గండిపేట, వెలుగు: అమ్మాయిలకు మాత్రమే స్పెషల్ క్లాసులు పెట్టి, వారి పట్ల అసభ్యంగా ప్రవర్తించిన కీచక టీచర్పై సస్పెన్షన్ వేటు పడింది. రాజేంద్రనగర పరిధిలోని బుద్వేల్‌ జడ్పీహెచ్ఎస్లో ఎన్‌. వేణుగోపాల్‌ ఆరున్నర ఏళ్లుగా ఫిజిక్స్, సైన్స్‌ పాఠాలు చెప్తున్నాడు. సాయంత్రం స్కూల్ ముగిసినప్పటికీ బాలికలను ఇంటికి పంపకుండా రాత్రి 8 గంటల వరకు స్పెషల్ క్లాసులు నిర్వహిస్తున్నాడు. ఈ క్రమంలో పలువురు బాలికల ప్రైవేట్ పార్ట్స్ తాకుతూ అసభ్యకరంగా ప్రవర్తించాడు. ఈ విషయాన్ని విద్యార్థులు మహిళా టీచర్లకు చెప్పగా, వారు స్కూల్ ప్రిన్సిపల్ దృష్టికి తీసుకెళ్లారు.
దీంతో ప్రశ్నించిన ప్రిన్సిపల్ను కూడా అసభ్య పదజాలంతో దూషించాడు. ఈ క్రమంలో విద్యార్థుల తల్లిదండ్రులు సోమవారం స్కూల్కు చేరుకొని, సదరు టీచర్ను చితకబాదారు. రాజేంద్రనగర్ ఎంఈవోకు ఫిర్యాదు చేయడంతో వేణుగోపాల్‌‌ను విధుల నుంచి సస్పెండ్‌ చేశారు. మరోవైపు, నిందితుడిని పోలీసులు అదుపులోకి తీసుకొని విచారిస్తున్నట్లు సమాచారం.
