ఏదైనా స్పెషల్ డే గుర్తుండిపోవాలంటే ఆరోజు ఏదో ఒక స్పెషల్ రెసిపీ టేస్ట్ చేయాల్సిందే. ఇవాళ రిపబ్లిక్ డే.. ఇది ఇండియన్స్ అందరికీ స్పెషల్ మాత్రమే కాదు ఇంపార్టెంట్ డే కూడా. మరి ఈ డేని స్పెషల్గా సెలబ్రేట్ చేసుకోవాల్సిందే కదా. అయితే తక్కువ టైంలో సింపుల్గా, హెల్దీగా తినాలంటే.. బ్రెడ్ చాలా బెటర్. అందుకే ఈ రిపబ్లిక్ డేకి బ్రెడ్తో ముచ్చటగా మూడు రకాల టోస్ట్లు, వాటిని తయారుచేసుకునే విధానం మీకోసం.
బనానా – బ్రెడ్ టోస్ట్
కావాల్సినవి :
బ్రెడ్ స్లైసులు – ఐదు
అరటి పండ్లు – రెండు
వెన్న – ఒక టేబుల్ స్పూన్
కొబ్బరి పొడి – రెండు టేబుల్ స్పూన్లు
చక్కెర – అర టీస్పూన్
తయారీ : అరటి పండ్లను తొక్క తీసి, చిన్న ముక్కలుగా కోయాలి. పాన్లో వెన్న వేడి చేసి అందులో అరటి పండు ముక్కల్ని వేసి ఉడికించాలి. తర్వాత వాటిని ఒక గిన్నెలో వేయాలి. బ్రెడ్ స్లైస్లకు చివర్లు కత్తించాలి. తర్వాత చపాతీ కర్రతో వత్తి, దాని మధ్యలో అరటి పండు గుజ్జు, కొబ్బరి పొడి పెట్టి, మడతపెట్టాలి. రెండు వైపులా చివర్ల నుంచి లీక్ అవ్వకుండా మూసేయాలి. వాటిని పాన్లో రెండు వైపులా కాల్చుకోవాలి. అవి ప్లేట్లోకి తీసుకున్న తర్వాత వాటిమీద చక్కెర చల్లుకుంటే సరి. సింపుల్గా రెడీ చేసుకునే ఈ స్వీట్ పిల్లలకు బాగా నచ్చుతుంది.
చిల్లీ చీజ్ టోస్ట్
కావాల్సినవి:
బ్రెడ్ స్లైసులు – ఆరు
చీజ్ – ఒక కప్పు, క్యాప్సికమ్ తరుగు – పావు కప్పు, పచ్చిమిర్చి తరుగు – ఒక టేబుల్ స్పూన్, ఉల్లిగడ్డ తరుగు, పాలు, వెన్న – ఒక్కోటి రెండు టేబుల్ స్పూన్లు
మిరియాల పొడి – పావు టీస్పూన్
ఉప్పు – సరిపడా
తయారీ : ఒక గిన్నెలో చీజ్ వేసి పాలు పోసి మిరియాల పొడి, ఉప్పు వేసి బాగా కలిపి పక్కన ఉంచాలి. అందులో సన్నగా తరిగిన పచ్చిమిర్చి, క్యాప్సికమ్, ఉల్లిగడ్డ వేసి అవన్నీ కలిసేలా బాగా కలపాలి. బ్రెడ్ స్లైస్లకు రెండు వైపులా వెన్న పూయాలి. పాన్ వేడి చేసి అందులో వెన్న పూసిన బ్రెడ్ స్లైసులను రెండు వైపులా కాల్చాలి. ఆ తర్వాత ఒక బ్రెడ్ స్లైస్ మీద రెడీ చేసుకున్న స్టఫింగ్ పూసి దానిపై మరో బ్రెడ్ పెట్టాలి. ఆపై మరోసారి పాన్లో పెట్టి కాసేపు ఉడికించాలి. వేడిగా ఉన్నప్పుడే వాటిని శాండ్ విచ్ ఆకారంలో చాకుతో కట్ చేయాలి. స్పైసీ, యమ్మీగా ఉండే చిల్లీ చీజ్ టోస్ట్ తినడానికి రెడీ.
ఎగ్ మసాలా టోస్ట్
కావాల్సినవి :
కోడిగుడ్లు – ఐదు, ఉల్లిగడ్డ – ఒకటి
పచ్చిమిర్చి – రెండు, పసుపు – పావు టీస్పూన్
మిరియాల పొడి – అర టీస్పూన్
ఉప్పు – సరిపడా, కారం లేదా చిల్లీ ఫ్లేక్స్ – ఒక టీస్పూన్, కొత్తిమీర – కొంచెం
వెన్న – సరిపడా
తయారీ : ఒక గిన్నెలో కోడిగుడ్ల సొన వేసి బాగా కలపాలి. అందులో ఉల్లిగడ్డ, పచ్చిమిర్చి తరుగు, పసుపు, మిరియాల పొడి, ఉప్పు, చిల్లీ ఫ్లేక్స్, కొత్తిమీర వేసి బాగా కలపాలి. బ్రెడ్ స్లైస్ మీద స్టఫింగ్ పూసి, పాన్లో వెన్న వేడి చేసి అందులో బ్రెడ్ స్లైస్ పెట్టాలి. తర్వాత రెండో వైపు కూడా స్టఫింగ్ వేయాలి. అలా స్టఫింగ్ వేసిన బ్రెడ్ స్లైస్లను రెండు వైపులా కాల్చాలి.
