- అసోసియేట్, అసిస్టెంట్ ప్రొఫెసర్ పోస్టులూ ఖాళీనే
- ఔట్ సోర్సింగ్ సిబ్బందితో స్టూడెంట్లకు క్లాసులు
- పీహెచ్డీ చేసే వీలు లేక ఇబ్బందులు
మహబూబ్నగర్, వెలుగు: పాలమూరు యూనివర్సిటీ(పీయూ) రెగ్యులర్ పోస్టులన్నీ ఖాళీగా ఉన్నాయి. ఇప్పటి వరకు ఒక్క రెగ్యులర్ ప్రొఫెసర్ను నియమించలేదు. కేడర్ స్ట్రెంత్కు అనుగుణంగా నియామకాలు చేపట్టలేదు. అసిస్టెంట్ ప్రొఫెసర్లు, అసోసియేట్ ప్రొఫెసర్ పోస్టులన్నీ దాదాపు ఖాళీగా ఉన్నాయి. దీంతో ఔట్ సోర్సింగ్ ఎంప్లాయిస్ ద్వారా స్టూడెంట్లకు క్లాసులు చెప్పిస్తున్నారు. అయితే రెగ్యులర్ ప్రొఫెసర్లు లేక స్టూడెంట్లకు గైడ్లు కరువయ్యారు. దీంతో వారు పీహెచ్డీలు చేసేందుకు దూరం అవుతున్నారు.
95 పోస్టులకు 77 ఖాళీలు..
పీయూకు 95 మంజూరయ్యాయి. ఇందులో 18 పోస్టులను మాత్రమే భర్తీ చేయగా.. మిగతా 77 పోస్టులు ఖాళీగా ఉన్నాయి. 13 ప్రొఫెసర్ పోస్టులు శాంక్షన్ చేయగా.. ఇప్పటి వరకు ఒక్క పోస్టును కూడా భర్తీ చేయలేదు. అసోసియేట్ ప్రొఫెసర్ పోస్టులు 24 శాక్షన్ కాగా.. రెండు పోస్టులను భర్తీ చేసి మిగతా 22 పోస్టులు ఖాళీగానే ఉంచారు. అసిస్టెంట్ ప్రొఫెసర్ పోస్టులు 58 శాంక్షన్ కాగా.. ఇందులో 16 పోస్టులను భర్తీ చేసి, 42 పోస్టులను ఖాళీగానే ఉంచారు. వీరి స్థానంలో ఔట్ సోర్సింగ్ పద్ధతిలో 94 మంది అసిస్టెంట్ ప్రొఫెసర్లను తీసుకున్నారు. వీరు పీయూతో పాటు ఈ వర్సిటీ పరిధిలోని గద్వాల, వనపర్తి పీజీ కాలేజీల్లో డ్యూటీలు చేస్తున్నారు.
పీహెచ్డీకి ఇబ్బందులు..
వర్సిటీలో ఆయా సబ్జెక్టుల్లో పీహెచ్డీలు చేసేందుకు స్టూడెంట్లు ఇబ్బందులు పడుతున్నారు. గైడ్ షిప్ ఉండటం వల్ల రెగ్యులర్ ప్రొఫెసర్లు కింద వారి కోటాలో ఆరుగురికి, అసిస్టెంట్ ప్రొఫెసర్ కోటాలో నలుగురికి పీహెచ్డీలు చేసే అవకాశం ఉండేది. అయితే ఔట్ సోర్సింగ్ సిబ్బంది ద్వారా సబ్జెక్టులు చెప్పిస్తుండడంతో వీరికి గైడ్ షిప్ వర్తించదు. దీంతో స్టూడెంట్లు పీహెచ్డీలు, ఆయా సబ్జెక్టుల్లో పరిశోధనలు చేయడానికి వీలు లేకుండాపోయింది. ఈ క్రమంలో కొందరు స్టూడెంట్లు ఇక్కడ మానేసి, ఇతర రాష్ర్టాల్లో, వేరే జిల్లాల్లోని వర్సిటీల్లో చేరుతున్నారు. అక్కడే పీహెచ్డీలు, పరిశోధనలు చేస్తున్నారు.
జీతాలకు తప్ప అభివృద్ధికి నిధులియ్యలె..
వెనుకబడిన పాలమూరు జిల్లాలో పేద విద్యార్థులకు ఉన్న విద్యను అందించాలనే ఉద్దేశంతో 2008లో అప్పటి కాంగ్రెస్ ప్రభుత్వం 170 ఎకరాల విస్తీర్ణంలో పీయూను ప్రారంభించింది. కొత్త బిల్డింగులు, ఇతర అధునాతన సౌకర్యాలతో వర్సిటీని అందుబాటులోకి తెచ్చింది. ఆ తర్వాత కొద్ది నెలలకే తెలంగాణ ఉద్యమం ప్రారంభం కావడం.. 2014లో స్వరాష్ట్రం ఏర్పాటు కావడంతో ఈ వర్సిటీకి అన్ని మంచి రోజులొస్తాయని భావించారు. కానీ, గత బీఆర్ఎస్ ప్రభుత్వం ఈ వర్సిటీని పట్టించుకోలేదు. డెవలప్మెంట్ కోసం పదేండ్లు రాష్ట్ర బడ్జెట్లో నిధులు కేటాయించలేదు. 2017లో కేంద్రం మంజూరు చేసిన రూసా ద్వారా వచ్చిన ఫండ్స్తో పలు అభివృద్ధి కార్యక్రమాలు చేపట్టి, ఆ తర్వాత చేతులు దులుపుకుంది. చివరి ఐదేండ్లలో కేవలం పీయూలో పని చేస్తున్న సిబ్బందికి జీతభత్యాలకు తప్ప డెవలప్మెంట్ కోసం నిధులు ఇవ్వలేదు.
కాంగ్రెస్ స్పెషల్ ఫోకస్..
కాంగ్రెస్ అధికారంలోకి వచ్చాక పీయూపై స్పెషల్ ఫోకస్ పెట్టింది. సీఎం రేవంత్ రెడ్డితో పాటు స్థానిక ఎమ్మెల్యే యెన్నం శ్రీనివాస్ రెడ్డి పీయూకు కేంద్రం నుంచి రూ.వంద కోట్ల నిధులను మంజూరు చేయించుకున్నారు. అలాగే లా, ఇంజనీరింగ్ కాలేజీలకు పీయూకు మంజూరు చేయించారు. వచ్చే అకడమిక్ ఇయర్ నుంచి ఈ కాలేజీలను అందుబాటులోకి తీసుకొచ్చే ప్రయత్నాలు చేస్తున్నారు. ఇప్పటికే లా, ఇంజనీరింగ్ కాలేజీబిల్డింగుల నిర్మాణం కోసం పీయూలో స్థలాలను కూడా పరిశీలించారు. అయితే వర్సిటీలో ప్రధానంగా వేధిస్తున్న ప్రొఫెసర్లు, అసోసియేట్, అసిస్టెంట్ ప్రొఫెసర్ పోస్టులను కూడా భర్తీ చేస్తే వర్సిటీ మరింత డెవలప్ అయ్యే అవకాశం ఉంది.
