షేర్​ మార్కెట్ పేరిట మోసాలు.. దంపతుల అరెస్ట్​

• వైజాగ్, పుణె, హైదరాబాద్,  వరంగల్​ సిటీల్లో రూ.5 కోట్లు వసూలు

హనుమకొండ, వెలుగు : షేర్​మార్కెట్ లో పెట్టుబడులు, నిరుద్యోగులకు ఉద్యోగాలంటూ మోసాలకు పాల్పడుతున్న దంపతులను వరంగల్ టాస్క్​ ఫోర్స్, సుబేదారి పోలీసులు అరెస్ట్​ చేశారు. కోల్​కతాకు చెందిన నిమిత్​ కపాసి అలియాస్​ అమిత్​ కుమార్​ షా కొన్నేండ్ల కింద హైదరాబాద్ వచ్చాడు. ఇస్లామియాబజార్​కు చెందిన కాసోజు జయ అలియాస్ సుమన్ కపాసిని ప్రేమించి పెండ్లి చేసుకున్నాడు. ఇదివరకే ఆమెకు ఆధార్​సెంటర్​లో పని చేసిన అనుభవం ఉండడంతో ఇద్దరూ కలిసి ఈజీ మనీ కోసం మోసాలు మొదలుపెట్టారు. 

వైజాగ్​, పుణె, హైదరాబాద్​, వరంగల్ తదితర నగరాల్లో హిందీ, ఇంగ్లీష్​, గుజరాతీ, బెంగాలీ భాషల్లో అనర్గళంగా మాట్లాడుతూ స్థానికులతో మాటలు కలిపేవారు. అవతలి వ్యక్తుల స్వభావాన్ని బట్టి సీబీఐ, ప్రెస్, బ్యాంక్ ​మేనేజర్ల మంటూ నకిలీ ఐడీ కార్డులు చూపిస్తూ పరిచయం పెంచుకునేవారు. తర్వాత షేర్​మార్కెట్లలో పెట్టుబడుల పేరిట, ఎంఎన్​సీ కంపెనీల్లో ఉద్యోగాలు ఇప్పిస్తామంటూ పెద్ద మొత్తంలో డబ్బులు వసూలు చేసేవారు. కొన్ని నెలల కింద హనుమకొండలోని సుబేదారి సాయినగర్​కాలనీకి మకాం మార్చారు. స్పీకింగ్​ సీస్​ కన్సల్టెంట్ ​కంపెనీ పెట్టి ఉద్యోగాలిస్తామని నిరుద్యోగుల నుంచి రూ.1.30 కోట్ల వరకు వసూలు చేశారు.

జులైవాడకు చెందిన రియాజ్​కు ఉద్యోగం ఇప్పిస్తానని లక్షలు తీసుకున్నారు. ఉద్యోగం ఇప్పించకపోవడంతో మోసపోయినట్టు తెలుసుకున్న రియాజ్​ పోలీసులకు ఫిర్యాదు చేశాడు. పోలీసులు కూపీ లాగి గురువారం నిందితులను అదుపులోకి తీసుకున్నారు. వారి నుంచి నకిలీ సీబీఐ, ప్రెస్, బ్యాంక్​మేనేజర్​ఐడీ కార్డ్స్​తో పాటు నకిలీ ఆధార్, పాన్​కార్డ్స్​, రూ.7,800 నగదు, 13 నకిలీ బ్యాంక్​చెక్​బుక్స్​ స్వాధీనం చేసుకుని రిమాండ్​కు తరలించారు. ఇద్దరూ కలిసి వైజాగ్, పుణె, హైదరాబాద్, వరంగల్ లలో  రూ.5 కోట్లకు పైగా మోసాలకు పాల్పడ్డారని, కేసు విచారణ జరుపుతున్నామని సుబేదారి సీఐ సత్యనారాయణరెడ్డి తెలిపారు.