వచ్చే రెండు ఆర్థిక సంవత్సరాలు (2025–26, 2026–27) భారత వృద్ధిరేటు 6.7 శాతంగా కొనసాగవచ్చని ప్రపంచ బ్యాంక్ అంచనా వేసింది. 2025లో దక్షిణాసియా వృద్ధిరేటు 6.2 శాతంగా ఉండవచ్చని పేర్కొన్నది. ఆ తర్వాత ఏడాది కూడా అదే స్థాయిని కొనసాగించవచ్చని అంచనా వేసింది. భారత్లో సేవల రంగం స్థిరంగా వృద్ధి చెందవచ్చు. తయారీ కార్యకలాపాలు మరింత బలోపేతం కావొచ్చు. వ్యాపార వాతావరణాన్ని మెరుగుపరిచేందుకు ప్రభుత్వం చేపడుతున్న చర్యలు ఇందుకు దోహదం చేయవచ్చు.
- ప్రభుత్వ పెట్టుబడులు మోస్తారుగా ఉన్నా ప్రైవేటు పెట్టుబడులు రాణిస్తుండటంతో పెట్టుబడుల్లో వృద్ధి స్థిరంగా కనిపించవచ్చు.
- ప్రస్తుత ఆర్థిక సంవత్సరంలో భారత వృద్ధిరేటు 6.5 శాతానికి పరిమితం కావొచ్చు. ఇందుకు పెట్టుబడుల్లో మందగమనం, బలహీన తయారీ కారణమని ప్రపంచ బ్యాంక్ పేర్కొన్నది. ప్రైవేట్ వినియోగంలో వృద్ధి బలంగా ఉండటం కలిసొచ్చే అంశమని పేర్కొన్నది.
- వ్యవసాయ రంగం రికవరీ చెందడంతో గ్రామీణ ఆదాయాలు మెరుగుపడి వినియోగం పెరిగిందని విశ్లేషించింది.
- భారత్ను మినహాయిస్తే దక్షిణాసియా ప్రాంత వృద్ధి 2024లో 3.9 శాతంగా ఉండవచ్చు. బంగ్లాదేశ్లో రాజకీయ సంక్షోభం వల్ల పెట్టుబడిదార్ల విశ్వాసం దెబ్బతిన్నది. పాకిస్తాన్, శ్రీలంక పుంజుకోవడం సానుకూలంశం.
- భారత్ను పరిగణనలోకి తీసుకుంటే దక్షిణాసియా వృద్ధి 2025లో 4 శాతం, 2026లో 4.3 శాతంగా నమోదు కావచ్చని అంచనా.
- చైనా ఆర్థిక వ్యవస్థ 2024లో 5 శాతం వృద్ధిరేటును నమోదు చేసింది. అంతక్రితం ఏడాది వృద్ధి 5.2శాతంతో పోలిస్తే తక్కువే. అయినా ప్రభుత్వ అంచనాలకు తగ్గట్లుగా వెలువడింది.
- గ్లోబల్ ఎకానమీ 2025–26 రెండింటిలోనూ 2.7 శాతం వృద్ధి చెందుతుందని అంచనా వేసింది.
