- ఒడిశాలోని మోహన్‍గిరి ప్రాంతంలో ఘటన
- పోలీసులే లక్ష్యంగా మందుపాతర ఏర్పాటు చేసిన మావోయిస్టులు
- పంచాయతీ ఎన్నికల ఫొటోలు తీసేందుకు వెళ్లి జర్నలిస్టు మృతి
భద్రాచలం, వెలుగు: భద్రతా బలగాలను లక్ష్యంగా చేసుకుని మావోయిస్టులు అమర్చిన మందుపాతరకు జర్నలిస్టు బలయ్యాడు. ఈ ఘటన మన రాష్ట్ర సరిహద్దు ఒడిశాలోని మోహన్‍గిరి ప్రాంతంలో శనివారం చోటుచేసుకుంది. వివరాల్లోకి వెళ్తే.. ఒడిశాలో పంచాయతీ ఎలక్షన్స్ జరుగుతున్నాయి. వీటిని మావోయిస్టు పార్టీ బహిష్కరించింది. కల్హంది జిల్లా మదన్‍పూర్ రాంపూర్ పోలీస్ స్టేషన్ పరిధిలో మోహన్‍గిరి డిల్లాన్ ప్రాంతంలో మావోయిస్టులు ఎన్నికల బహిష్కరణకు పిలుపునిస్తూ ఓ చెట్టుకు వాల్ పోస్టర్లు అంటించారు. వాటిని తొలగించేందుకు భద్రతాబలగాలు వస్తాయని, అక్కడే మందుపాతర అమర్చారు. అయితే పోలీసుల కంటే ముందుగా ఒడియా డైలీ పత్రిక ధరిత్రి జర్నలిస్టు రోహిత్ బిశ్వాల్ తన బైక్పై వచ్చి ఫొటోలు తీస్తున్నాడు. ఈ క్రమంలో ఒక్కసారిగా మందుపాతర పేలింది. పేలుడుకు బిశ్వాల్ అక్కడికక్కడే చనిపోయాడు. అతడి బైక్ ధ్వంసమైంది. బిశ్వాల్ సొంతూరు మోహనగిరి. సీఆర్పీఎఫ్ బలగాలు, బాంబ్‍స్క్వాడ్ టీమ్లు మావోయిస్టుల కోసం గాలిస్తున్నాయి.
