- వరదను అంచనా వేసేలా చర్యలు
- గోదావరి, కృష్ణా ప్రాజెక్టుల వద్ద ఏర్పాటు చేయాలన్న యోచనలో ఇరిగేషన్ శాఖ
హైదరాబాద్, వెలుగు: గోదావరి, కృష్ణా నదులపై ఉన్న ప్రధాన ప్రాజెక్టుల వద్ద ‘డెసిషన్ సపోర్ట్ సిస్టమ్’ను ఏర్పాటు చేస్తే ఎలా ఉంటుందన్న దానిపై ప్రభుత్వం ఆలోచనలు చేస్తున్నది. ఈ వ్యవస్థ సెట్ చేస్తే ఎప్పటికప్పుడు నదిలో వరద ప్రవాహం, ప్రాజెక్టుల పరిస్థితిని తెలుసుకునేందుకు వీలవుతుందని భావిస్తున్నట్టు తెలిసింది.
దీనికి సంబంధించి ఇప్పటికే ఓ ప్రైవేటు సంస్థ ద్వారా వీడియో కాన్ఫరెన్స్లో డెమో కూడా తీసుకున్నట్టు సమాచారం. ముందుగా గోదావరి నదిపై ఉన్న ప్రాజెక్టుల వద్ద ఏర్పాటు చేసి దాని పనితీరు గురించి తెలుసుకోవాలని అధికారులు భావిస్తున్నట్టు తెలుస్తున్నది.
డెసిషన్ సపోర్ట్ సిస్టమ్ అంటే ఏంటి?
డెసిషన్ సపోర్ట్ సిస్టమ్ ఓ కంప్యూటర్ ఆధారిత వ్యవస్థ. ప్రాజెక్టుల వద్ద దీని కోసం ఓ పెద్ద నెట్ వర్క్ నే ఏర్పాటు చేస్తారు. వాతావరణం ఎలా ఉందో తెలుసుకునేందుకు వెదర్ స్టేషన్, వాటర్ లెవెల్స్ను ఎప్పటికప్పుడు తెలుసుకునే వ్యవస్థ, అలల తీవ్రత, వస్తున్న వరద, ఆ వరదతో ప్రాజెక్టుల మీద పడుతున్న ఒత్తిడి, భూమిలో పరిస్థితులు (సీస్మిక్ అసెస్మెంట్) సహా ప్రతి విషయాన్నీ ఈ డెసిషన్ సపోర్ట్ సిస్టమ్ అంచనా వేస్తుంది. దాని ప్రకారం.. ఎప్పుడు ఏం చేయాలో ప్రతి చిన్న డేటానూ వాటికి అనుసంధానించిన కంప్యూటర్ వ్యవస్థకు పంపిస్తుంది.
ఈ డేటా ఆధారంగా డ్యామ్ లేదా బ్యారేజీ గేట్ల ఆపరేషన్ను నిర్వహిస్తారు. వస్తున్న వరద వల్ల డ్యామ్ లేదా బ్యారేజీలకు ముప్పు ఉన్నట్టు తెలిస్తే ఈ సిస్టమ్ వెంటనే అలర్ట్ చేస్తుంది. దానికి అనుగుణంగా అధికారులు సరైన సమయంలో చర్యలు తీసుకునేందుకు వీలుంటుంది.
