- ఎమ్మెల్యే మహిపాల్ రెడ్డి
రామచంద్రాపురం (అమీన్పూర్), వెలుగు: సంగారెడ్డి జిల్లా అమీన్పూర్ మున్సిపాలిటీలో వాటర్ రిజర్వాయర్ల ఏర్పాటుతో తాగునీటి సమస్యలకు శాశ్వత పరిష్కారం దొరికిందని ఎమ్మెల్యే మహిపాల్ రెడ్డి అన్నారు. గురువారం మున్సిపాలిటీ పరిధిలోని పలు వార్డుల్లో రూ. 6 కోట్ల 82 లక్షల నిధులతో అభివృద్ధి పనులకు ఆయన ప్రారంభోత్సవాలు, శంకుస్థాపనలు చేశారు. అనంతరం లాలాబాయి కాలనీలో కొత్తగా నిర్మించిన ఐదు వాటర్ రిజర్వాయర్లను ప్రారంభించారు. ఈ సందర్భంగా ఎమ్మెల్యే మాట్లాడుతూ.. దశాబ్ధ కాలంగా స్థానిక కాలనీ ప్రజలు తాగునీటి సమస్యలతో ఇబ్బందులు పడ్డారన్నారు.
కొత్తగా నిర్మించిన రిజర్వాయర్లతో ఇకపై ప్రతి కాలనీకి తాగునీటిని అందిస్తామని చెప్పారు. అన్ని కాలనీలలో జియో ట్యాగింగ్ చేసి ఇంటింటికీ వాటర్ పైప్లైన్లు ఇవ్వాలని అధికారులను ఆదేశించారు. రాజకీయాలు పక్కన పెట్టి అభివృద్ధిలో అందరూ కలిసి రావాలని, పదవి దిగిపోయినా ప్రజా సమస్యలపై దృష్టి పెట్టాలని కౌన్సిలర్లకు సూచించారు. మున్సిపల్ చైర్మన్ పాండురంగా రెడ్డి, వైస్ చైర్మన్నర్సింహా గౌడ్, కమిషనర్జ్యోతిరెడ్డి, కౌన్సిలర్లు, కో ఆప్షన్ మెంబర్లు, నాయకులు పాల్గొన్నారు.
