- రూ.1.95 కోట్లు విత్ డ్రా చేయకుండా అకౌంట్ ఫ్రీజ్
- సీఎండీ డీపీతో అకౌంట్స్ ఆఫీసర్కు వాట్సాప్ మెసేజ్
- డబ్బులు ట్రాన్స్ఫర్ చేసిన అధికారి
- మోసపోయానని గుర్తించిన కంపెనీ సీఎండీ
- ఎన్సీఆర్పీలో ఫిర్యాదు.. రెండు గంటల్లోనే ఖాతా ఫ్రీజ్
హైదరాబాద్, వెలుగు: ఓ కంపెనీ అకౌంట్ నుంచి సైబర్ నేరగాళ్లు కొట్టేసిన రూ.1.95 కోట్లను విత్ డ్రా చేయకుండా రాష్ట్ర సైబర్ సెక్యూరిటీ బ్యూరో (టీజీ సీఎస్బీ) అడ్డుకున్నది. కొన్ని గంటల వ్యవధిలోనే అకౌంట్ను ఫ్రీజ్ చేయించింది. ఈ కేసుకు సంబంధించిన వివరాలను సీఎస్బీ డైరెక్టర్ శిఖా గోయల్ వెల్లడించారు. హైదరాబాద్లోని ఓ ప్రముఖ కన్స్ట్రక్షన్ కంపెనీలో పని చేస్తున్న అకౌంట్స్ ఆఫీసర్కు గురువారం వాట్సాప్ లో మెసేజ్ వచ్చింది. వాట్సాప్ డీపీగా కంపెనీ సీఎండీ ఫొటో ఉంది.
కొత్త ప్రాజెక్ట్ కోసం డబ్బులు పంపించాల్సి ఉంది. ఎస్ఎంఎస్లో పేర్కొన్న డీబీఎస్ బ్యాంక్ అకౌంట్కు వెంటనే 1.95 కోట్లు అడ్వాన్స్గా చెల్లించండి’’అని మెసేజ్లో ఉన్నది. దీంతో సదరు అకౌంట్స్ ఆఫీసర్ మధ్యాహ్నం 1.02 గంటలకు కంపెనీ అకౌంట్ నుంచి జైపూర్లోని డీబీఎస్ అకౌంట్కు రూ.1.95 కోట్లు బదిలీ చేశాడు. రూ.1.95 కోట్లు ట్రాన్స్ఫర్ అయినట్లు కంపెనీ సీఎండీకి బ్యాంక్ నుంచి నోటిఫికేషన్ వచ్చింది.
జైపూర్ అకౌంట్కు డబ్బులు ట్రాన్స్ఫర్
తన ప్రమేయం లేకుండానే డబ్బులు ట్రాన్స్ఫర్ అయినట్లు గుర్తించిన సీఎండీ.. మోసం జరిగిందని తెలుసుకుని వెంటనే నేషనల్ సైబర్ క్రైమ్ రిపోర్టింగ్ పోర్టల్ (ఎన్సీఆర్పీ)లో కంప్లైంట్ చేశాడు. ఎన్సీఆర్పీలో అప్లోడ్ అయిన కంప్లైంట్ను తెలంగాణ స్టేట్ సీఎస్బీ అధికారులు పరిశీలించారు. ట్రాన్సాక్షన్కు సంబంధించిన సరైన వివరాలు లేకపోవడంతో ఆ కంపెనీ నుంచి ఫిర్యాదు చేసిన వారిని అధికారులు సంప్రదించారు. అయితే, అప్పటికే మోసానికి గురైన సీఎండీ.. సీఎస్బీ అధికారులు ఫోన్ చేసినా కొంత అనుమానం వ్యక్తం చేశాడు.
సీఎస్బీ మొత్తం వివరాలు వెల్లడించడంతో నగదు బదిలీకి సంబంధించిన స్క్రీన్ షాట్లు ఇచ్చాడు. దీంతో మధ్యాహ్నం 2.51 గంటల సమయంలో సీఎస్బీ అధికారులు డబ్బు డిపాజిట్ అయిన జైపూర్లోని డీబీఎస్ బ్యాంక్ నోడల్ అధికారులతో సమన్వయం చేసుకున్నారు. అప్పటికే రెండు గంటలు గడిచిపోయాయి. డీబీఎస్ అకౌంట్లో అలాగే ఉన్న రూ.1.95 కోట్లను సైబర్ నేరగాళ్లు విత్ డ్రా చేయకుండా ఫ్రీజ్ చేశారు. వాట్సాప్, ఈ మెయిల్, ఫోన్ ద్వారా వచ్చే మనీ రిక్వెస్ట్లతో జాగ్రత్తగా ఉండాలని శిఖాగోయల్ సూచించారు. తెలియని వారికి డబ్బులు ట్రాన్స్ఫర్ చేయవద్దని చెప్పారు.
