బ్లాక్ డే పాటించిన ఆర్టీసీ ఉద్యోగులు
బస్ భవన్, అన్ని డిపోలు, బస్ స్టేషన్లలో నిరసనలు
హైదరాబాద్, వెలుగు: దేశంలో 29 కార్మిక చట్టాలను రద్దు చేసి వాటి స్థానంలో 4 లేబర్ కోడ్ లను తీసుకురావడాన్ని నిరసిస్తూ రాష్ట్రవ్యాప్తంగా ఆర్టీసీ ఉద్యోగులు, కార్మికులు సోమవారం బ్లాక్ డే పాటించారు. అన్ని ఆర్టీసీ డిపోలలో, బస్ స్టేషన్లలో లేబర్ కోడ్ కాపీలను దగ్ధం చేసి కేంద్ర ప్రభుత్వ వైఖరికి నిరసనగా నినాదాలు చేశారు.
లేబర్ కోడ్లను రద్దు చేయాలని, ప్రభుత్వరంగ సంస్థల ప్రైవేటీకరణను ఆపాలని, కాంట్రాక్టు, ఔట్ సోర్సింగ్ కార్మికులను రెగ్యులరైజ్ చేయాలనే డిమాండ్తో టీజీఆర్టీసీ జాయింట్ యాక్షన్ కమిటీ సోమవారం రాష్ట్రవ్యాప్త బ్లాక్ డేకు పిలుపునిచ్చింది. దీనిని తెలంగాణ అంతటా ఆర్టీసీ ఉద్యోగులు, కార్మికులు పూర్తి స్థాయిలో విజయవంతం చేశారని టీజీఆర్టీసీ జేఏసీ చైర్మన్ వెంకన్న, వైస్ చైర్మన్ థామస్ రెడ్డి చెప్పారు.
హైదరాబాద్లోని బస్ భవన్ వద్ద ఎస్ డబ్ల్యూఎఫ్ ప్రధాన కార్యదర్శి వీఎస్ రావు, ఎస్‌‌‌‌డబ్ల్యూయూ ప్రధాన కార్యదర్శి రాజిరెడ్డి ఆధ్వర్యంలో ఉద్యోగులు, కార్మికులు నల్ల బ్యాడ్జీలు ధరించి డ్యూటీలకు అటెండ్ అయ్యారు. ఈ సందర్భంగా వారు మాట్లాడుతూ యాజమాన్యాలకు అనుకూలమైన, కార్మికులకు వ్యతిరేకమైన ఈ చట్టాలను రద్దు చేసేదాకా ఉద్మమిస్తామని హెచ్చరించారు. ఈ కోడ్ అమల్లోకి వస్తే యాజమాన్యం దయాదాక్షిణ్యాలతోనే కార్మికులు బతకాల్సిన దుస్థితి ఏర్పడుతుందని ఆందోళన వ్యక్తంచేశారు.
