కాగజ్ నగర్, వెలుగు: ఈ నెల 26న ఢిల్లీలోని కర్తవ్య పథ్లో నిర్వహించనున్న గణతంత్ర దినోత్సవ పరేడ్కు ఆసిఫాబాద్ జిల్లాలోని మారుమూల ప్రాంతాలకు చెందిన ఇద్దరు మహిళలకు ఆహ్వానం అందింది. వేడుకల్లో పాల్గొనాలని బెజ్జూర్ మండలం కుకుడ గ్రామానికి చెందిన పోర్తెటి శ్రీదేవి, కౌటాల మండలం కౌటీ అంగన్వాడీ కార్యకర్త ఎస్.జయంతి రాణికి ఆహ్వానం అందింది.
స్వర్ణిమ్ భారత్ కార్యక్రమంలో భాగంగా పీఎం యశశ్వి స్కీం టెక్స్ టైల్ (హ్యాండీక్రాఫ్ట్స్), డబ్ల్యూసీడీ హ్యాండీక్ట్రాఫ్ట్స్ విభాగాల్లో అత్యుత్తమ సేవలు అందిస్తున్న మహిళల కేటగిరిలో 41 మందికి ప్రత్యేక అతిథులుగా మినిస్ట్రీ ఆఫ్ డిఫెన్స్ ఆహ్వానం పలకగా.. అందులో ఈ ఇద్దరికి చోటుదక్కింది. శ్రీదేవి మండల సమాఖ్య అధ్యక్షురాలితో పాటు జిల్లా సమాఖ్య అధ్యక్షురాలిగా కొనసాగుతున్నారు. ఈమె గతంలోనూ ఢిల్లీకి ప్రత్యేక ఆహ్వనితురాలిగా వెళ్లివచ్చారు. అంగన్వాడీ కార్యకర్త అయిన జయంతిరాణి కొడుకు ఇటీవల పైలెట్గా ఎంపికై శిక్షణ పొందుతున్నాడు. తమ ఎంపిక పట్ల ఈ ఇద్దరు ఆనందం వ్యక్తం చేశారు.
