- మృతుడు హైదరాబాద్కు చెందిన వ్యక్తి
- అనుమానాస్పద మృతిగా కేసు నమోదు
హనుమకొండ, వెలుగు: ఆటోలో డెడ్ బాడీ కలకలం రేపిన ఘటన హనుమకొండ హంటర్ రోడ్డులోని వరంగల్ పబ్లిక్ క్లబ్ సమీపంలో జరిగింది. స్థానికులు బుధవారం మధ్యాహ్నం ఆటోలో డెడ్ బాడీని చూసి సుబేదారి పోలీసులకు సమాచారం ఇచ్చారు. వెంటనే వెళ్లి విచారణ చేపట్టారు. ఆటోలో లభించిన లైసెన్స్ ఆధారంగా మృతుడు హైదరాబాద్ లోని బంజారాహిల్స్ దేవరకొండ బస్తీకి చెందిన ఆటో డ్రైవర్ ముల్కల ఉప్పలయ్యగా గుర్తించారు.
ఆటో( టీఎస్ 09 యూసీ 5534 ) లో మధ్యాహ్నం డెడ్ బాడీ కనిపించడంతో పాటు హత్య జరిగిందనే అనుమానాలు వ్యక్తమయ్యాయి. వరంగల్ సెంట్రల్జోన్ డీసీపీ సలీమా, హనుమకొండ ఏసీపీ దేవేందర్ రెడ్డి, సుబేదారి సీఐ సత్యనారాయణ రెడ్డి ఘటనా స్థలాన్ని పరిశీలించారు. ఉప్పలయ్య ఆటో వెనక సీట్లో మృతిచెంది ఉండడంతో ఎవరైనా మర్డర్ చేశారా..? యాక్సిడెంట్ జరిగి ఉంటుందా..? అనే ప్రశ్నలు తలెత్తతున్నాయి. మృతుడి కుటుంబ సభ్యులకు పోలీసులు సమాచారం అందించారు. అనుమానాస్పద మృతిగా కేసు నమోదు చేసి దర్యాప్తు చేస్తున్నాట్టు సుబేదారి సీఐ సత్యనారాయణ రెడ్డి తెలిపారు.
