2024 కల్లా స్పేస్ స్టేషన్ సిద్ధం
ఐఎస్ఎస్ పని అయిపోయిందటున్న రష్యా
స్పేస్లో రష్యా తనకంటూ ఓ సొంత గూడు కట్టుకునేందుకు సిద్ధమైపోతోంది! అంతరిక్ష ప్రపంచంలో ఆస్ట్రోనాట్లు ఉండేందుకు, అక్కడి పరిస్థితులను తెలుసుకునేందుకు ఇప్పటికే ఇంటర్నేషనల్ స్పేస్ స్టేషన్(ఐఎస్ఎస్) ఉన్నా.. దాని పనిఅయిపోయిందని రష్యా అంటోంది. దాని వల్ల భవిష్యత్లో పెను ముప్పు పొంచి ఉందని ఆందోళన వ్యక్తం చేస్తోంది. అందుకే మరో మూడేళ్లలో తన సొంత గూడును సిద్ధం చేసుకుని.. అంతరిక్షంలోకి పంపేందుకు చకచకా పనులు కానిచ్చేస్తోంది. ఈ విషయాన్ని స్వయంగా రష్యా స్పేస్ ఏజెన్సీ రాస్కాస్మోస్ చీఫ్ దిమిత్రీ రొగోజిన్ వెల్లడించారు.
వయసు మళ్లిన ఐఎస్ఎస్
ఒకప్పుడు స్పేస్ ప్రయోగాల్లో రష్యానే రారాజుగా ఉండేది. అంతరిక్షంలోకి తొలి ఆస్ట్రోనాట్ను పంపిన దేశమది. ఎన్నెన్నో ఉపగ్రహాలను పంపి తనకు తిరుగులేని ముద్ర వేసుకుంది. కానీ, అంతరిక్ష ప్రపంచంలోకి అమెరికా అడుగు పెట్టాక, నాసా ప్రయోగాలు స్టార్ట్ చేశాక ఆ దేశం ఘనత కొద్దికొద్దిగా తగ్గిపోతూ వచ్చింది. ఈ క్రమంలోనే అంతరిక్ష పరిస్థితులను తెలుసుకునేందుకు ఐఎస్ఎస్ అనే ఓ వేదికను నాసా ఏర్పాటు చేసింది. అందులో రష్యా సహకారమూ ఉందనుకోండి. రష్యా ఒక్కటే కాదు, జపాన్, కెనడా, యూరప్ దేశాలూ తలో చెయ్యి వేశాయి. అయితే, 1998లో పంపిన ఐఎస్ఎస్ వయసు మీదపడిపోతోంది. ఇప్పటికే 23 ఏండ్లు నిండాయి. నిజానికి 15 ఏండ్ల నుంచి 30 ఏండ్ల కాలపరిమితితోనే ఐఎస్ఎస్ను ఏర్పాటు చేశారు.
ఐఎస్ఎస్తో డేంజర్ అని
రష్యాకు ఇప్పుడు అదే ఆందోళన పట్టుకుంది. దాని కాలపరిమితి దగ్గరపడుతుండడంతో తనకంటూ కొత్తగా స్పేస్ స్టేషన్ను ఏర్పాటు చేసుకోవాలనుకుంది. ఈ క్రమంలోనే దానికి సంబంధించిన పనులనూ మొదలుపెట్టేసింది. అన్నీ అనుకున్నట్టు జరిగితే 2024లో తన సొంత స్పేస్ ఇంటిని నింగిలోకి పంపాలని టార్గెట్గా పెట్టుకుంది. ‘‘ఐఎస్ఎస్ పని దాదాపు అయిపోయింది. ఇప్పటికే దానిని పంపించి 23 ఏండ్లు. వాస్తవంగా దానిని తక్కువలో తక్కువ 15 ఏండ్లకే డిజైన్ చేశారు. గరిష్ఠంగా 30 ఏండ్లు. పాతబడిపోయిన ఐఎస్ఎస్తో ఆస్ట్రోనాట్ల ప్రాణాలకే ప్రమాదం. తెలిసితెలిసీ మేం ఆస్ట్రోనాట్ల ప్రాణాలను పణంగా పెట్టలేం. అందుకే 2024 నాటికి మా సొంత స్పేస్ స్టేషన్నే వాడుకుంటాం’’ అని రాస్కాస్మోస్ చీఫ్ చెప్పుకొచ్చారు.
5 మాడ్యూల్స్తో..
ప్రస్తుతం ఐఎస్ఎస్లో 16 మాడ్యూల్స్ ఉన్నాయి. అందులో అమెరికావి 9 ఉంటే.. రష్యాకు చెందినవి నాలుగున్నాయి. ఆ తర్వాత రెండు జపాన్ మాడ్యూళ్లు, ఒకటి యూరప్ మాడ్యూల్ ఉంది. భవిష్యత్లో ఐఎస్ఎస్కు కమర్షియల్ మాడ్యూల్స్నూ అటాచ్ చేసే ప్రతిపాదనలున్నాయి. అందులో ఒకటి నాసాకు చెందిన కమర్షియల్ పార్ట్నర్ యాగ్జియం స్పేస్ ఏర్పాటు చేయనుంది. అయితే, ఇప్పడు రష్యా పంపాలనుకుంటున్న స్పేస్ స్టేషన్లో మొదటి దశలో ఐదు మాడ్యూళ్లు ఉండనున్నాయి. అందులో ఒకటి కమర్షియల్ మాడ్యూల్. నలుగురు టూరిస్టులకు చోటు ఉండేలా కమర్షియల్ మాడ్యూల్ను తయారు చేస్తున్నారు.
గూఢచర్యం ఆరోపణలతో..
ఐఎస్ఎస్‌పై రష్యా కుట్రకు పాల్పడిందంటూ కొద్ది నెలల కిందట అమెరికా సంచలన ఆరోపణలు చేసింది. ఐఎస్ఎస్ మాడ్యూల్కు డ్యామేజీని రష్యానే చేసిందని, అంతరిక్ష ప్రయోగాలకు సంబంధించి గూఢచర్యానికీ పాల్పడిందని ఆరోపించింది. ఈ నేపథ్యంలోనే రష్యా సొంతంగా ఒక స్పేస్ స్టేషన్ను ఏర్పాటు చేసుకోవాలని నిర్ణయించుకుంది. ఐఎస్ఎస్ చాలా ప్రమాదకరంగా మారుతోందని, దానిని నమ్ముకోలేమని రష్యా ఉప ప్రధాని యూరీ బోరిసోవ్ ఇటీవలే వ్యాఖ్యానించారు. దానితో పెను విపత్తు పొంచి ఉందని హెచ్చరికలూ చేశారు.
పాత స్పేస్ స్టేషన్ మోడలే స్ఫూర్తి..
రష్యా 1986లో పంపిన తొలి స్పేస్ మాడ్యూల్ మీర్ స్పేస్ స్టేషన్ నమూనా ఆధారంగానే కొత్త స్పేస్ స్టేషన్ను నిర్మిస్తోంది. 2001 వరకు మీర్ స్పేస్ స్టేషన్ సేవలందించింది. 2024లో అంగారా ఏ5 రాకెట్ ద్వారా ప్లెసెస్క్ లేదంటే వోస్టోక్నీ అనే కాస్మోడ్రోమ్ల నుంచి కొత్త స్పేస్ స్టేషన్ను పంపేందుకు ప్లాన్లను సిద్ధం చేసి పెట్టుకుంది. రష్యా స్పేస్ స్టేషన్కు తోడుగా చైనా లార్జ్ మాడ్యులార్ స్పేస్ స్టేషన్ కూడా రెడీ అవుతోంది. లో ఎర్త్ ఆర్బిట్లో వాటిని ప్రవేశపెట్టనున్నారు. అయితే, ప్రస్తుతం ఐఎస్ఎస్ బరువులో రష్యా పంపాలనుకుంటున్న స్పేస్ స్టేషన్ బరువు కేవలం ఐదో వంతు.
