-
టెలిగ్రామ్ ద్వారా 22,680 ఘటనలు
-
ఫేస్బుక్ ద్వారా ఇల్లీగల్ లోన్ యాడ్స్తో టోకరా
-
మూడేండ్లలో 11 రెట్లు పెరిగిన సైబర్ ఫైనాన్షియల్ క్రైమ్స్
-
2023లో రూ.7,476 కోట్లు దోచిన కేటుగాళ్లు
-
2024 తొలి మూడు నెలల్లోనే రూ.4,249 కోట్ల దోపిడీ
-
రికవరీ చేస్తున్నది 12 శాతం వరకే
-
కేంద్ర హోం శాఖ వార్షిక నివేదికలో వెల్లడి
హైదరాబాద్, వెలుగు:
వాట్సాప్ ద్వారా కాల్ చేస్తరు.. ‘నీ పేరుతో వచ్చిన కొరియర్ లో డ్రగ్స్దొరికినయ్’ అని బెదిరిస్తరు. పోలీసులమని, డిజిటల్ అరెస్ట్ చేస్తున్నమని భయపెడతరు. కేసు కొట్టేయాలంటే లక్షలు ఇవ్వాలంటరు. ఆడవాళ్లయితే అసభ్యంగా కూడా ప్రవర్తిస్తరు. చివరికి అందినకాడికి దోచుకుని పరారైతరు. ఇదీ ఈ మధ్య కాలంలో సైబర్ కేటుగాళ్లు పేట్రేగిపోతూ జనాలను మోసం చేస్తున్న తీరు. తాజాగా విడుదలైన కేంద్ర హోంశాఖ వార్షిక నివేదిక 2023లోనూ ఇలాంటి నివ్వెరపోయే విషయాలు వెల్లడయ్యాయి. జనాల సోషల్ మీడియా వాడకాన్ని ఆసరాగా చేసుకున్న సైబర్ దొంగలు వేల కోట్లు దోచుకుంటున్నట్టు తేలింది. అయితే, వాట్సాప్ ద్వారానే అత్యధిక సైబర్ మోసాలు, నేరాలు జరుగుతున్నట్టు రిపోర్ట్ స్పష్టం చేసింది. 2024 తొలి మూడు నెలల్లో ఒక్క వాట్సాప్ ద్వారానే 43,797 సైబర్ మోసాలు జరిగినట్టు రిపోర్ట్లో వెల్లడైంది. వాట్సాప్ తర్వాత సైబర్ దొంగలు టెలిగ్రామ్ను మోసాలకు అడ్డాగా మార్చుకుంటున్నట్టు తేలింది. టెలిగ్రామ్ ద్వారా 22,680 సైబర్ మోసాలు జరిగినట్టు రిపోర్ట్ స్పష్టం చేసింది. ఇన్స్టాగ్రామ్ ద్వారా19,800, ఫేస్బుక్ద్వారా 20,766, యూట్యూబ్ ద్వారా 3,882 సైబర్ మోసాలు జరిగినట్టు వెల్లడించింది.
అంతా గూగుల్ ద్వారానే..
సోషల్ మీడియా ద్వారా సైబర్ నేరాలకు పాల్పడుతున్న దుండగులు గూగుల్ సర్వీసెస్ను ప్రధాన వేదికగా వాడుకుంటున్నట్టు రిపోర్ట్ వెల్లడించింది. గూగుల్ యాడ్స్ ద్వారా యూజర్లకు అడ్వర్టైజ్మెంట్లను ఫార్వర్డ్ చేసి డబ్బులను కొల్లగొడుతున్నట్టు ఆందోళన వ్యక్తం చేసింది. ఈ స్కాములను పిగ్ బుచరింగ్ స్కామ్ లేదా ఇన్వెస్ట్మెంట్ స్కామ్గా కేంద్రం చెబుతున్నది. ఈ స్కామ్ల ద్వారా సైబర్ దొంగలు పెద్ద మొత్తంలో డబ్బును దోచేస్తున్నారని పేర్కొంది. ఎక్కువగా నిరుద్యోగ యువత, గృహిణులు, విద్యార్థులు, అవసరంలో ఉన్నోళ్లను టార్గెట్ చేసుకుని మోసాలకు పాల్పడుతున్నట్టు తేల్చింది.
సైబర్ క్రైమ్స్ మస్తు పెరిగినయ్
మూడేండ్లలో సోషల్ మీడియాలోనే కాకుండా వివిధ మార్గాల్లో సైబర్ ఫైనాన్షియల్ ఫ్రాడ్ కేసులు భారీగా పెరిగాయి. 2021తో పోలిస్తే ఏకంగా 11 రెట్లు పెరగడం కలవరపరుస్తోంది. అలాగే జనం పోగొట్టుకుంటున్న అమౌంట్ కూడా పెరిగిపోతున్నది. 2021లో సైబర్ ఫైనాన్షియల్ ఫ్రాడ్స్పై 1,36,604 కేసులు నమోదైతే.. 2023లో ఆ సంఖ్య 11,29,519కి పెరగడం పరిస్థితి తీవ్రతకు అద్దం పడుతున్నది. 2024 తొలి మూడు నెలల్లోనే 3,81,854 కేసులు నమోదయ్యాయి. 2021లో 547.73 కోట్లను సైబర్ నేరగాళ్లు దోచేస్తే.. 2023 నాటికి అది రూ.7,476.54 కోట్లకు పెరిగింది. 2024 తొలి మూడు నెలల్లోనే రూ.4,249.96 కోట్ల మేరకు సైబర్ కేటుగాళ్లు దోచేశారు. అయితే, సైబర్ నేరగాళ్లు దోచుకున్న దాంట్లో రికవరీ చేస్తున్న మొత్తం మాత్రం 12 శాతం వరకే ఉంటున్నది.
ఇల్లీగల్ లోన్ యాప్స్కు అడ్డా ఫేస్బుక్
అక్రమంగా కార్యకలాపాలు నిర్వహిస్తున్న పలు లోన్యాప్లు.. ఫేస్బుక్నే అడ్డాగా మార్చుకున్నట్టు కేంద్ర ప్రభుత్వ రిపోర్ట్ స్పష్టం చేసింది. కొందరు సైబర్ నేరగాళ్లు ఫేస్బుక్ యాడ్స్ ద్వారా ఇల్లీగల్ లోన్ యాప్ల గురించి ప్రకటనలు ఇస్తున్నట్టు తేల్చింది. ఆ లింక్లనూ క్లిక్ చేయడం ద్వారా ప్రజలు డబ్బును పోగొట్టుకుంటున్నారని తెలిపింది. దీనిపై ఇప్పటికే ఫేస్బుక్ సంస్థకు రిపోర్ట్ చేసినట్టు నివేదికలో కేంద్రం వెల్లడించింది. ఇక, గూగుల్లో లోపాలున్న విషయాలు, ముప్పు పొంచి ఉన్న అంశాలపైనా గూగుల్కు తెలియజేస్తున్నట్టు రిపోర్ట్లో పేర్కొంది. అక్రమ డిజిటల్ లోన్ యాప్లు, సైబర్ నేరగాళ్లు గూగుల్లో చొరబడేందుకు అనువుగా ఉన్న ఫైర్బేస్ డొమెయిన్, గూగుల్ ప్లే ప్రొటెక్ట్ ద్వారా ఆండ్రాయిడ్ బ్యాంకింగ్ మాల్వేర్లను బ్లాక్ చేయడం, పుషింగ్ అడ్వర్టైజర్ల జాబితా వంటి విషయాలపై గూగుల్తో చర్చిస్తున్నట్టు కేంద్రం వివరించింది.
ఏడాది
ఏడాదివారీగా సైబర్ ఫైనాన్షియల్ క్రైమ్స్..
ఏడాది ఫిర్యాదులు దోచిన బ్యాంకులు ఫ్రీజ్ చేసిన
డబ్బు(రూ.కోట్లలో) మొత్తం(రూ.కోట్లలో)
2021 1,36,604 547.73 36.40
2022 5,13,334 2,295.90 169.04
2023 11,29,519 7,476.54 921.58
2024 (మార్చి వరకు) 3,81,854 4,249.96 478.91
2024 తొలి మూడు నెలల్లో
సోషల్ మీడియా ద్వారా జరిగిన నేరాలు
ప్లాట్ఫాం జనవరి ఫిబ్రవరి మార్చి
వాట్సాప్ 15,355 13,696 14,746
టెలిగ్రామ్ 8,462 6,567 7,651
ఇన్స్టాగ్రామ్ 6,708 5,940 7,152
ఫేస్బుక్ 6,525 7,190 7,051
యూట్యూబ్ 1,591 1,156 1,135
