గ్రామీణ, మారుమూల ప్రాంతాల్లో మొబైల్ సిగ్నల్స్ సరిగ్గా అందవు. మనం వినియోగించే నెట్వర్క్ కాకుండా వేరే నెట్వర్క్ సిగ్నల్ ఉన్నా వినియోగించుకోలేని పరిస్థితి. ఈ సమస్యకు పరిష్కారంగా ఇంట్రా సర్కిల్ రోమింగ్(ఐసీఆర్) సర్వీస్ను కేంద్ర టెలికాం శాఖ ప్రారంభించింది. గ్రామీణ మొబైల్ నెట్వర్క్ను విస్తరించేందుకు కేంద్ర ప్రభుత్వం చేపట్టిన డిజిటల్ భారత్ నిధి(డీబీఎన్) కార్యక్రమంలో భాగంగా 35 వేల గ్రామాలకు మొబైల్ నెట్వర్క్ ఉండేలా 27వేల మొబైల్టవర్లను ఏర్పాటు చేస్తుంది. ఈ డీబీఎన్ను టెలికాం యాక్ట్ – 2023 ప్రకారం కేంద్ర ప్రభుత్వం ఏర్పాటు చేసింది.
ఇప్పటివరకు డీబీఎన్ నిధులతో ఏ కంపెనీ అయితే టవర్ను ఏర్పాటు చేస్తుందో ఆ కంపెనీ వినియోగదారులకు మాత్రమే సిగ్నల్స్ అందేవి. ఇప్పుడు ఈ ఐసీఆర్ ద్వారా డీబీఎన్ నిధులతో ఏర్పాటైన టవర్ల నుంచి బీఎస్ఎన్ఎల్, జియో, ఎయిర్టెల్ నెట్ వర్క్ వినియోగదారులందరికీ మారుమూల ప్రాంతాల్లోనూ 4జీ సేవలు అందుతాయి. డీబీఎన్ టవర్ల పరిధిలో మనం వినియోగించే నెట్వర్క్ సిగ్నల్ లేకపోతే మన ఫోన్ ఆటోమేటిక్గా అక్కడ ఉండే నెట్వర్క్కు మారిపోయే సదుపాయం కూడా రానున్నది.
