రేషన్​ షాపుల్లో ఎంక్వైరీ .. అక్రమాలు జరగకుండా ఖమ్మం కలెక్టర్​ నిర్ణయం

• కార్డుల విభజనతో పాటు బినామీ వ్యవహారాలపై ఫోకస్​
• రెండు వారాల్లోనే ప్రక్రియ పూర్తి చేసేలా ప్లాన్​ 
• జిల్లాలోని 748 రేషన్​ షాపుల్లో తనిఖీ

ఖమ్మం జిల్లా ముదిగొండలో నాలుగు రేషన్​ షాపులున్నాయి. అందులో ఒక డీలర్​ పరిధిలో 745 రేషన్​ కార్డులుండగా, అతడికి ప్రతినెలా 140 క్వింటాళ్ల రేషన్​బియ్యం వస్తున్నాయి. అదే ఊర్లో ఉన్న మరో డీలర్​ సస్పెండ్ కావడంతో ఆయన షాపునకు కూడా మొదటి డీలరే ఇన్​చార్జిగా వ్యవహరిస్తున్నారు. అక్కడ 904 రేషన్​ కార్డులుండగా, 169 క్వింటాళ్ల బియ్యం వస్తున్నాయి. మూడో డీలర్ కు 547 రేషన్​ కార్డులుండగా 99 క్వింటాళ్లు పంపిణీ చేస్తున్నారు. 

పెద్ద గ్రామం కావడంతో అక్కడే ఉన్న రాఘవపురం కాలనీకి రెండేండ్ల కింద కొత్త రేషన్​ షాపును మంజూరు చేసి డీలర్ ను నియమించారు. అతడికి 210 కార్డులు కేటాయించడంతో 36 క్వింటాళ్ల బియ్యం స్టాక్​ వస్తోంది. నాలుగో షాపునకు వచ్చిన స్టాక్​ ఒకట్రెండు రోజుల్లోనే అయిపోతుండగా, బియ్యం కోసం మళ్లీ వినియోగదారులు దూరంలో ఉన్న వేరే రేషన్​ షాపులకు వెళ్లాల్సి వస్తోంది. రేషన్​ కార్డులను సమానంగా విభజన చేయకపోవడంతో ఈ పరిస్థితి ఏర్పడుతోంది. ఇక కమిషన్​ రూపంలో వచ్చే ఆదాయంలోనూ నాలుగో డీలర్​ కు అన్యాయం జరుగుతోంది. 

ఖమ్మం, వెలుగు : ఖమ్మం జిల్లాలో డీలర్లకు రేషన్​ కార్డులను సరైన విధంగా విభజించకపోవడంతో కస్టమర్లు ఇబ్బంది పడాల్సి వస్తోంది. దూరంగా ఉన్న రేషన్​ షాపుల నుంచి ఆయా గ్రామస్తులు బియ్యం తెచ్చుకోవడం కష్టంగా మారిందని గుర్తించి రెండేండ్ల కింద కొత్త రేషన్​ డీలర్లను నియమించిన అధికారులు, అదే కొత్త డీలర్లకు తగిన విధంగా స్టాక్​ ను మాత్రం కేటాయించడం లేదు. దీంతో దగ్గరలో ఉన్న రేషన్​షాపుల్లో బియ్యం స్టాక్​ లేక మళ్లీ పాత షాపుల నుంచే బియ్యం తెచ్చుకోవాల్సి వస్తోంది. ఇన్నేళ్లుగా దొడ్డు బియ్యం సప్లయ్​ కావడం, రేషన్ బియ్యం తినేందుకు చాలా మంది ఇష్టపడకపోవడంతో రేషన్​డీలర్లే వాటిని పక్కదారి పట్టించేవారు. 

ఇలా ప్రతినెలా వందల క్వింటాళ్ల రేషన్​బియ్యాన్ని అక్రమంగా తరలిస్తూ, దందాలకు పాల్పడుతున్న రేషన్​ డీలర్లు తమకు వచ్చే ఆదాయంలో అధికారులకు కూడా వాటాలు పంచుతూ వారిని గ్రిప్​లో పెట్టుకున్నారు. కొత్తగా రేషన్​ డీలర్లను ఎంపిక చేసిన తర్వాత వారికి తమతో సమానంగా రేషన్​ కార్డులను విభజించితే, తమ ఆదాయానికి గండిపడుతుందని భావించి అధికారులపై ఒత్తిడి తెచ్చి నామమాత్రంగా 200 లోపు కార్డులను మాత్రమే కొత్తవారికి కేటాయించారు. దీంతో కొత్తగా రేషన్​ షాపులు దక్కిన డీలర్లకు కమిషన్​ రూపంలో వచ్చిన ఆదాయం షాపుల కిరాయి, ఇతర ఖర్చులకే సరిపోతున్నాయని బాధపడుతున్నారు. 

షాపులపై ఎంక్వైరీకి కలెక్టర్​ఆదేశం

రాష్ట్రంలో యావరేజీగా ప్రతి రేషన్​డీలర్ పరిధిలో 522 కార్డులున్నాయని ఇటీవల అసెంబ్లీలో ప్రభుత్వం ప్రకటించింది. అయితే ఖమ్మం జిల్లాలో ఒక్కో రేషన్​ షాపునకు రాష్ట్ర యావరేజీని మించి 550 కార్డులున్నాయి. జిల్లాలో మొత్తం 748 రేషన్​ షాపులుండగా 4,11,428 రేషన్​ కార్డులున్నాయి. ఉదాహరణకు ముదిగొండ మండలంలో 37 మంది రేషన్ డీలర్లకు గాను ఏడుగురికి 250 లోపు మాత్రమే కార్డులున్నాయి. మండలంలోని మల్లారం డీలర్ అమ్మపేటకు ఇన్​చార్జిగా, యడవల్లి డీలర్​ కట్టకూరుకు ఇన్​చార్జిగా, పండ్రేగుపల్లి డీలర్​ ఖానాపురానికి ఇన్​చార్జిగా వ్యవహరిస్తున్నారు. ​ఇలాంటి వాటిని సరిచేయడంతో పాటు సన్నబియ్యం పంపిణీ నేపథ్యంలో క్షేత్ర స్థాయిలో ఎలాంటి అక్రమాలు జరగకుండా చూడడంపై కలెక్టర్​ ముజమ్మిల్ ఖాన్​నజర్ పెట్టారు. 

జిల్లాలోని అన్ని రేషన్​ షాపుల్లో తనిఖీలు నిర్వహించాలని సివిల్ సప్లయ్​అధికారులను ఆయన ఆదేశించారు. ఆయా రేషన్​ షాపులను కేటాయించిన డీలర్లే నిర్వహిస్తున్నారా, బినామీల ద్వారా షాపు నడిపిస్తున్నారా అనేది ఎంక్వైరీలో తేల్చనున్నారు. సకాలంలో రేషన్​ అందిస్తున్నారా, కస్టమర్లకు అందుబాటులో ఉంటున్నారా, ఇతర వ్యాపారాలు ఏవైనా నిర్వహిస్తున్నారా అనే అంశాలతో పాటు కొత్త రేషన్​ షాపుల అవసరంపైనా అధికారులు పరిశీలించనున్నారు. ఇందుకోసం ఎన్​ఫోర్స్​ మెంట్ టీమ్​ లను సిద్ధం చేస్తున్నారు. రెండు వారాల్లో ఈ తనిఖీ ప్రక్రియను పూర్తి చేయాలని భావిస్తున్నారు. 

రెండు పూటలా షాపులు ఓపెన్​ చేయాల్సిందే.. 

తరచుగా రేషన్​ షాపులు మూసి ఉంటున్నాయన్న వినియోగదారుల ఫిర్యాదుల నేపథ్యంలో రెండు పూటలా ఓపెన్​ చేయాలని డీలర్లు జిల్లా అధికారులు ఆదేశించారు. ఉదయం 8 గంటల నుంచి 12 గంటల వరకు, సాయంత్రం 4 గంటల నుంచి 8 గంటల వరకు రేషన్​ ఇచ్చేలా చర్యలు తీసుకుంటున్నారు.