జైపూర్/కోల్ బెల్ట్,వెలుగు: మంచిర్యాల జిల్లా శ్రీరాంపూర్ఏరియా ఇందారం-–1 సింగరేణి ఓపెన్కాస్ట్గనిలో కాంట్రాక్ట్ వోల్వో డ్రైవర్ల సమ్మె శుక్రవారం కూడా కొనసాగింది. వారం రోజులుగా సమ్మె చేస్తుండగా గనిలో బొగ్గు ఉత్పత్తి, ఓబీ వెలికితీత పనులు పూర్తిగా నిలిచిపోయాయి. గత నెల 29న ఇందారం ఓసీపీలో ఓబీ పనులు నిర్వహించే వరాహీ ఓబీ కాంట్రాక్ట్ కంపెనీ మూడు షిప్టులకు చెందిన సుమారు 300 మంది వోల్వో డ్రైవర్లు తమ వేతనాలు పెంచాలని సమ్మెకు దిగారు.
ఏండ్లుగా వేతనాల పెంపుపై సింగరేణి, ఓసీపీ ఓబీ కాంట్రాక్ట్ కంపెనీ పట్టించుకోవడంలేదని డ్రైవర్లు ఆరోపిస్తున్నారు. ప్రస్తుతం రూ.19,370 లు ఇస్తున్నారని, దానిని రూ.22,800 పెంచాలని డిమాండ్చేస్తున్నారు. వోల్వో డ్రైవర్ల సమ్మెకు అన్ని కార్మిక సంఘాలు, కాంట్రాక్ట్ సంఘాలు, రాజకీయ పార్టీలు మద్దతు పలుకుతున్నాయి. వారం రోజుల సమ్మెతో సింగరేణి కంపెనీ సుమారు 40వేల టన్నుల బొగ్గు ఉత్పత్తికి నష్టం వాటిల్లింది. .
