ప్రైవేట్‎లో మాస్ కాపీయింగ్.. పాస్ పర్సంటేజ్ కోసం కుమ్మక్కైన ప్రైవేట్ కాలేజీలు..!

• కేయూ డిగ్రీ పరీక్షల్లో ఇష్టారాజ్యం
• పాస్ పర్సంటేజ్ కోసం కుమ్మక్కైన ప్రైవేట్ కాలేజీలు
• ఒకరికొకరు సహకరించుకుంటూ చూచిరాతలు
• ఇప్పటివరకు 127 మందికి పైగా డిబార్
• అక్రమాలకు పాల్పడుతున్న కాలేజీలపై చర్యలు శూన్యం

హనుమకొండ, వెలుగు:  కాకతీయ యూనివర్సిటీ డిగ్రీ పరీక్షల్లో మాస్​ కాపీయింగ్ ​దందా జోరుగా నడుస్తోంది. పాస్​ గ్యారంటీ అని చెప్పుకుంటున్న కొన్ని ప్రైవేటు కాలేజీలు విద్యార్థుల నుంచి వసూళ్లకు పాల్పడి మాస్ కాపీయింగ్​ చేయిస్తున్నాయి. ఒక కాలేజీతో మరో కాలేజీ కుమ్మక్కై చూచిరాతలను ప్రోత్సహిస్తున్నాయి. దీంతో కేయూ పరిధిలోని ప్రైవేటు కాలేజీ తీరుపై గతం నుంచే ఫిర్యాదులు ఉండగా, తాజాగా ఫ్లయింగ్ స్క్వాడ్​ తనిఖీల్లో మాస్​ కాపీయింగ్​కు పాల్పడుతూ పెద్ద సంఖ్యలో స్టూడెంట్స్ పట్టుబడుతున్నారు. దీంతో స్టూడెంట్లను డిబార్​ చేస్తున్న అధికారులు.. అక్రమాలకు పాల్పడుతున్న కాలేజీలపై మాత్రం యాక్షన్​తీసుకోవడం లేదు. 

ఆదిలాబాద్​లో చూచిరాతల పర్వమే..

కేయూ పరిధిలో డిగ్రీ ఫస్ట్, థర్డ్, ఫిఫ్త్ సెమిస్టర్​ఎగ్జామ్స్ నవంబర్​ 28 నుంచి ప్రారంభమయ్యాయి. వర్సిటీ పరిధిలో ఉమ్మడి వరంగల్, ఆదిలాబాద్, ఖమ్మం జిల్లాలు ఉండగా..  ఈ పరీక్షల కోసం మొత్తంగా 121 సెంటర్లు ఏర్పాటు చేశారు. ఇందులో ఆదిలాబాద్​లో 46, ఖమ్మం 29, వరంగల్​లో 46 సెంటర్లు ఉండగా.. అంతా కలిపి 1,77,274 మంది విద్యార్థులు పరీక్షలకు హాజరు కావాల్సి ఉంది. తమ తమ కాలేజీల పాస్​ పర్సంటేజీ పెంచుకోవడం కోసం కొన్ని ప్రైవేటు కాలేజీలు అడ్డదారులు తొక్కుతున్నాయి. విద్యార్థుల నుంచి వసూళ్లకు పాల్పడి మాస్​ కాపీయింగ్​ చేయిస్తున్నాయి. ముఖ్యంగా ఈ దందా ఉమ్మడి ఆదిలాబాద్​జిల్లాలో పెద్ద ఎత్తున కనిపిస్తోంది. అక్కడ చాలా ప్రైవేటు కాలేజీలు ఒకదానితో ఒకటి కుమ్మక్కైనట్లు తెలుస్తోంది.

 కాలేజీల పరస్పర ఒప్పందం తరువాత స్టూడెంట్లకు స్లిప్పులు ఇచ్చి మరీ మాస్​ కాపీయింగ్​కు అలవాటు చేస్తున్నాయి. ఫ్లయింగ్ ​స్క్వాడ్​ జరుపుతున్న తనిఖీల్లో విద్యార్థులు పెద్ద సంఖ్యలో పట్టుబడుతుండటమే ఇందుకు సాక్ష్యంగా నిలుస్తోంది. ప్రతిసారి ఇదే తంతు జరుగుతుండగా.. గతేడాది చూచిరాతల సమాచారం అందుకుని ఇచ్చోడ మండలానికి వెళ్లిన కేయూ ఫ్లయింగ్​ స్క్వాడ్​ సిబ్బందిపై అక్కడున్న కొంతమంది స్టూడెంట్స్ ​దాడులకు పాల్పడే దాకా వచ్చిందంటే అక్కడ పరిస్థితి ఎలా తయారైందో అర్థం చేసుకోవచ్చు. 

ఇప్పటికే 127 మంది డిబార్

నవంబర్​28 నుంచి పరీక్షలు ప్రారంభం కాగా.. చాలాచోట్లా కాలేజీలు, ఇన్విజిలేటర్లు అంతా ఒక్కటై చూచిరాతల పర్వం కొనసాగిస్తున్నారు. దీంతో ఫ్లయింగ్​ స్క్వాడ్​ టీమ్స్​ సడెన్​ విజిట్​లు చేస్తుండటంతో కేయూ పరిధిలోని జిల్లాల్లో శుక్రవారం వరకు 127 మంది విద్యార్థులు మాస్​ కాపీయింగ్​కు పాల్పడుతూ అధికారులకు చిక్కారు. ఇందులో అత్యధికంగా 102 మంది విద్యార్థులు ఉమ్మడి ఆదిలాబాద్​ జిల్లాలో పట్టుబడినవారే కావడం గమనార్హం. వారితో పాటు ఖమ్మం జిల్లాలో 17 మంది, వరంగల్ జిల్లాలో 8 మంది స్టూడెంట్స్​ మాస్ కాపీయింగ్​కు పాల్పడుతుండగా.. అధికారులు పట్టుకుని డిబార్​ చేశారు. 

కాలేజీలపై నో యాక్షన్​

ఉమ్మడి ఆదిలాబాద్​ జిల్లాతో పాటు చాలాచోట్లా ప్రైవేటు కాలేజీలు కుమ్మక్కై మాస్​ కాపీయింగ్ దందా సాగిస్తున్నాయనే ఆరోపణలున్నాయి. విద్యార్థుల నుంచి వసూళ్లకు పాల్పడడంతో పాటు పరస్పర ఒప్పందంతో చూచిరాతలు నిర్వహిస్తున్నాయి. కాగా తనిఖీల్లో భాగంగా చూచిరాతలకు పాల్పడుతున్న విద్యార్థులను డిబార్​ చేస్తున్న కేయూ అధికారులు.. మాస్​ కాపీయింగ్​కు ప్రోత్సహిస్తున్న కాలేజీలపై మాత్రం ఎలాంటి యాక్షన్​ తీసుకోకపోవడం అనుమానాలకు తావిస్తోంది. ఇప్పటికే కాకతీయ యూనివర్సిటీ పేరున దాదాపు 250 మందికి ఫేక్​సర్టిఫికెట్లు ఇష్యూ అయిన వ్యవహారం అప్పట్లో కలకలం రేపగా..  పరీక్షల ప్రతిసారీ చూచిరాతల పర్వంతో వర్సిటీ మరింత అపవాదు మూటగట్టుకోవాల్సి వస్తోంది. ఇకనైనా కేయూ అధికారులు అక్రమాలకు పాల్పడుతున్న ప్రైవేటు కాలేజీలపై కఠిన చర్యలు తీసుకోవాలనే డిమాండ్లు వినిపిస్తున్నాయి.

సీరియస్​ యాక్షన్​ తీసుకుంటం

పరీక్షల్లో మాస్​కాపీయింగ్​కు పాల్పడకుండా ఫ్లయింగ్​ స్క్వాడ్​ టీమ్స్​ తో తనిఖీలు నిర్వహిస్తున్నాం. మాస్​ కాపీయింగ్​ కు పాల్పడుతున్న విద్యార్థులపై నిబంధనల ప్రకారం చర్యలు తీసుకుంటాం. కాలేజీలు కుమ్మక్కై మాస్​ కాపీయింగ్​ ను ప్రోత్సహిస్తే సీరియస్​ యాక్షన్​ తీసుకుంటాం.- ప్రొఫెసర్​ కట్ల రాజేందర్​, కేయూ ఎగ్జామినేషన్స్ కంట్రోలర్​