ప్రైవేట్ కొలువులకు డీట్..ఏఐ ఆధారిత యాప్ రూపొందించిన సర్కార్

• ఏఐ ఆధారిత యాప్ రూపొందించిన సర్కార్ 
• కంపెనీలు, విద్యార్థులు/నిరుద్యోగులకు మధ్య వారధి
• అటు కంపెనీలు, ఇటు స్టూడెంట్లు
• రిజిస్టర్ అయ్యేలా చర్యలు
• ఇప్పటికే 15 వేల మంది స్టూడెంట్లు, 67 సంస్థల నమోదు
• జాబితాలో డాక్టర్ ​రెడ్డీస్​, ఫాక్స్​కాన్, బీడీఎల్, హ్యుందాయ్ లాంటి ప్రముఖ కంపెనీలు

హైదరాబాద్, వెలుగు: ప్రైవేట్​ సంస్థల్లో యువతకు ఉద్యోగ అవకాశాలు కల్పించేందుకు రాష్ట్ర ప్రభుత్వం చర్యలు చేపట్టింది.  విద్యార్థులు, నిరుద్యోగులు ప్రైవేట్​ కొలువులు పొందేలా పరిశ్రమల శాఖ ఆధ్వర్యంలో డిజిటల్ ​ఎంప్లాయ్​మెంట్​ఎక్స్ఛేంజ్ ఆఫ్​ తెలంగాణ (డీట్) యాప్​ను తీసుకొచ్చింది. ఇది ఆర్టిఫిషియల్​ ఇంటెలిజెన్స్ (ఏఐ) ఆధారంగా పని చేస్తుంది. విద్యార్థులు, నిరుద్యోగులను ప్రైవేట్, కార్పొరేట్​ సంస్థలతో లింక్​ చేసేలా అధికారులు యాప్​ను అభివృద్ధి చేశారు. దీన్ని పల్లెల్లోని నిరుద్యోగులు, విద్యార్థులు కూడా వాడుకునేలా అవగాహన కల్పిస్తున్నారు. పోయినేడాది డిసెంబర్​ 4న డీట్​ యాప్​ను ప్రారంభించగా.. ఇప్పటి వరకు 67 సంస్థలు, 15 వేల మంది విద్యార్థులు అందులో రిజిస్టర్ ​అయ్యారు. డీట్​ నిర్వహణ కోసం పరిశ్రమల శాఖలో ప్రత్యేకంగా ఒక వింగ్ ​ఏర్పాటు చేశారు.

ఆండ్రాయిడ్, యాపిల్ ఫోన్లలో ఈ యాప్​ను ఇన్ స్టాల్ చేసుకోవచ్చు. స్మార్ట్​ఫోన్​ సౌకర్యం లేనివాళ్లు, హాస్టళ్లలో ఉండి చదువుకునే విద్యార్థులు deet.telangana.gov.in వెబ్​సైట్ ద్వారా రిజిస్టర్ అయ్యే అవకాశం కల్పించారు. రాష్ట్రంలో పెట్టుబడులు పెట్టే సంస్థలు కచ్చితంగా 20 నుంచి 30 శాతం వరకు రిక్రూట్​మెంట్లను డీట్ ​ద్వారా చేయాలన్న షరతునూ సర్కార్ విధిస్తున్నది. 

ఎన్​రోల్​మెంట్​పై దృష్టి.. 

పాలిటెక్నిక్, డిగ్రీ, ఇంజనీరింగ్, ఫార్మసీ తదితర కోర్సులకు చెందిన ఫైనల్​ ఇయర్​ స్టూడెంట్లు డీట్​లో నమోదు చేసుకునేలా కాలేజీ మేనేజ్మెంట్లతో అధికారులు కో ఆర్డినేట్​ చేస్తున్నారు. డిస్ట్రిక్ట్​ ఎంప్లాయ్​మెంట్​ఆఫీసర్, టెక్నికల్​ఎడ్యుకేషన్, కాలేజ్​ఎడ్యుకేషన్, టాస్క్​(రీజనల్​ మేనేజర్) సహకారం తీసుకుంటున్నారు. విద్యార్థులు యాప్​లో నమోదు చేసుకునేందుకు కాలేజీల్లో ప్లేస్​మెంట్స్ ​అండ్ ​ట్రైనింగ్ ​కోఆర్డినేటర్లు ఉండేలా చర్యలు తీసుకుంటున్నారు. వాళ్లు ఎప్పటికప్పుడు డీట్ ​కోఆర్డినేటర్లతో టచ్​లో ఉండి విద్యార్థులు ఎన్​రోల్​అయ్యేలా చూస్తున్నారు. 

దీన్ని మానిటర్​చేసేందుకు జిల్లాల్లో ప్రత్యేకంగా నోడల్ ​ఆఫీసర్​ను నియమించారు. గ్రామీణ ప్రాంతాల్లోని నిరుద్యోగులు, విద్యార్థులు రిజిస్టర్​ అయ్యేలా చూసేందుకు జిల్లా కలెక్టర్ ​నేతృత్వంలో టాస్క్​ రీజనల్ ​మేనేజర్లు సభ్యులుగా డిస్ట్రిక్ట్ ​లెవెల్ ​రివ్యూ కమిటీలనూ ఏర్పాటు చేస్తున్నారు. ప్రస్తుతం డిగ్రీ, పాలిటెక్నిక్​ కాలేజీల్లోని విద్యార్థులను ఎన్​రోల్ ​చేయిస్తుండగా.. ఇంజనీరింగ్, ఫార్మసీ వంటి ఇతర ప్రొఫెషనల్ ​కోర్సులు చదువుతున్న విద్యార్థులనూ ఎన్​రోల్​ చేయించేలా కోఆర్డినేట్​ చేస్తున్నారు. 

38 వేల స్కిల్స్..​

డీట్ ​యాప్​లో విద్యార్థులు/నిరుద్యోగులు, కంపెనీలకు వేర్వేరుగా రిజిస్ట్రేషన్​అవకాశం కల్పించారు. యాప్​ను డౌన్​లోడ్ చేసుకున్నాక విద్యార్థులు/నిరుద్యోగులు.. అందులో ఈ–మెయిల్ ​లేదా ఫోన్​నంబర్​తో రిజిస్టర్ ​అయి తమ వ్యక్తిగత వివరాలు, విద్యా ర్హతలు, వారికున్న నైపుణ్యాల వివరాలను ఎంటర్​చేయాలి. వారి వివరాల ఆధారంగా ఏఐ అల్గారిథం ద్వారా యాప్​లోనే ఆటోమేటిక్​గా ఓ రెజ్యూమె కూడా తయారవుతుంది. ఈ యాప్​లో 38 వేల స్కిల్స్​ను పొందుపరిచారు. అభ్యర్థుల విద్యార్హతలకు అనుగుణంగా పార్ట్​టైమ్, ఫుల్​టైమ్, వర్క్​ఫ్రమ్ ​హోమ్ ​వంటి అవకాశాలతో పాటు ఇంటర్న్​షిప్ ​చాన్స్​లు కూడా కల్పిస్తున్నారు. అయితే, ఎప్పటికప్పుడు డీట్ ​యాప్​ లేదా ఆన్​లైన్​లో లాగిన్​ అయి జాబ్స్​ గురించి చెక్​ చేసుకోవాలని అధికారులు సూచిస్తున్నారు. 3 నెలల పాటు లాగిన్​ కాకుంటే.. సదరు అభ్యర్థిని ఇనాక్టివ్​జాబ్​ సీకర్​ కింద పెడతారని చెప్తున్నారు. 

అంతా ఆన్​లైన్​లోనే..  

డీట్​ యాప్​లో కంపెనీలు కూడా ఎన్​రోల్ ​చేసుకుని, తమకు ఎలాంటి స్కిల్స్​ఉన్నోళ్లు కావాలో ఎంటర్​ చేయాల్సి ఉంటుంది. అలా రిజిస్టర్ ​అయిన కంపెనీలతో విద్యార్థులు/నిరుద్యోగులను మ్యాచ్​చేసేలా ఓ ప్రత్యేకమైన ఏఐ అల్గారిథంను యాప్​లో వాడుతున్నారు. ఈ ఏఐ అల్గారిథం.. విద్యార్థుల స్కిల్స్​ఆధారంగా ఆయా సంస్థలకు వారి వివరాలను పంపిస్తుంది. కంపెనీలను తమకు కావాల్సిన అర్హతలున్న విద్యార్థులు/నిరుద్యోగులతో ఏఐ ‘మ్యాచ్​’ చేస్తుంది. విద్యార్థి/నిరుద్యోగి, సంస్థ మ్యాచ్​ అయ్యాక.. సదరు అభ్యర్థులతో సంస్థ చాట్​బాక్స్​లో చర్చిస్తుంది.

 తర్వాత కంపెనీ ఆన్​లైన్​లోనే ఇంటర్వ్యూ షెడ్యూల్ ​చేస్తుంది. ఒకవేళ సంస్థ ఆ విద్యార్థి/నిరుద్యోగిని కావాలనుకుంటే.. ఆఫర్ ​లెటర్ ఇస్తుంది. అయితే, ఆ ఆఫర్​ను యాక్సెప్ట్​ చేయాలా? వద్దా? అన్నది పూర్తిగా ఆ అభ్యర్థి ఇష్టానికే వదిలేస్తారు. జాబ్​ వచ్చేదాకా ప్రాసెస్​ అంతా ఆన్​లైన్​లోనే జరగడం విశేషం. ఎప్పటికప్పుడు జాబ్ ​నోటిఫికేషన్స్, జాబ్ మేళాల వివరాలూ వచ్చేలా యాప్​ను డెవలప్​ చేశారు. విద్యార్థులు, కంపెనీల డేటా సేఫ్​గా ఉండేలా స్టేట్​ డేటా సెంటర్ ​ఆధ్వర్యంలోని డేటాబేస్​లో భద్రపరుస్తున్నారు. 

ప్రముఖ కంపెనీలు నమోదు.. 

డీట్​ యాప్​లో ఇప్పటికే పలు ప్రముఖ కంపెనీలు రిజిస్టర్​ అయ్యాయి. ఆటోమొబైల్స్, ఐటీ, ఫార్మా, ఎడ్యుకేషన్, ఫైనాన్షియల్​ సర్వీసెస్, ఔట్​సోర్సింగ్, మ్యాన్ ఫ్యాక్చరింగ్, హెల్త్​కేర్ ​రంగాలకు చెందిన సంస్థలు డీట్​లో నమోదు చేసుకున్నాయి. 

డాక్టర్​ రెడ్డీస్, ఫాక్స్​కాన్, బీడీఎల్, ఐసీఐసీఐ బ్యాంక్, ఎస్బీఐ లైఫ్​ ఇన్సూరెన్స్, శ్రీచైతన్య ఎడ్యుకేషనల్​ ఇనిస్టిట్యూషన్స్, భారత్ హ్యుండయ్, డెక్స్​టారా డిజిటల్​ ప్రైవేట్ లిమిటెడ్, డియోస్ ​ఇన్ఫోటెక్​ ప్రైవేట్​ లిమిటెడ్, జీఐఎస్​ఇండ్, హెచ్​డీబీ ఫైనాన్స్​సర్వీసెస్, హెచ్ఆర్​ చాంబర్స్​ ఔట్​సోర్సింగ్​ ప్రైవేట్​ లిమిటెడ్, క్వెస్​కార్ప్​ లిమిటెడ్, రాయ్స్​ ఎడ్యుకేషనల్​కన్సల్టెన్సీ, సెయిలో టెక్​ ప్రైవేట్ ​లిమిటెడ్, శ్రీచక్ర పాలిప్లాస్ట్​ప్రైవేట్​లిమిటెడ్, ఎస్ఎస్ఎస్​వీ సొల్యూషన్స్, స్టాన్​ప్లస్​టెక్నాలజీస్, సింక్రోసర్వ్​గ్లోబల్ సొల్యూషన్స్​ ప్రైవేట్​ లిమిటెడ్, థరారే గ్లోబల్​ సొల్యూషన్స్, వాలరో టెక్నాలజీస్, వి మేక్​స్కాలర్స్, యంగ్​ స్టర్స్​ ఆఫ్​ హైదరాబాద్​ యూత్ ​వెల్ఫేర్​ అసోసియేషన్​వంటి సంస్థలు అందులో ఉన్నాయి. కాగా, 520 లెక్చరర్, టీచర్​ పోస్టులను భర్తీ చేసేందుకు శ్రీచైతన్య ఎడ్యుకేషనల్ ఇనిస్టిట్యూషన్స్​ డీట్ ద్వారా ఎన్​రోల్ ​చేసుకుంది.