2023 ఆక్టోబర్ లో ఇండియా వేదికగా జరగబోయే వన్డే ప్రపంచకప్‌కు పసికూన నెదర్లాండ్స్ అర్హత సాధించింది. నెదర్లాండ్స్ వన్డే ప్రపంచకప్‌కు అర్హత సాధించడం ఇదే తొలిసారి కావడం విశేషం. 2023 జూలై 06 గురువారం స్కాట్లాండ్ తో జరిగిన కీలక మ్యాచ్ లో 6 వికెట్లతో విజయం సాధించి ఆఖరి బెర్తును ఖరారు చేసుకుంది.
ఈ మ్యాచ్‌లో తొలుత బ్యాటింగ్ చేసిన స్కాట్లాండ్ 9 వికెట్ల నష్టానికి 277 పరుగులు చేసింది. బ్రెండన్ మెక్‌ములెన్ సెంచరీతో రాణించాడు. 110 బంతుల్లో 11 ఫోర్లు, 3 సిక్సర్లతో 106 పరుగులు చేశాడు. ఆ తరువాత స్కాట్లాండ్ నిర్దేశించిన 278 పరుగుల లక్ష్యాన్ని 42.5 ఓవర్లోనే నెదర్లాండ్స్ చేధించింది. బాస్ డి లీడే సూపర్ సెంచరీతో జట్టు విజయంలో కీ రోల్ పోషించాడు.
క్వాలిఫయర్స్‌ సూపర్ సిక్స్‌లో ఆడిన నాలుగు మ్యాచ్‌ల్లో విజయం సాధించిన శ్రీలంక ఇప్పటికే ప్రపంచ కప్‌ బెర్తును ఖరారు చేసుకున్న సంగతి తెలిసిందే. స్కాట్లాండ్‌పై తాజా విజయంతో చివరి బెర్తును నెదర్లాండ్స్ సొంతం చేసుకుంది.
