నిజామాబాద్, వెలుగు: అసెంబ్లీ ఎలక్షన్ల వేళ పార్టీల్లో కొత్త లీడర్ల చేరికలు, తమకే టికెట్వస్తుందని ధీమాతో ఉన్నవారిలో గుబులు రేపుతున్నాయి. ఎక్కడ తమకు పోటీ అవుతారోనని సీనియర్లు టెన్షన్ పడుతున్నారు. ఇప్పటికే ఆశావహుల సంఖ్య ఎక్కువగా ఉన్నచోట రాజకీయ చర్చకు తెర లేపుతున్నాయి.
నిజామాబాద్ రూరల్లో..
రూరల్ నియోజకవర్గం నుంచి మాజీ ఎమ్మెల్సీ డాక్టర్ భూపతిరెడ్డి కాంగ్రెస్ టికెట్ఆశిస్తున్నారు. వైద్య వృత్తిని పక్కనబెట్టి ప్రజల మధ్య ఉంటున్నారు. గతంలో పోటీ చేసే చాన్స్ అందినట్లే అంది చేజారింది. దీంతో టీఆర్ఎస్ను వీడి, కాంగ్రెస్లో చేరారు. పాలిటిక్స్లో క్రియాశీలకంగా ఉంటున్న ఆయనకు ఇప్పటికే మార్కెట్కమిటీ అధ్యక్షుడు నగేశ్రెడ్డితో పొసగడం లేదు. తాజాగా మాజీ ఎమ్మెల్సీ అరికెల నర్సారెడ్డి బీఆర్ఎస్ వీడి కాంగ్రెస్లోకి వస్తున్నారు. ఆయన చేరిక ఇప్పటికే టికెట్ రేసులో ఉన్న నేతలకు మింగుడు పడడం లేదు.
బాల్కొండలో..
బాల్కొండ నియోజకవర్గంపై డీసీసీ ప్రెసిడెంట్మానాల మోహన్రెడ్డి, కిసాన్ కాంగ్రెస్ రాష్ట్ర అధ్యక్షుడు అన్వేశ్రెడ్డి కన్నేశారు. ఇప్పుడు ముత్యాల సునీల్రెడ్డి కాంగ్రెస్లో చేరేందుకు ప్రయత్నిస్తున్నారు. మాజీ మంత్రి సుదర్శన్ రెడ్డికి బంధువైన సునీల్రెడ్డి చేరికను కాంగ్రెస్ హైకమాండ్ ఓకే చెప్పినట్లు తెలుస్తోంది.
ఆర్మూర్లోనూ అంతే..
బీజేపీకి ఆర్మూర్ నుంచి ఉద్దండ లీడర్లు ఉన్నారు. జిల్లా పార్టీకి నాయకత్వం వహించిన చరిత్ర ఆ ప్రాంతానికి ఉంది. ప్రతీ ఎలక్షన్లో బీజేపీ టికెట్ కోసం పోటీ తీవ్రంగా ఉంటుంది. ఈ సారి టికెట్ మాకే వస్తుందని వినయ్రెడ్డి, కంచెట్టి గంగాధర్ ధీమాతో ఉన్నారు. కొత్తగా పారిశ్రామిక వేత్త పైడి రాకేశ్రెడ్డి జాయినయ్యారు. ఆయన చేరికతో పార్టీలో జోష్ వచ్చినా, టికెట్విషయంలో మిగతావారు హైరానా పడుతున్నారు.
బోధన్ బీజేపీలోకి మహారాష్ట్ర వాసి..
బోధన్లో బీజేపీ పక్షాన ప్రకాశ్రెడ్డి, మోహన్రెడ్డి యాక్టివ్గా ఉన్నారు. వీరిద్దరూ ఒకరి తర్వాత ఒకరు బీజేపీలో చేరారు. టికెట్ తమకే దక్కుతుందని ఎవరికి వారే ధీమాగా ఉన్నారు. అయితే మహారాష్ట్రలో సెటిల్అయిన బోధన్ ప్రాంతవాసి బీజేపీలో చేరుతారని ప్రచారం సాగుతోంది.
అర్బన్లోనూ..
అర్బన్ కాంగ్రెస్లోనూ టికెట్ ఆశిస్తున్న వారి సంఖ్య ఎక్కువగా ఉంది. టీపీసీసీ వర్కింగ్ ప్రెసిడెంట్మహేశ్గౌడ్, ఉపాధ్యక్షుడు తాహెర్, మాజీ మేయర్ సంజయ్, యూత్ కోటాలో కేశ వేణు ఎవరి అంచనాల్లో వారు ఉన్నారు. ఎలక్షన్ నాటికి ఇతర పార్టీల ప్రముఖులు కాంగ్రెస్లో చేరే అవకాశం లేకపోలేదని భావిస్తున్నారు.
