హనుమకొండ, వెలుగు: వరంగల్ కాశిబుగ్గ తిలక్ నగర్ ప్రాంతంలో బూజు పట్టిన పచ్చళ్లు అమ్ముతున్న దంపతులను మంగళవారం వరంగల్ టాస్క్ ఫోర్స్ పోలీసులు పట్టుకున్నారు. టాస్క్ ఫోర్స్ ఏసీపీ ఎం.జితేందర్ రెడ్డి తెలిపిన వివరాల ప్రకారం.. తిలక్ నగర్లో మార్త అంజయ్య, సులోచన దంపతులు కొంతకాలంగా పచ్చళ్ల బిజినెస్ చేస్తున్నారు. ఫుడ్ సేఫ్టీకి సంబంధించి ఎలాంటి పర్మిషన్స్ లేకుండానే ఉసిరి, మామిడి, చింతకాయ, టమాట, నిమ్మకాయ తదితర పచ్చళ్లు తయారు చేస్తూ వాటిని డ్రమ్ముల్లో నిల్వ ఉంచుతున్నారు.
బూజు పట్టి, ఎలుకలు తిరుగుతున్నా పట్టించుకోకుండా వాటినే సిటీలోని దుకాణాలకు సప్లై చేస్తున్నారు. విషయం తెలుసుకున్న టాస్క్ ఫోర్స్ పోలీసులు తనిఖీలు చేసి వారిని అదుపులోకి తీసుకున్నారు. రూ.5.2 లక్షల విలువైన 30 ప్లాస్టిక్ డ్రమ్ముల్లో నిల్వ చేసిన 52 క్వింటాళ్ల పచ్చళ్లు, వాటికి అవసరమయ్యే పదార్థాలను స్వాధీనం
చేసుకున్నారు.
