- ఆరుగురిపై కేసు నమోదు
- నిందితుల్లో జగిత్యాల మున్సిపల్ ఉద్యోగి
- మెట్ పల్లిలో ఘటన
మెట్ పల్లి, వెలుగు : అన్నదమ్ముల మధ్య నెలకొన్న భూ వివాదం మరో ఐదుగురికి వరంగా మారింది. వివాదం పరిష్కరించి భూమికి పట్టా చేయించి ఇస్తామని నమ్మబలికి బాధితులను రూ.12 లక్షలకు ముంచారు. ఈ కేసులో పోలీసులు ఐదుగురిపై ఎస్సీ ఎస్టీ అట్రాసిటీతో పాటు చీటింగ్ కేసు నమోదు చేశారు. జగిత్యాల జిల్లా మెట్పల్లి ఎస్సై చిరంజీవి కథనం ప్రకారం పట్టణానికి చెందిన కుంబాల గణేశ్ ముంబైలో ఉంటాడు. స్వగ్రామమైన ఇబ్రహీంపట్నం మండలం వేములకుర్తిలో తన అన్న రాందాస్తో భూ వివాదం నడుస్తోంది.
గణేశ్కు చెందాల్సిన భూమిని అతడికి ఇవ్వకుండా రాందాస్ తన భార్య పేరిట రిజిస్ట్రేషన్ చేయించుకున్నాడు. పంచాయితీలు పెట్టినా సమస్య పరిష్కారం కాలేదు. ఈ క్రమంలో గణేశ్ వేములకుర్తికి వచ్చిపోయే క్రమంలో మెట్పల్లికి చెందిన హకీమ్, సయ్యద్ అక్రంతో పరిచయం ఏర్పడింది. విషయం వారికి చెప్పగా కలెక్టరేట్లో పని చేస్తారంటూ నరేశ్, సద్దాం, మనోజ్, మారుతిని పరిచయం చేయించారు. వీరు రాందాస్ భార్య పేరిట ఉన్న భూమిని గణేశ్ పేరిట మార్చి పట్టా చేస్తారని చెప్పారు. రూ. 20 లక్షలు ఖర్చవుతుందని చెప్పి రూ.12 లక్షలు తీసుకున్నారు.
డబ్బులు తీసుకొని నెలలు గడుస్తున్నా పని చేయడం లేదు. దీంతో గణేశ్ ఫిర్యాదుతో హకీమ్, అక్రం, నరేశ్, సద్దాం, మనోజ్, మారుతీలపై కేసు నమోదు చేసి దర్యాప్తు చేస్తున్నట్లు ఎస్సై తెలిపారు. కాగా, కేసులో జగిత్యాల మున్సిపాలిటీలో పనిచేసే ఉద్యోగి మారుతి ఉండడం చర్చనీయాంశమైంది. ఎస్సీ, ఎస్టీ అట్రాసిటీ నమోదు కాగా, డీఎస్పీ ఉమామహేశ్వర్ రావు విచారణ జరిపారు.
