ్చారు. ఇందులో ఇద్దరు డీఈలు, ఇద్దరు ఏఈలు ఉన్నారు.
ఇది వరకు నోడల్ ఆఫీసులో ఒక డీఈ ఉండేవారు. ప్రస్తుతం వీరి సంఖ్య ఐదుకు చేరింది. నిజామాబాద్ జిల్లాలో ఇద్దరు డీఈలు రిపోర్టు చేశారు. గతంలో ఒకరు ఉండేవారు. ప్రస్తుతం ఈ జిల్లాలో అధికారుల సంఖ్య మూడుకు చేరింది. మరికొంతమంది ఏఈలు వచ్చే అవకాశం ఉంది. ఒక్కో డీఈకి ఒక రెవెన్యూ డివిజన్ పరిధి కేటాయించటమా, నియోజక వర్గ పరిధి బాధ్యతలు అప్పగించటమా అనేది ఇంకా ప్రభుత్వం నుంచి ఆదేశాలు రావాల్సి ఉంది.
నియోజక వర్గానికి 3,500 ఇండ్లు
ప్రతీ నియోజక వర్గానికి 3,500 ఇండ్లను ప్రభుత్వం మంజూరు చేసింది. ఉమ్మడి నిజామాబాద్ జిల్లాలో తొమ్మిది నియోజక వర్గాలు ఉన్నాయి. 31,500 ఇండ్లు మంజూరయ్యాయి. ఇది వరకే గ్రామ, పట్టణ, వార్డు స్థాయిల్లో ఇందిరమ్మ కమిటీలను ఏర్పాటు చేశారు. లబ్ధిదారుల ఎంపికకు ప్రత్యేక యాప్ రూపొందించారు. ఈ యాప్ను సీఎం రేవంత్రెడ్డి శుక్రవారం అధికారికంగా రిలీజ్ చేశారు.
గ్రామస్థాయిలో పంచాయతీ సెక్రటరీ, మున్సిపాలిటీల పరిధిలో వార్డు అధికారి యాప్లో లబ్ధిదారుల వివరాల్ని పొందుపరుస్తారు. కొద్ది రోజుల క్రితం ప్రజాపాలన ద్వారా స్వీకరించిన దరఖాస్తుల్లో ఇండ్ల కోసం ఎవరు దరఖాస్తు పెట్టుకున్నారో వారి వివరాలు సేకరిస్తారు. ప్రతీ మండల కేంద్రంలో మోడల్ హౌస్ నిర్మిస్తారు. ఇది 400 చదరపు అడుగుల్లో ఉంటుంది. ఇందుకోసం మండల కేంద్రాల్లో స్థలాలను అధికారులు పరిశీలిస్తున్నారు.
