- ధరణిలో బ్లాక్ లిస్ట్లో 5 ఎకరాల ప్రభుత్వ భూమి
- ఇద్దరి పేర్లపై పాస్బుక్లు జారీచేసిన ఆపరేటర్లు
- అరెస్టయిన నిందితుల్లో ఇద్దరు ధరణి ఉద్యోగులు
గచ్చిబౌలి, వెలుగు: కోట్ల రూపాయల విలువైన ప్రభుత్వ భూమిని కొట్టేసేందుకు ప్రయత్నించిన ముఠాను సైబరాబాద్ పోలీసులు అరెస్ట్ చేశారు. సైబరాబాద్ ఈఓడబ్ల్యూ డీసీపీ ప్రసాద్ తెలిపిన వివరాల ప్రకారం.. హైదరాబాద్లోని మణికొండ పోకల్వాడలో 5 ఎకరాల ప్రభుత్వ భూమి ఉంది. దీని విలువ రూ.500 కోట్ల వరకు ఉంటుందని భావిస్తున్నారు. ఈ భూమిని ఆక్రమించేందుకు మణికొండకు చెందిన పూస రవీందర్, పూస ప్రహ్లాద్ యత్నిస్తున్నారని గండిపేట తహసీల్దార్ శ్రీనివాస్రెడ్డి సైబరాబాద్ పోలీసులకు ఫిర్యాదు చేశారు.
ప్రభుత్వ భూమిని రవీందర్, ప్రహ్లాద్ పేర్ల మీద రియల్టర్లు రవీందర్యాదవ్, రాఘవేందర్రెడ్డి నకిలీ పత్రాలు సృష్టించారు. భూమి తమ పేరుపై రిజిస్ర్టేషన్ అయిన తర్వాత పెద్ద మొత్తంలో డబ్బులు చెల్లిస్తామని ఒప్పందం చేసుకున్నారు. ఈ ప్లాన్లో నల్లగండ్లకు చెందిన రియల్ఎస్టేట్ వ్యాపారులు మోహన్బాబు, శివరామ్కుమార్ చేరారు. అందరూ కలిసి రంగారెడ్డి కలెక్టర్ ఆఫీసులో ధరణి పోర్టల్లో పనిచేస్తున్న దీపావత్ నరేశ్, దీపావత్ శ్రీనివాస్ను సంప్రదించారు. బ్లాక్ లిస్ట్లో ఉన్న 5 ఎకరాల ప్రభుత్వ భూమికి పాస్ బుక్లు జారీ చేయాలని కోరారు. ఇందు కోసం ధరణి ఆపరేటర్లు రూ.3 కోట్లు డిమాండ్ చేసి అడ్వాన్స్గా రూ.8 లక్షలు తీసుకున్నారు.
ఆర్ఐ, ఎమ్మార్వో, ఆర్డీఓ రిపోర్ట్ లేకుండానే వేర్వేరు సందర్భాల్లో దీపావత్ నరేశ్.. జిల్లా కలెక్టర్లుగా ఉన్న హరీశ్, భారతి హోళికేరీతో ఫైల్స్పై ఆమోద ముద్రలు వేయించాడు. దీంతో పూస ప్రహ్లాద్ పేరుపై 2.20 ఎకరాలు, పూస రవీందర్ పేరుపై 2.20 ఎకరాలకు పాస్బుక్లు జారీ అయ్యాయి. బ్లాక్ లిస్ట్లో ఉన్న ప్రభుత్వ భూమికి పాస్బుక్లు జారీ కావడం తెలిసి ఎమ్మార్వో సైబరాబాద్ పోలీసులకు ఫిర్యాదు చేశారు.
కేసు నమోదు చేసిన సైబరాబాద్ ఎకనామిక్ అఫెన్స్ వింగ్ పోలీసులు.. ప్రభుత్వ భూమిని కబ్జా చేసేందుకు యత్నించిన రియల్టర్లు రవీందర్యాదవ్, రాఘవేందర్రెడ్డి, మోహన్బాబు, శివరామ్కుమార్, ధరణి ఉద్యోగులు నరేశ్, శ్రీనివాస్, మరో వ్యక్తి భీంరావులను అరెస్ట్ చేశారు. అప్పటి కలెక్టర్ హరీశ్కు నోటీసులు పంపుతామని సైబరాబాద్ ఈఓడబ్ల్యూ డీసీపీ ప్రసాద్ తెలిపారు. ఆ తర్వాత వచ్చిన కలెక్టర్ భారతి హోళికేరి.. తన వద్దకు వచ్చిన అనుమానాస్పద ఫైల్స్ మొత్తం 68 ఉన్నాయని గుర్తించి పోలీసులకు కంప్లైంట్ చేశారని పోలీసులు వెల్లడించారు. వాటిపైనా ఎంక్వైరీ చేస్తామన్నారు.
