- అలైన్మెంట్ మార్పులపై హైకోర్టును ఆశ్రయించిన రైతులు
- కౌంటర్ వేయాలని ఎన్హెచ్ఏఐ అధికారులకు కోర్టు ఆర్డర్
- అప్పటివరకు రైతులను భూముల్లోంచి పంపవద్దని ఆదేశం
మంచిర్యాల, వెలుగు: నేషనల్ హైవే 63లో భాగంగా లక్సెట్టిపేట నుంచి మంచిర్యాల వరకు ఫోర్ లేన్ రోడ్డు నిర్మాణం కోసం చేపట్టిన భూసేకరణ ప్రక్రియకు టెంపరరీగా బ్రేక్ పడ్డది. భూములు కోల్పోతున్న పలువురు రైతులు మూడుసార్లు అలైన్మెంట్ మార్చడంపై అభ్యంతరాలు వ్యక్తం చేస్తూ ఇటీవల హైకోర్టును ఆశ్రయించారు. దీనిపై విచారణ చేపట్టిన కోర్టు కౌంటర్ ఫైల్ చేయాలని నేషనల్ హైవేస్ అథారిటీ ఆఫ్ ఇండియా (ఎన్హెచ్ఏఐ) అధికారులను ఆదేశించింది.
అధికారులు ఈ నెల 18 వరకు గడువు కోరగా తదుపరి విచారణ జరిగేంతవరకు రైతులను భూముల్లోంచి పంపరాదని ఆదేశించింది. అలాగే 2013 భూసేకరణ చట్టం ప్రకారం నడుచుకోవాలని మూడ్రోజుల క్రితం ఆర్డర్స్ జారీ చేసింది.
1306.57 ఎకరాలు సేకరణ
నిజామాబాద్–జగ్దల్పూర్ ఇంటర్ కారిడార్ ఎన్హెచ్ 63లో భాగంగా ఆర్మూర్ నుంచి మంచిర్యాల జిల్లా క్యాతనపల్లి వరకు 131.89 కిలోమీటర్లు ఫోర్ లేన్ నిర్మాణం జరగనుంది. అంచనా వ్యయం రూ.5,354.12 కోట్లు. జిల్లాలోని లక్సెట్టిపేట, హాజీపూర్, మంచిర్యాల, మందమర్రి మండలాల్లోని 17 గ్రామాల మీదుగా ఈ గ్రీన్ ఫీల్డ్ రోడ్డు వెళ్తుంది. దీనికోసం 1,421.32 ఎకరాల భూసేకరణకు ఈ ఏడాది ఫిబ్రవరిలో ఎన్హెచ్ఏఐ అధికారులు నోటిఫికేషన్ జారీ చేశారు. ఇందులో 71.22 ఎకరాలు గవర్నమెంట్, 43.50 ఎకరాలు ఫారెస్ట్ ల్యాండ్ కాగా, 1,306.57 ఎకరాలు ప్రైవేట్ భూములు పోతున్నాయి.
2018 నుంచి ఇప్పటివరకు మూడుసార్లు అలైన్మెంట్ మార్చారు. కొంతమంది భూస్వాములు, లీడర్లు వారి భూములు నష్టపోకుండా ఎన్హెచ్ఏఐ అధికారుల దగ్గర లాబీయింగ్ చేశారని రైతులు ఆరోపిస్తున్నారు. ఇప్పటికే ఓసారి ఎల్లంపల్లి ప్రాజెక్టులో భూములు పోయిన తమకు గ్రీన్ ఫీల్డ్ హైవే వల్ల మరోసారి మిగిలిన భూములు కూడా కోల్పోయే పరిస్థితి వచ్చిందని వాపోతున్నారు.
