హైదరాబాద్, వెలుగు: ఉమ్మడి పాలమూరు జిల్లాలోని ఇరిగేషన్ ప్రాజెక్టులపై ఫోకస్ పెంచిన రాష్ట్ర ప్రభుత్వం.. అందుకు అనుగుణంగా కసరత్తులను చేస్తున్నది. ఉమ్మడి జిల్లాకు సంబంధించిన ప్రాజెక్టులపై బుధవారం జలసౌధలో అధికారులతో ఇరిగేషన్ శాఖ మంత్రి ఉత్తమ్ సమీక్ష నిర్వహించనున్నారు.
పెండింగ్లో ఉన్న పాలమూరు రంగారెడ్డి, కల్వకుర్తి లిఫ్ట్ ఇరిగేషన్ స్కీములతో పాటు నెట్టెంపాడు, భీమా, కోయిల్సాగర్, ఆర్డీఎస్ వంటి ప్రాజెక్టు పనుల పురోగతి గురించి చర్చించనున్నారు. సీఎం రేవంత్ రెడ్డి నియోజకవర్గంలో చేపట్టనున్న కొడంగల్ నారాయణపేట లిఫ్ట్ ఇరిగేషన్ స్కీమ్పైనా మీటింగ్లో చర్చించే అవకాశమున్నట్టు తెలిసింది. టెండర్ల దాఖలుకు గడువు, పెట్టాల్సిన నిబంధనలపై చర్చించే అవకాశం ఉన్నట్టు సమాచారం.
ఈ సమావేశానికి ఇప్పటికే పనులు మొదలై పెండింగ్లో పడిపోయిన ప్రాజెక్టులకు సంబంధించిన కాంట్రాక్ట్ సంస్థలనూ రావాల్సిందిగా ఆదేశించినట్టు తెలిసింది. ఇప్పుడున్న పరిస్థితుల్లో ఆయా ప్రాజెక్టులను పూర్తి చేసేందుకు ఎంత సమయం పడుతుంది? ఎన్ని నిధులు కావాలి? పెండింగ్ నిధులెన్ని? ఆయకట్టు పెంపు వంటి వివరాలను తెలుసుకునే అవకాశం ఉంది. దీనికి సంబంధించి ఇప్పటికే అధికారులు అన్ని వివరాలను సిద్ధం చేసి పెట్టారు. వాస్తవానికి ఈ రివ్యూ సోమవారమే జరగాల్సి ఉన్నా పలు కారణాలతో బుధవారానికి వాయిదా వేశారు.
